vinveliyil ulaa

ஔரிகா(Auriga)

இந்த வட்டார விண்மீன் கூட்டம் பெர்சியசுக்கும் அர்சா மேஜருக்கும் நடுவில் அமைந்துள்ளது.இது குதிரை பூட்டிய தேரின் தேரோட்டியாகக்(Charioteer) கற்பனை செய்யப்பட்டுள்ளது.கிரேக்க புராணத்தின் படி இது ஏதென்ஸ் நாட்டின் அரசனான எரிதொனியஸ்(Erichthonius) என்பவனைக் குறிக்கின்றது.
எனினும் புராணத்தில் அவன் விண்வெளியில் இடம் பெற்றதற்கான விளக்கமில்லை.
நான்கு குதிரைகள் பூட்டிய தேர் வண்டியைக் கண்டுபிடித்தவன் இவன்.இதைப் பயன்படுத்தி சட்ட விரோதமாக ஆட்சி புரிந்து வந்த ஆம்பிக்ட்யோன்(Amphictyon) என்பவனை போரில் வென்று ஏதென்ஸ் நகருக்கு அரசனானான்.நாட்டிற்கு
தன்னை அர்பணித்துக் கொண்டதால் ஜியஸ் கடவுள் அவனைப் பெருமைப் படுத்தும் விதமாக விண்ணில் ஒரு இடம் அளித்ததாக கூறுவார்கள்.

அவன் வலது கையில் ஓர் ஆடும் இடது கையில் அதன் குட்டியும் உள்ளன. இந்த வட்டாரத்தின் பிரகாசமான விண்மீனான காபெல்லலா ஆட்டை அலங்கரிகின்றது. இலத்தீன் மொழியில் காபெல்லா என்றால் பெண் ஆடு இதன் குட்டி சீட்டா மற்றும் ஈட்டா ஔரிகே விண்மீன்களால் கற்பனை செய்யப்பட்டுள்ளது.




ஆல்பா ஔரிகே என்ற காபெல்லா மிகப் பிரகாசமான மஞ்சள் நிறங் கொண்ட தோற்ற ஒளிப்பொலிவெண் 0.09 உடைய ஒரு விண்மீன்.விண்ணில் தெரியும் 6 வது பிரகாசமான விண்மீன்.காபெல்லா பற்றி அதிகம் அறியப்படாத காலத்தில் இது சூரியனின் நகல் என நினைத்தனர்,இதற்குக் காரணம் இதன் நிறமும்,புற வெப்ப நிலையம்,சூரியனைப் போலவே இருந்ததுதான். இந்த ஒற்றுமையைத் தவிர வேறு எந்தப் பண்பும் இணையாக இல்லை. உண்மையில் காபெல்லா சூரியனிலிருந்து முற்றிலும் வேறுபட்ட ஒரு விண்மீன் 42 ஒளி ஆண்டுகள் தொலைவிலுள்ள காபெல்லா உண்மையில் மிக நெருக்கமாக அமைந்துள்ள மஞ்சள் நிறங்கொண்ட இரட்டைப் பெரு விண்மீன்களாகும் இதில் காபெல்லா என்ற முதன்மை விண்மீன்4.2 சூரிய நிறையுடன் சூரியனின் விட்டத்தைப் போல 12 மடங்கு விட்டத்துடன் உள்ளது .சூரியனை விட 8 மடங்கு பிரகாசமிக்கது .காபெல்லா B என்ற துணை விண்மீன் 3.3 சூரிய நிறையுடன் சூரியனின் விட்டத்தைப் போல 7 மடங்கு விட்டத்துடன் சூரியனை விட 50 மடங்கு பிரகாசத்துடன் காணப்படுகின்றது இவ்விரு பெரு விண்மீன்களுக்கும் இடைப்பட்ட தொலைவு ஏறக்குறைய பூமியின் சுற்றுப் பாதையின் ஆரத்திற்குச் சமமானது .இரண்டும் சூரியனைப் போல G வகை விண்மீனாகவும் ஒத்த புறப் பரப்பு வெப்ப நிலையும் பெற்றுள்ளன.
காபெல்லாவில் உள்ள இரு விண்மீன்களுக்கும் இடைப்பட்ட கோண இடைவெளியில் 0.05 வினாடிகள் (1 வினாடி என்பது ஒரு டிகிரி கோணத்தில் 3600 ல் ஒரு பங்கு).இது மிகப் பெரிய தொலை நோக்கியின் பகுதிறனின்
வரம்பின் எல்லையில் இருப்பதால் இதைச் சாதாரணமாகப் பகுத்தறிவது கடினம். எனினும் நிறமாலைப் பகுப்பாய்வு ,காபெல்லாவின் இரட்டை விண்மீன்களைத் தெளிவாகச் சுட்டிக் காட்டுகின்றது.நிறமாலையில் காணப்படும் அலைவு கால முறைப்படியான பெயர்ச்சியைக் கொண்டு இதில் ஒரு விண்மீன் மற்றொன்றை
104 நாட்களுக்கு ஒரு முறை சுற்றி வருகின்றது என அறிந்துள்ளனர்.

