kavithai-3

  குறிக்கோளின்றி பிரபஞ்ச வெளியில்

சுற்றித் திரிந்த கரும் பொருளொன்று  

உலகிலோர் உயிரினமாய்  பிறக்கவேண்டுமென்று   

ஒருநாள் இறைவனிடம் கெஞ்சிக் கேட்டது  

 

ஓரறிவு , ஈரறிவு   ,மூவறிவு போதுமா  ,

நாலறிவு,ஐந்தறிவு,ஆறறிவு  வேண்டுமா? .

அறிவிற்கும் பிறப்பிற்கும் என்ன தொடர்பு

அடியேனுக்கு விளக்கம் வேண்டுமே

 

மெய்யுணர்வு மட்டும் என்றால் ஓரறிவு

புல்லாய் பிறந்து உணவாய் மடிவாய்

உலகைச் சுற்றிப்பார்க்க உனக்கு வழியில்லை

பிறப்புமுதல் இறப்புவரை ஒரே இடம்

 

மெய்யுணர்வோடு சுவையும் சேர்ந்தால் ஈறறிவு

சிப்பியாகப் பிறந்து முத்தாய் இறப்பாய்

ஊர்ந்து ஊர்ந்து உலகைச் சுற்றிவர

ஒருவர்க்கு ஒரு பிறப்பு  போதாது

 

இவற்றோடு மோப்பமும் இணைந்தால் மூவறிவு

எறும்பாய் பிறந்து கூட்டமாய் அழிவாய்

உயிர் உடலைவிட்டுப் பிரியும் வரை

உழைப்பதைத் தவிர சுகமொன்றும் இல்லை

 

காணும் திறனும் கூடினால் நாலறிவு

நண்டாய்ப் பிறந்து நாரைக்கு உணவாவாய்

தேனீயாய்ப் பிறந்து  சுறுசுறுப்பாய்ச்  சுற்றினாலும்

தேடித் சேர்த்த தேனுக்குச் சொந்தமில்லை

 

செவியுணர்வும் சேர்ந்துக்கொண்டால் ஐயறிவு

விலங்காய்ப் பிறந்து விரும்பிய இடம் போகலாம்

விரைந்து பறக்க பறவையாய்ப் பிறக்கலாம் .

இனப்பெருக்கம்  மட்டுமே  இல்வாழ்க்கை   

 

பகுத்தறிவும் பங்குகொண்டால்  ஆறறிவு

மனிதனாய்ப் பிறந்து   மனம்போல வாழலாம்                    

குறையறிவு கொண்டோரை அடக்கி  ஆளாமல்

நிறையறிவால் பகுத்து வாழ்வதே சிறப்பு

 ஆணும்  பெண்ணும் சமம் ஒருவர்க்கொருவர் தாழ்ந்தவரில்லை . சட்டத்திற்கும் எல்லோரும் சமம் . ஏழைகளுக்கு ஒரு சட்டம் பணக்காரர்களுக்கு ஒரு சட்டம் என்றில்லை. மக்களுக்கு ஒரு சட்டம் ,மக்களவை உறுப்பினருக்கு ஒரு சட்டம் என்றில்லை .சட்டம் சரியாக இருந்தாலும் அதை நிர்வகிப்போர் தவறாகப் பயன்படுத்துகின்றார்கள். மக்களிடம் தவறு செய்யும் நபர்களை யாராக இருந்தாலும் தண்டிக்கும் சட்ட ரீதியிலான அதிகாரம் அல்லது  கூட்டணி வலிமை இல்லை. 

 ஆதாரமே இல்லாமல் ஊழல் புரியும் நுட்பத்தில் கைதேர்ந்தவர்களாக இன்றைய அரசியல்வாதிகள் மாறிவருகின்றார்கள். இதற்கு  ஓட்டுப் போட்ட மக்கள் மட்டுமே காரணம் என்று கூறிவிடமுடியாது.  ஜனநாயக ஆட்சி முறையில் அளவில்லா அதிகாரம் ஒருவரிடம் மட்டுமே இருக்கக்கூடாது. கட்சிக்கும் ஆட்சிக்கும் சுய விளம்பரம் இருக்கக்கூடாது .அல்லது அவை ஒரு வரம்பிற்கு உட்பட்டிருக்கவேண்டும் . நீதித்துறையை யும் காவல் துறையையும்   தூய்மைப்படுத்தவேண்டும் .இலவசங்களால் நாட்டில் உற்பத்தி யைப் பெருக்கவேமுடியாது. .மக்கள் உழைப்பும் இல்லாமற் போகும் . மேலும் மேலும் அரசின் இலவசத்தை நம்பியே வாழும் சூழல் ஏற்படும். அதுமட்டுமல்ல பிற்காலத்தில் இலவச த்தை  நிறுத்தவே முடியாது . அரசியல் ஞானிகளே மக்களுக்கான அரசியல் சட்டங்களை த் திருத்தி அமையுங்கள் . ஆட்சியாளர்களின் உல்லாச வாழ்க்கையை மட்டுப்படுத்துங்கள் . 

