புரோமின்
கண்டுபிடிப்பு
1825 -ல் ஜெர்மனி நாட்டின் ஹெய்டெல் பெர்க் பல்கலைக் கழகத்தில் காரல் ஜேகப்
லோவிக் ( Carl Jacob Lowig ) என்ற மாணவர் ஒரு நீரூற்றிலுள்ள நீரில் சேர்ந்துள்ள உப்புக்கள் சேர்மானம் பற்றி ஆராய்ந்தார். அக்கரைசல் வழி குளோரினைச் செலுத்த அது உப்பு நீருக்குச் செந்நிற மூட்டியது. ஈதர் மூலம் உப்பு நீருக்கு நிறமூட்டிய பொருளைத் தனித்துப் பிரிக்க , அது செம்பழுப்பு நிறத்தில் நீர்மமாக இருந்தது . அதுவே பிற்பாடு புரோமின் என அழைக்கப்பட்டது . எனினும் தூய்மையான புரோமினைப் பெற்று அதன் இயற்பியல் மற்றும் வேதியல் பண்புகளை முழுமையாகத் தெரிவிக்காததால் அதைக் கண்டுபிடித்த பெருமை அவருக்கு கிடைக்காமல் போயிற்று
1826 ல் பிரான்ஸ் நாட்டின் பாலார்டு(A.J.Balard) என்ற வேதியல் அறிஞர் புரோமினைக்
கண்டுபிடித்தார் . ஒரு குடுவையில் பொட்டாசியம் புரோமைடு , மாங்கனீஸ் டை ஆக்சைடு மற்றும் நீர்த்த கந்தக அமிலம் இவற்றை இட்டு சூடுபடுத்தி எழும் கருஞ்சிவப்பு ஆவியைக் குளிர்வித்து நீர்மமாக்கி புரோமினைப் பெறலாம். பாலார்டு இதற்கு முறைடு (Muride) எனப் பெயரிட்டார் . இலத்தீன் மொழியில் முறியா என்றால் உவர் நீர் எனப் பொருள் . அறை வெப்ப நிலையில் நீர்ம நிலையில் இருக்கும் ஒரே அலோகம் புரோமினாகும். பின்னர் வேதியியலார் இதற்கு கிரேக்க மொழியில் கவிச்சி நாற்றமுடைய
என்ற பொருள்படும் புரோமோஸ் என்ற சொல்லிலிருந்து புரோமின் என்ற பெயரைத் தேர்வு செய்தனர். தனிம புரோமின் வினையில் தீவிரமாக
இருப்பதால் இயற்கையில் தனித்துக் காணப்படுவதில்லை பொதுவாக உப்புக்களில் கூட்டுப்பொருளாக
இணைத்திருக்கின்றது. கடலில் குளோரினை விட புரோமின் 300 மடங்கு குறைவாக உள்ளது.
பண்புகள்
இதன் அணுவெண் 35 அணு நிறை 79. . கருங்சிவப்பு நிறமான இதன் அடர்த்தி 3120 கிகி /க.மீ . உருகு நிலை 265 85 K கொதிநிலை 331 .4 K ஆக உள்ளன . அறை வெப்பநிலையிலேயே ஆவியாகி பழுப்பு நிற ஆவியாக வெளியேறுகின்றது புரோமின் வளிமம் காற்றை விட அடர்த்தி மிக்கது என்பதால் இது வளி மண்டலத்தில் புவிப்பரப்பை ஒட்டிய அடி நிலையில் நிலைகொள்கின்றது . வேதியல் குறியீடு Br . ஹாலஜன் குடும்பத்தில் மூன்றாவது நிறை மிக்க தனிமமாகும். இதன் வேதியல் பண்புகள் ஏறக்குறைய குளோரின் மற்றும் ஐயோடின் இவைகளுக்கு இடைப்பட்டதாக இருக்கின்றது.
உடல்நலத்திற்கு ஊறு விளைவிக்கும் வேதிப் பொருட்களுள் புரோமினும் ஒன்று,. குளோரின் போல இதன் ஆவி உடனடியாக மூக்கையும் , தொண்டையையும் பாதிக்கின்றது கண்ணில் எரிச்சல் ஏற்படுகின்றது.தோலில் பட்டால் மஞ்சள் நிறத்தில் தீச்சுட்ட புண்னை ஏற்படுத்துகின்றது . இது போன்ற விபத்திற்கு ,அவ்விடத்தை உடனடியாக தூய நீரால் கழுவி சோடியம் பை கார்பனேட்டு கரைசலால் சுத்தப்படுத்தி பின்னர் வாசிலின் தடவி புற ஊடகத் தடுப்பானாக ஒரு கவசக் காப்பை ஏற்படுத்திக் கொள்ளவேண்டும்
புரோமின் ஓரளவு நீரில் கரைந்து புரோமின் நீரை (bromine water) உண்டாக்குகின்றது . இது குளோரின் நீர் போலன்றி நிலையாக இருக்கின்றது .கார்பன் டை சல்பைடு ,குளோரோபாம்
போன்றவற்றில் உடனடியாகக் கரைந்து ஆரஞ்சு-சிவப்பு நிற நீர்மத்தை உண்டாக்குகின்றது
குளோரின் போல புரோமினும் வினையூக்கமிக்க தனிமமாகும் .பல தனிமங்களுடன் இணைந்து புரோமைட்டை உண்டாக்குகின்றது .பாஸ்பரஸ் ,பொட்டாசியம் புரோமின் ஆவியில் வெடிப்புடன் எரிகின்றன. பொடி செய்யப்பட்ட ஆர்செனிக் மற்றும் ஆண்டிமோனி வெடிப்புடன் எரிகின்றன .சூடு படுத்திய நிலையில் ஹைட்ரஜனும் புரோமினும் இணைகின்றன. புரோமின் ஒரு வலுவான வெளுப்பூட்டியாகும் . அதனால் ஸ்டார்ச்சை மஞ்சள் நிறமாக நிறமாற்றம் செய்கின்றது. இது ஆக்சிஜனேற்றம் செய்யும் காரணியாகவும் விளங்குகின்றது.