காபெல்லா ஒரு எக்ஸ் கதிர் மூலமாக உள்ளது,சூரியனின் புறப் பரப்பில் காணப் படுவதைப் போல ஒரு காந்தப் புல இடை வினைகள் இதற்குக் காரணமாக இருக்கலாம் என ஊகித்துள்ளனர். பெரிய வானத் தொலை நோக்கி மூலம் காபெல்லாவை ஆராய்ந்த போது அது நான்கு விண்மீன்களின் தொகுப்பு எனத் தெரிந்தது.பெரு மஞ்சள் இரட்டை விண்மீன்களைச் சுற்றி 0.2 ஒளி ஆண்டுகள் தொலைவில் ஒரு சிறிய சிவப்பு இரட்டை விண்மீன் வலம் வருகிறது. இவற்றின் நிறை முறையே 0.4 சூரிய நிறை, 0.1 சூரிய நிறையாக உள்ளன.

vinveliyil ulaa

துடிப்பு விண்மீன்கள் (தொடர்ச்சி)

தொடக்க காலத்தில் துடிப்பு விண்மீனின் ரேடியோ கதிர்வீச்சை
தொலைவில் உள்ள விண்மீன் குடும்பத்திலுள்ள ஒரு கோளில்
வாழும் உயர் வகை உயிரினங்களால் செலுத்தப்படும் சமிக்கை
அலைகள் என நினைத்தனர். பின்னர் அது தவறு என உறுதி
செய்யப் பட்டது .நண்டு வடிவ நெபுலாவின் மையத்தில்
கண்டறியப்பட்ட ஒரு துடிப்பு விண்மீன் இதற்கு காரணமாக
அமைந்தது. இது மிக விரைவாக ,ஒரு வினாடியில்
3o ல் ஒரு பங்கு நேரத்தில் துல்லியமான சுற்றுக்கால முறைப்படி
மாறிமாறி ஒளிரக்கூடியது. இதுவே மிக விரைவாக மாறிமாறி
ஒளிரும் துடிப்பு விண்மீனாகும்.ஒரு விண்மீன் இப்படி குறுகிய
அலைவு காலத்தில் அதாவது விரைந்து மாறிமாறி ஒளிர
வேண்டுமானால்,அவ் விண்மீன் அதே விரைவில் தற்சுழல
வேண்டும் .சிதைவுறாமல் ஒரு வினாடியில் 30 முறை தற்சுழல
நியூட்ரான் விண்மீனால் இயலும் என்பதால் ( எல்லாம்
இல்லாவிட்டாலும் குறுகிய அலைவு காலமுடைய) துடிப்பு
விண்மீன்கள் நியூட்ரான் விண்மீன்களாக இருக்க வேண்டும்
என்று முடிவு செய்யலாம்.

மேலும் துடிப்பு விண்மீன்கள் முதலில் ரேடியோ அலைநீள
நெடுக்கையில் கண்டறியப்பட்டாலும் ,வேறு சில துடிப்பு
விண்மீன்களில் துடிப்பலைகள் பிற அலைநீள நெடுக்கையிலும்
அறியப்பட்டன. நண்டு வடிவ நெபுலாவில் கட்புலணுணர்
அலைநீள ஒளியோடு காட்சி தரும் துடிப்பு விண்மீன்
தன் துடிப்பலைகளை எக்ஸ் கதிர்களாக உமிழ்கின்றது.
இவற்றின் அலைவு காலம் மாறாது நிலையாக இருப்பது
போலத் தோன்றினாலும் உண்மையில் நீண்ட கால நெடுக்கையில் இது மெதுவான மாறுதலுக்கு உள்ளாகின்றது. அதாவது அலைவுக் காலம் அதிகரிகின்றது அல்லது அலைவியக்கம் மெதுவாகின்றது. அலைவியக்கம் மெதுவாவதற்கு துடிப்பலைகளை உமிழ்வ தற்குத் தேவையான ஆற்றலை நியூட்ரான் விண்மீன் தன் சுற்றியக்கத்தின்
ஆற்றலிலிருந்து பெறுவதே காரணமாகின்றது. இது துடிப்பு விண்மீன்களின் வயதை நிர்ணயிக்கத் துணை புரிகின்றது.
நண்டு வடிவ நெபுலாவிலுள்ள துடிப்பு விண்மீன்
ஏறக்குறைய 900 ஆண்டுகள் வயதானது என்றும் கண்டறியப்பட்ட
துடிப்பு விண்மீன்களுள் இது மிகவும் இளமையானது என்றும் கூறுகின்றார்கள். ஒரு மில்லியன் ஆண்டுகள் வயதான
சில துடிப்பு விண்மீன்களும் உள்ளன.