kavithai-2

 இருள் சூழ்ந்திருந்தால் கண்களுக்கு வேலையில்லை 

ஒளியே கண்களுக்கு மொழி 

மௌனமே மொழியானால் காதுகளுக்கு வேலையில்லை 

ஒலியே காதுகளுக்கு மொழி 

நீரே உணவானால் நாக்கிற்கு வேலையில்லை

சுவையே நாக்கிற்கு மொழி  

ஓய்வே வாழ்க்கையானால் கைகளுக்கு வேலையில்லை 

உழைப்பே கைகளுக்கு மொழி 

kavithai

 ஒவ்வொருநாளும் விடியும் காலைப்பொழுது 

அன்று ஏனோ விடியவே விடியவில்லை

இறைவன் தூங்கிவிட்டானா இல்லை

இயற்கையின் புதிய விளையாட்டா .

தம்பி நீ விழித்துவிட்டாய் ஆனால் 

உன்மனம் இன்னும் விழிக்கவேயில்லை 

உலகிற்கு ஒளி ஊட்டும் சூரியனை 

ஒரு சின்ன வடிவமே மறைத்துவிடும்

உன் மனம் அதுபோல உறங்கிவிட்டால்    

உணர்வுகளும் புதிர் காட்டும்  

 போலித்தனமான வாக்குறுதிகளால் மக்களை நம்பவைத்து அப்புறம் ஏமாற்றுகிறார்கள் . நடித்து மக்களை முட்டாளாக்குகின்றார்கள் .ஆதரவு இருப்பதாகக் காட்டிக்கொள்ள த் தொண்டனாக்கி மக்களை அடிமையாக்குகின்றார்கள் .வரியை உயர்த்தி ,விலைவாசியை உயர்த்தி மக்களை ஏழையாக்குகின்றார்கள் . இலவசங்களுக்காக அலையும் பிச்சையாக்குகின்றார்கள் . இருட்டுக் குகையில் விடியலைத் தேடி அடைப்பட்டிருக்கின்றோம்.

 அரசியல்வாதிகளும் ஆட்சியாளர்களும் மக்களுக்கு ச் சேவை செய்வதாகக் கூறிக்கொண்டு  அரசின் நிதியை கொஞ்சம் கொஞ்சமாக த் தனதாக்கிக்கொண்டுவிடுவதை வழக்கமாகக் கொண்டுள்ளார்கள் .இது மக்களுக்கு அவர்கள் செய்யும் நம்பிக்கைத் துரோகம் .குற்றச் செயல்களை மறைவொழுக்கமாகச் செய்கின்றார்கள் . தவறான வழிகளில் ஈட்டும் பணத்தில் கொஞ்சம் அரசு அதிகாரிகளுக்கும் கொடுத்து கூட்டணி யை ஏற்படுத்திக்கொண்டு குற்றச் செயல்கள் வெளியே தெரியாமல் புதைத்து விடுகின்றார்கள் . ஊழலில்  லஞ்சம் வாங்கி அவர்களுக்கு இவர்கள்  அடிமைகளாக  வாழ்கின்றார்கள் .  

பாவப்பட்ட பணத்தை வாங்கிக்கொண்டு அவர்களுக்காக இவர்கள் வேலை செய்தால் அந்தப் பாவம் காலங் கடந்து இவர்களையும் பாதிக்கும் . இவர்களுடைய  பிள்ளைகள் ஒழுக்கமின்றி வளர்வார்கள் . வருங்காலத்தில் இளைய தலைமுறையினர் எல்லோரும் ஒழுக்கமின்றி , ஒரு திறமையுமின்றி ஒருவருக்கொருவர் குறையை மட்டுமே கூறிக்கொண்டு வாழும் போக்கைத்தான் பெறுவார்கள்