பயன்கள்
புரோமினின் முக்கியமான பயன் எத்திலீன் டை புரோமைடு ஆகும் இதை ஈதைல் பெட்ரோலில் கலந்து அதிலுள்ள ஈயத்தை ஈய புரோமைடாக ஆவியாக்கி வெளியேற்றுகின்றார்கள். இப்படிச் செய்யாவிட்டால் பொறித் தக்கையில் படிந்து அதனை விரைவில் செயலிழக்கச் செய்துவிடும் . இது தொற்றுத் தடை மருந்தாகவும் பயன்படுகின்றது. புகை உண்டாக்கியாகவும். நீர் சுத்திகரிப்பு முறையில் கிருமி நாசினியாகவும் .சாயம், மருந்துப் பொருட்கள் , ஒளிப்படத் தொழிலுக்குத் தேவையான வெள்ளி புரோமைடு போன்ற வேதிப் பொருட்களைத் தயாரிக்க புரோமின்
நன்மை அளிக்கின்றது. விளை நிலங்களில் பயிரினங்களுக்கு புரோமின் கூட்டுப் பொருட்கள் ஒரு
பூச்சி கொல்லி மருந்தாகப் பயன்படுகின்றது.நீச்சல் குளத்தில் பாக்டீரியா கிருமிகளைக் கொல்ல புரோமின் பயன்படுகின்றது குளோரின் போலன்றி புரோமின் நிலைத்து நின்று செயல்படுகின்றது
பொட்டாசியம் புரோமைடு மயக்க மூட்டியாகப் பயன்படுத்தப் படுகின்றது எனினும்
இன்றைக்கு குளோரல்
ஹைட்ரேட் (chloral hydrate ) மற்றும் பார்ப்பிச்சுரேட்டுகள் (barbiturates ) மாற்றுப் பொருளாகப் பயனில் இருக்கின்றன. வளி மண்டல அழுத்தத்தைவிட 55 GPa வளி
அழுத்தத்தில் புரோமின் உலோகமாக நிலை மாறுகின்றது
இயற்கை புரோமினில் 79 , 81 அணு நிறைமங்கள்
மட்டுமே உள்ளன. இதில் Br 79 - 51 % யும் Br 81-
49 % யும் செழுமைக்குப் பங்களிப்புச் செய்கின்றன. இவை அணுக்கரு காந்த ஒத்ததிர்வு மூலம் ஸ்கேன் செய்யும்
நடைமுறையில் பயன்படுத்த அனுகூலமுள்ளதாக இருக்கின்றன . உலோகங்களை புரோமினேற்றம் செய்துவிட்டால்
அவை குளோரினேற்றத்தால் ஏற்படுவதை விட தாழ்ந்த
ஆக்சிகரண நிலையில் இருக்கின்றன.
புரோமின் கூட்டுப்
பொருள் எரிக்கப்படும் போது ஹைட்ரோ புரோமிக் அமிலம் உற்பத்தி செய்யப்படுகின்றது இது
தீயின் ஆக்ஸிகரண வழி முறையில் தடையை ஏற்படுத்தி தீயை மட்டுப்படுத்துகிறது பாலிமர் , நெகிழ்மம் போன்ற உற்பத்திப் பொருட்களைத்
தயாரிக்கும் வழிமுறையில் புரோமின் பயன்படுகின்றது. நீர் மூழ்கிக் கப்பல், விமானம்
, விண் கலம் போன்ற புறத்தொடர்பற்ற தனித்த அமைப்புகளில்
தீயணைப்புப் பொருளாக பயன்படுகின்றது
புரோமின் நீர் என்பது ஈரணு புரோமின் ஆகும். (Br2) மிகவும் வலுவான ஆக்ஜிசனேற்றியாகும் இது வேதியல் ஆய்வுகளில் புரோமினோடு வினைபுரிய வல்ல வேதிப்பொருட்களை இனமறியப் பயன்படுகின்றது