இந்த துடிப்பு விண்மீன்கள் ஏன் மாறி மாறி ஒளிர வேண்டும் ?
இது பற்றி முழுமையாக அறிய முடியாவிட்டாலும் இவை மிகவும் செறிவான ,பூமியின் காந்தப் புலத்தைப் போல பல மில்லியன்
மில்லியன் மடங்கு வலுவான காந்தப் புலத்தைப் பெற்றிருக்கின்றன.
என நம்பப் படுகிறது.இக் காந்தப் புலம் துடிப்பலையின் அமைப்பைக் காட்டுப் படுத்துகின்றது எனக்கருதுகின்றார்கள்.
ரேடியோ அலைக்கற்றை ,கட்புலனுணர் ஒளி அல்லது எக்ஸ் கதிர்கள் போன்றவற்றை விண்மீன் தற்சுழலும் போது ,ஒவ்வொரு சுற்றிலும்
ஒரு முறை மட்டுமே நம்மை நோக்கி உமிழ்கிறது. இது பொதுவாக
காந்தப் புல அச்சுக்கு இணையான திசையில் இருக்கின்றது.
நியூட்ரான் விண்மீனைச் சுற்றி சைக்கிள் டியூப்பைப் போல அமைந்து விண்மீனோடு சேர்ந்து தற்சுழலும் பிளாஸ்மாவின்
பரப்பிலிருந்து இக் கதிர்வீச்சுகள் உற்பத்தியாகலாம் என்று
நம்புகிறார்கள் .

பிற விண்மீன்களைப் போல நியூட்ரான் விண்மீனும்
கதிர்வீச்சுக்களை வெளியில் உமிழ்ந்தாலும் இந்த உமிழ்வு எல்லாத்
திசைகளிலும் சமச் சீராக இருப்ப தில்லை .காந்த அச்சுக்கு
இணையாக இருக்கும் பகுதிகளிலிருந்தே உமிழ்வைச்
செய்கின்றன. இந்த உமிழ்வுத் திசை பூமியை நோக்கி இருக்கும்
போது மட்டுமே நமது ரேடியோ தொலை நோக்கிகள் அவற்றை உட்கவர்ந்து தெரிவிக்கின்றன.ரேடியோ அதிர்வெண்
நெடுக்கையிலுள்ள துடிப்பு விண்மீன்கள் ஒரு குறிப்பிட்ட
அதிர்வெண் நெடுக்கையில் (108 - 1010 ஹெர்ட் ஸ்) மட்டுமே கானப்படுகின்ப்றன. மேலும் இதன் காந்தப் புலச் செறிவு
அதிர்வெண்ணுக்கு ஏற்ப குறைகிறது .

துடிப்பு விண்மீன்கள் உடனழிவு விண்மீனின் (super nova )
எச்சமாக இருக்கலாம் என்று ஆராய்ச்சி யாளர்கள் கருதுகின்றார்கள். நண்டு வடிவ நெபுலாவில் கண்ட துடிப்பு விண்மீன்களைப் போல வேலா வட்டார விண்மீன் கூட்டத்தில் ஒரு துடிப்பு




விண்மீனை உடனழிவு விண்மீனின் எச்சமாகக் கண்டறிந்தனர்,
1982 ல் பெக்கர் (D .C . Becker ) மற்றும் அவரது கூட்டாளிகள்
வுல்பி குலா வட்டார விண்மீன் கூட்டத்தில் 1 .6 மில்லி செகண்டு
அலைவு காலமுடைய துடிப்பு விண்மீனைக் கண்டறிந்தனர்.

vinveliyil ulaa

துடிப்பு விண்மீன்கள் (Pulsars)

கட்புலனுணர் ஒளியைக்கொண்டு விண்மீன்களை ஆராய்ந்த போது
பேரண்டத்தின் கட்டமைப்பு மற்றும் தோற்றம்,வளர்ச்சி பற்றிய முழு
விவரங்கள் தெரியாமலிருந்தது.அனுமானங்களின் அடிப்படையிலேயே கருத்துக்களை சொல்லி வந்தனர்.மின்காந்த அலைத்தொகுப்பிலுள்ள
கட்புலனுணரா ஒளியைக் கொண்டும் வானத்தை ஆராயலாம் என்பதைத்
தெரிந்து கொண்டவுடன் இத்துறையில் மகத்தான வளர்ச்சி
முடுக்கப்பட்டது.அண்மைக் காலங்களில் எக்ஸ் கதிர்,காமாக் கதிர்,
நுண் அலைகள்(Microwave),அகச்சிவப்புக் கதிர்,புறஊதாக் கதிர் போன்ற அலைகளில் விண்வெளியையும் விண்மீன்களையும் ஆராயும் வானவியல் முறைகள் வளர்ச்சி பெற்றன.இவற்றை பூமியின் வளி மண்டலத்திற்கு அப்பாற்பட்ட உயரங்களிலிருந்து கொண்டே செய்ய முடிகிறது.முதலில் பலூன்கள் மூலமாகவும்,பின்னர் செயற்கைக் கோள்கள் மூலமாகவும்,
தற்போது விண்வெளி ஆய்வுக் கூடங்கள் மூலமாகவும் இதை
வெற்றிகரமாகச் செய்து வருகின்றார்கள் இந்த ஆய்வுகள் நாம் சிறிதும் எதிர்பாராத ,பேரண்டம் பற்றிய பல உண்மைகளைத் தெரியப்படுத்தியிருக்கின்றன.

ரேடியோ அலைகள் அல்லது நுண் அலைகள் என்பன ரேடார் மற்றும்
வானொலி நிலையங்களில் பயன்படுகின்றன என்பதை நாம் அறிவோம்.
இது அகச் சிவப்புக் கதிர்களை விட அலைநீளம் மிக்கவை.
இவற்றின் அலைநீளம் ஒரு மில்லி மீட்டரிலிருந்து நூறு மீட்டர் வரை
நீண்ட நெடுக்கையில் உள்ளது.ரேடியோ வானவியல் 1960-70 ல் மூன்று முக்கிய கண்டுபிடிப்புகளுக்குக் காரணமாக அமைந்தது.முதலாவது
குவாசார்(Quasar) என்ற மிகவும் பிரகாசமும்,ஆற்றல் உமிழும் திறனும்
கொண்ட ஆனால் சிறிய உருவ அளவு உடைய விண்ணுறுப்பாகும்.
இரண்டாவது அண்ட வெளியில் எங்கு திரும்பினாலும் ஒலிக்கும் பின்புலக் கதிர்வீச்சு (Background radiation),மூன்றாவது துடிப்பு விண்மீனாகும்.
இது செறிவான ரேடியோ அலைகளை விட்டுவிட்டு உமிழும் மூலமாக
உள்ளது.இதன் ஒளிர் திறன் மாறி மாறி ஒளிர்வதால் இது மாறொளிர் விண்மீன்களில்(Variable star) ஒரு வகையாகும்.

1967 -68 ல் கேம்ப்ரிட்ஜ் பலகலைக் கழகத்தின் முல்லார்டு ரேடியோ வானவியல் ஆய்வுக் கூடத்தைச் சேர்ந்த ஆண்டனி ஹிவிஷ்(A.Hewish)
மற்றும் ஜோசிலின் பெல்(J.C.Bell)என்பாரால் துடிப்பு விண்மீன்கள்
முதன் முதலில் இனமறியப்பட்டன.இன்றைக்கு விண்வெளியில் 500
க்கும் மேற்பட்ட துடிப்பு விண்மீன்களைக் கண்டறிந்துள்ளனர். நம் பால்
வெளி மண்டலத்தில் குறைந்தது பல்லாயிரக் கணக்கில் துடிப்பு
விண்மீன்கள் இருக்கலாம் என்று கணித்துள்ளனர்.வெகு தொலைவில் இருப்பதால் இன்றைக்கு நம்மிடம் உள்ள பயனுறுதிறன் மிக்க ரேடியோ
தொலை நோக்கிகளினாலும் இவற்றைக் கண்டறிவது மிகவும் கடினமாக உள்ளது.பல்சார் என்பதே பல்சேட்டிங் ரேடியோ சோர்சஸ் என்பதின் முதலெழுத்துச் சுருக்கமாகும்.

துடிப்பு விண்மீன்களின் ஒளிச் செறிவு ஒரு காலச் சுற்று முறையில்
மாறிமாறிக் காணப்படுகிறது இம் மாற்றமும் சீர்மை யுடையதாக
இருக்கின்றது. அதாவது ஒளிச் செறிவின் ஏற்றத் தாழ்வுகளுக்கு
இடைப்பட்ட காலம் ஒரு துடிப்பு விண்மீனுக்கு ஒரு நீண்ட கால
நெடுக்கையில் மாறாததாக இருக்கின்றது. ரேடியோ தொலை
நோக்கியால் பெறப்பட்ட ஒரு துடிப்பு விண்மீனின் ஒளிச் செறிவு மாற்றம் படத்தில் காட்டப் பட்டுள்ளது.

இது துடிப்பு விண்மீன்களின் ஒளிச்செறிவு ஒரே சீராக இல்லாது,
அடுத்தடுத்து பெருமங்களையும் சிறுமங்களையும் கொண்டதாகவும்
இருக்கிறது எனக் காட்டுகின்றது.இருப்பினும் அடுத்தடுத்து
வரும் பெருமங்கள் அல்லது சிறுமங்களுக்குக் இடைப்பட்ட காலம்
மாறாததாக இருகின்றது.மேலும் துடிப்பலைகள் அலைவீச்சு
amplitude)சீரான மாற்றத்திற்கு உட்பட்டிருக்கின்றது. காலத்தை மேலும் துல்லியமாகப் பகுத்து இவற்றில் ஏற்படும் மாற்றங்களை கவனித்தால்,
அவை ஒவ்வொன்றும் ஓரளவு அகன்ற அதிர்வெண் நெடுக்கைக் குட்பட்ட ரேடியோ அலைகளாக இருப்பதும் தெரிய வந்தது.அதாவது
ஒவ்வொரு ரேடியோ அலையும் அடுத்தடுத்த பல அதிர்வெண் கொண்ட அலைகளின் சேர்க்கையாக இருக்கின்றது.

துடிப்பு விண்மீன்கள் உமிழும் துடிப்பலைகளை நுட்பமாக ஆராய்ந்த
போது ஒரு துடிப்பலை வந்து சேரும் காலம் வெவ்வேறு அதிர்வெண் அலைகளுக்கு வெவ்வேறாக இருப்பது தெரிய வந்தது.
தாழ்ந்த அதிர்வெண் கொண்ட துடிப்பலைகள் உயர்அதிர்வெண் கொண்டவைகளைவிடத் தாமதமாக வந்து சேருவதால் அவற்றின்
கட்டமைப்பு அப்படி அமைந்திருந்தது.இதற்குக் காரணம் விண்மீனிடை
ஊடக வெளியில் விரவியுள்ள பிளாஸ்மாவில் இந்த ரேடியோ அலைகள் ஊடுருவிச் செல்லும் போது பரவுதல் வேகம் வெவேறு அதிர்வெண் அலைகளுக்கு வெவ்வேறானதாக இருப்பதுதான்.பிளாஸ்மாவின் இப்
பண்பின் அடிப்படையில் துடிப்பு விண்மீனின் தொலைவை ஓரளவு
தோராயமாக மதிப்பிடும் வழிமுறையை ஹிவிசும் பெல்லும்
தெரிவித்துள்ளனர். இதன் மூலம் அவர்கள் கண்டுபிடித்த முதல் துடிப்பு விண்மீன் பால் வெளி மண்டலத்திற்குள் இருப்பது
உறுதி செய்யப்பட்டது. மேலும் இது போன்று வேறு சில விண்ணுறுப்புக்களையும் அடுத்தடுத்து பலராலும் கண்டுபிடிக்கப்பட்டதால்,
இது இயல்பானது என்றும் நிறுவினார்கள்

இதன் கதிர்வீச்சுடன் தொடர்புடைய குறுகியகால அளவு முறைகள்,
இந்த விண்ணுருப்பு அளவில் மிகச் சிறியதாக இருக்க வேண்டும் எனச்
சுட்டிக் காட்டுகின்றன.அதாவது ஒரு துடிப்பு விண்மீனின் பரிமாணம்
பூமியைக் காட்டிலும் சிறியதாக இருக்கும் எனலாம்.
இல்லாவிட்டால் அவவிண்மீனின் வெவ்வேறு பகுதிகளிலிருந்து வரும் ஒளி,மேற்பொருந்தி குறுகிய துடிப்பலைகளைத் தனித்து அறியமுடியாதபடி அழித்துவிடும்.மிக அதிக அளவில் ஆற்றல் வெளியிடும் துடிப்பலைகளின் அலைவுக் காலம் மாறாது நிலைத்திருப்பதும்,துடிப்பு விண்மீன்கள்
சூரியனை விடக் கூடுதலான நிறை கொண்டதாக இருக்க வேண்டும்
என்று தெரிவிக்கின்றன.இத்தகைய தன்மைகள் பொதுவாக நியூட்ரான் விண்மீன்களுக்கு உண்டு என்பதால்,துடிப்பு விண்மீன்கள் நியூட்ரான் விண்மீன்களாக இருக்கலாம் என்று கருதுகின்றார்கள். வேறு சிலர்
அவை சிறு வெள்ளை விண்மீன்களாக இருக்கலாம் என்று கூறுகின்றார்கள்.

vinveliyil ulaa

நண்டு வடிவ நெபுலாவும் துடிப்பு விண்மீனும்

நண்டு வடிவ நெபுலாவில் உள்ள துடிப்பு விண்மீன் மிக விரைவாகத் துடிக்கும் விண்மீன்களுள் ஒன்றாகும்.இதன் மினுமினுப்பு 1/30 வினாடி என்ற அலைவு காலத்துடன் உள்ளது.துடிப்பின் இந்த விரைவான அலைவு
காலம் ,துடிக்கும் விண்மீன் பெற்றிருக்கும் இயல்புகளைப் பற்றித்
தெரிவிக்கக் கூடியதாக இருக்கின்றது .சீரான கால இடைவெளியுடன்
ஆன துடிப்பலை விரைவாகத் தற்சுழலும் விண்ணுறுப்பிலிருந்தே வர முடியும் .மேலும் வெடித்துச் சிதறாது வினாடிக்கு 30 முறையென விரைவாகத் தற்சுழலும் ஒரே விண்ணுறுப்பு நியூட்ரான் விண்மீனாகும்
neutron star).நியூட்ரான் விண்மீன் என்பது வெறும் நியூட்ரான்களால் ஆனது.


முதல் துடிப்பு விண்மீன் ரேடியோ அலை நீள நெடுக்கையில் இனமறியப் பட்டாலும் ,வேறு சில துடிப்பு விண்மீன்களில்,துடிப்பலைகளை வேறு அலை நீள நெடுக்கையிலும் காண முடிந்ததது.நண்டு வடிவ நெபுலா,கட்புலனறி அலைநீள நெடுக்கையில் இனமறியப்பட்ட,எக்ஸ் கதிரால் துடிப்பலை கொண்ட முதலாவது துடிப்பு மூலமாகும்.துடிப்பின் அலைவு நேரம் மாறாதிருப்பது போலத் தோன்றினாலும் ,நீண்ட காலப் போக்கில்,அதில் நுண்ணிய அளவு மாற்றம் ஏற்பட்டு தாமதப்படுகின்றது.துடிப்பலைகளை உருவாக்கத்
தேவையான ஆற்றல் சுழற்சி இயக்கத்திலிருந்தே
பெறுவதால் தற்சுழலும் நியூட்ரான் விண்மீனின் தற்சுழற்சி இயக்கம் காலப்போக்கில் மெதுவாகி விடுவதால்,இந்தத் தாமதம் விளைகிறது .
நண்டு வடிவ நெபுலாவி லுள்ள துடிப்பு விண்மீன் ஏறக் குறைய 900
ஆண்டுகள் பழமையானது .இது உண்மையில் எல்லாத் துடிப்பு விண்மீன்களுள்ளும் இளமையானது .ஒரு சில துடிப்பு விண்மீன்கள் பல மில்லியன் ஆண்டுகள் வயதானவைகளாக இருக்கின்றன.

நண்டுவடிவ நெபுலா விண்வெளியில் காணப்படும் பிறவற்றிலிருந்து இரு விதங்களில் மாறுபட்டதாக இருக்கின்றது.முதலாவது அதன் முந்தைய நிலையை பல ஆண்டுகளுக்கு முன்பும் ,சில காலஇடைவெளியில் விட்டுவிட்டு பல முறையும் எடுக்கப்பட்ட ஒளிப் படங்கள் ,அந்த நெபுலாவிலுள்ள துகள் எல்லாம்,ஏறக்குறைய 1300 கிமீ /வி என்ற வேகத்தில்
எல்லாத் திசைகளிலும் விரிவடைந்து சென்று கொண்டே இருக்கிறன என்பதைத் தெரிவித் துள்ளன .இது பிற நெபுலாக்களில் இருப்பதைவிட நூறு மடங்கு அதிகமானது .இதனால் நண்டு வடிவ நெபுலாவின் அடர்த்தி காலத்தால் மெதுவாகக் குறைந்து கொண்டே வருகிறது. இது விரிவாக்கத்தின் விளைவாகும் .இதன் விட்டம் சற்றேறக் குறைய 6 ஒளி ஆண்டுகளாகும் .
இரண்டாவது இதன் நிறமாலை,பிற நெபுலாக்கள் போல தொடர் நிறமாலையாக இருப்பினும்,அதில் பிரகாசமான அகன்ற இரட்டை வரிகளும் மேற் பொருந்தி இருக்கின்றன.இது நெபுலாவின் விரிவாக்கத்தை உறுதிப் படுத்துவதுடன்
அதில் ஹைட்ரஜன் மிகவும் குறைவாக இருப்பதையும்
தெரிவித்துள்ளது. நெபுலாவின் நேர்கோட்டுத் திசை வேகத்தையும் ,
கோணத் திசை வேகத்தையும் ஒப்பிட்டு அதன் தொலைவை 6500 ஒளி ஆண்டுகள் என மதிப் பிட்டுள்ளனர். நெபுலாவின் மையத்திலுள்ள
இரட்டை விண்மீனின் ஒளிர்திறனை மதிப்பிட இது துணை புரிகிறது.

இதன் விரிவாக்க வேகத்தைக் கொண்டு ,இது விரிவடையும் முன் எங்கிருந்து தொடங்கி இருக்கும் என்பதை ஒருவாறு கணக்கிட முடியும். நண்டு வடிவ நெபுலாவின் மையத்திலுள்ள இரு விண்மீன்களிலிருந்து
இந்த விரிவாக்கம் சுமார் 800 -900 ஆண்டுகளுக்கு முன்னர் தொடங்கி இருக்க வேண்டும் என்பதை இது தெரிவிந்துள்ளது. இது 1054 AD யில் சீன வானவியலாரால் இனமறியப்பட்ட பிரகாசமான
விண்மீனைச் சுட்டிக் காட்டுவதாக உள்ளது.இதனால் நண்டு வடிவ நெபுலாவும்,அதன் மையத்திலுள்ள இரு விண்மீன்களும் சூப்பர் நோவா
(Super Nova) வின் எச்சம் என்று கருதப்படுகிறது.இதிலுள்ள ஒரு
சிறிய வடிவ விண்மீன் நியூட்ரான் விண்மீனாக இருக்கலாம் என்று வால்டர் பாடே(Walter Baade)என்பார் தெரிவித்த பொழுது 1968 வரை பலர் இதை மறுத்தனர். ஆனால் நண்டு வடிவ நெபுலாவின்
கதிர் வீச்சு மையம் ,வால்டர் பாடே குறிப்பிட்டுச் சொன்ன இடமாக இருந்தது .அதன் பிறகே கொள்கை
அளவில் இருந்து வந்த நியூட்ரான் விண்மீ னுக்கு சரியான எடுத்துக் காட்டு கிடைத்தது .

vinveliyil ulaa

சூரியன் தன் மூலப் பொருட்களை புறப் பரப்பிலிருந்து சீராக வெளியே
உமிழ்கிறது.ஒளியோடு இதுவும் சூரியக் குடும்பத்தை ஊடுருவிக் கடந்து
செல்கிறது.இதையே சூரியக் காற்று என்று கூறுகிறார்கள் .இதிலுள்ள
அணுக்கள் யாவும் மின் நடுநிலையில் இருப்பதில்லை.சூரியனின்
புறப் பரப்பு வெப்பநிலை 6000 டிகிரி கெல்வின்.இது அணுக்களின் புறக்கூடுகளில் உள்ள எலெக்ட்ரான்களை வெளியேற்றி அயனியாக்குவதற்கு
போதுமானதாக இருக்கிறது. அதாவது சூரியக் காற்று என்பது வெப்பமும் அடர்த்தியும் குறைந்த ஒரு பிளாஸ்மா(Plasma)எனலாம்.சூரியனின்
மையத்தில் வெப்பமும் அடர்த்தியும் மிகுந்த பிளாஸ்மா இருக்கின்றது
சூரியக் காற்றிலுள்ள பிளாஸ்மாவின் அடர்த்தி,அது சூரியனிலிருந்து
விலகிச் செல்லச்செல்ல குறைகிறது.இதனால் ஏற்படும் ஒரு விளைவு
என்னவென்றால்,பிளாஸ்மா வழியாக ஊடுருவிச் செல்லும் ரேடியோ
அலைகளின் செறிவை சிறிய அளவில் மாற்றுவதாகும்.இதனால்
ஒளி மூலம் மினுமினுக்கிறது.இது ஏறக்குறைய விண்மீனின் ஒளி
புவி வளிமண்டலத்தின் பல்வேறு அடுக்குகளை ஊடுருவிச் செல்லும் போது ஏற்படும் சலனத்தால் மினுமினுப்பதை ஒத்தது.ஆனால் சூரியக்
கோள்களின் எதிரொளிப்பு ஒளி புள்ளி மூலத்திலிருந்து வரும் விண்மீனின் ஒளியைப் போலன்றி,ஒரு சிறிய பரப்பிலிருந்து வரும் கற்றையாக
இருப்பதால்,தனியொரு கற்றை சலனப்பட்டாலும்,சராசரி கற்றையில்
அது சமன் செய்யப்பட்டு விடுகிறது.அதனால் கோள்கள் மினு மினுப்பதில்லை .

இதே விதி ,சூரியக் காற்றால் பாதிப்பிற்கு உள்ளாகும் ரேடியோ மூலங்களுக்கும் பொருந்தும்.எனினும் இது ரேடியோ மூலத்தைப் பற்றிக் கூடுதலான விவரங்களையும் அளிக்கக் கூடியதாக இருக்கிறது.
ஏனெனில் ரேடியோ மூலங்கள் சில விண்மீன்கள் போல புள்ளியாகவும்
வேறு சில விரிந்தும் உள்ளன.இதனால் ஆரம்ப காலத்தில் ரேடியோ
அலைகள் புள்ளி மூலத்திலிருந்தா அல்லது விரிந்துள்ள மூலத்திலிருந்தா வருகிறது என்பதைக் கணிப்பது கடினமாக இருந்தது.இப்போது
இது ஓரளவு மட்டுமே எளிமைப்படுத்தப்பட்டுள்ளது.எனினும் மினுமினுக்கும்,அதாவது விட்டுவிட்டு ஒளிர்வன புள்ளி மூலங்களாகவே இருக்கும் என்றும் அப்படி மினுமினுக்காதவை விரிந்துள்ள மூலம்
என்றும் கூறலாம்.இந்த ஆய்வை தொடர்ந்து மேற்கொண்ட போது மினுமினுக்கும் ரேடியோ ஒளி மூலங்கள் எல்லாம் வெகு தொலைவு தள்ளி உள்ளன என்ற உண்மையைத் தெரிந்து கொண்டனர்

1950 களில் ஆண்டனி ஹிவிஷ் ((Anthony Hewish ) என்ற இளம் ரேடியோ வானவியலார்,மினுமினுப்பைக் கொண்டு ரேடியோ மூலங்களின் இயல்பைக் கண்டறியும் முறையில் ஈடுபட்டார்.அதற்காக ஒரு புதிய ரேடியோ தொலை நோக்கி ஒன்றை உருவாக்கினார்.இதன் மூலம் அவருடைய ஆராய்ச்சி மாணவரான ஜோசிலின் பெல்(Jocelyn Bell)என்பார் 1967 ல் முதலாவது
துடிப்பு விண்மீன்களை(Pulsar) கண்டறிந்தார் .இவர் தன்னுடைய ஆராய்ச்சிப் பட்டத்திற்காக ஒரு புதிய ரேடியோ தொலை நோக்கியை வடிவமைத்தார்.இது சற்றேறக் குறைய ஒரு கோப்பை போன்ற வடிவத்தைக் கொண்டிருந்தது.4.5 ஏக்கர் நிலப்பரப்பில் சம இடைவெளியுடன் நிறுவப்பட்ட 2048 ஆண்டனாக்களுடன் இது அமைக்கப்பட்டது.புற வெளியிலிருந்து வரும்
ரேடியோ அலை இரைச்சலின் செறிவில் ஏற்படும் விரைவான ஏற்றத்
தாழ்வுகளை காலதாமதமின்றி உடனே உணரக்கூடியவாறு இருக்க
வேண்டுமானால் மூலங்களின் மினுமினுப்பை ஆராயும் ஒரு ரேடியோ தொலை நோக்கியின் வடிவமைப்பு சிறப்பாக இருக்கவேண்டும்.கட்புலனறி ஒளியால் கண்கள் மினுமினுக்கும் விண்மீனை உணர்கின்றன.ஏனெனில் ஒளிச்
செறிவின் மாற்றத்திற்கு ஏற்ப கண்கள் செயல்படுகின்றன.ஆனால் பல நிமிடங்கள் அல்லது பல மணி நேரம் பதிவுக்கு அனுமதிக்கப்பட்ட ஒளிப்படத் தட்டு இதை உணர்வதில்லை.அதைப் போல நீண்ட நேரத்திற்கு நெடுந் தொலைவிலுள்ள விண்ணுறுப்பிலிருந்து கிடைக்கும் ரேடியோ சமிக்கை அலைகளை ரேடியோ தொலை நோக்கி தொகுத்தளிப்பதால்,அந்த ரேடியோ மூலத்தின் இடத்தை இனமறியப் பயனுள்ளதாக இருக்கிறது .ஜோசிலின் பெல்லின் புதிய ரேடியோ தொலை நோக்கி இதற்கு அனுகூலமாக இருந்தது.சூரியக் காற்றினால் ரேடியோ மூலத்தின் மினுமினுப்பு
உண்டாவதால் இது சூரியன் பூமிக்கு நேர்குத்தான உயரத்தில் இருக்கும்
போது வலுவாகவும் குறிப்பிடும் படியாகவும் இருக்கிறது .
கட்டமைக்கப் பட்ட இந்த ஆண்டனா அணி வகுப்பை நிரந்தரமாகச் செயல்படும் நிலையில் நிறுத்திவைக்க,அது பூமியின் தற்சுழற்சி இயக்கத்தினால்,24 மணி நேரத்திற்கு ஒரு முறை விண்வெளியை ஒரு குறிப்பிட்ட கோணத் திசையில் கண்ணோட்டமிடுகிறது.ஆண்டனா
அணிவகுப்பைத் தக்கவாறு மாற்றி அமைத்துக் கொண்டு வெவ்வேறு
கோணத் திசைகளில் கண்ணோட்டமிடமுடியும் .இது ஒரு நாளில் 30
மீட்டர் நீளமுள்ள சுருள் தாளில் அலைவு முனையால் வரிக் கோடுகளை இட்டு ,அதன் மூலம் ரேடியோ மூலங்களைச் சுட்டிக் காட்டுகிறது .

ரேடியோ அலை
செறிவு

நேரம்


1967 ல் ஆகஸ்ட் 6 -ம் நாளில் பதிவு செய்யப்பட்ட வரைகோட்டுப் படத்தில்,ஏறக் குறைய ஒரு செண்டி மீட்டர் நீளமுள்ள மிக நுண்ணிய அளவு செறிவில் ஏற்றத் தாழ்வுகள் காணப்பட்டன .இது மிகச் சரியாக நடு இரவில் சூரியனுக்கு எதிர்புறத்தில் தொலைநோக்கியால் காணப்பட்ட மங்கலான ஒரு ரேடியோ மூலத்தினால் ஏற்பட்டதாக இருக்கலாம்.இருப்பினும் தொடக்கத்தில் இது பூமியில் மனிதச் செயல்பாட்டின் குறுக்கீட்டினால் ஏற்பட்டிருக்கலாம்
என்று இதற்கு முக்கியத்துவம் அளிக்காது விட்டுவிட்டனர் .
ஆனால் ஒவ்வொரு நாளும் எடுக்கப்பட்ட வரைபடத்தில் ,மிகச் சரியாக அதே இரவு நேரத்தில் இது போன்ற முகடு தோன்றி இருந்தது விண்வெளியில் ஒரு குறிப்பிட்ட இடத்திலிருந்து வரும் ரேடியோ அலைகளே இதற்குக் காரணம் என்பது அப்போது அறியப்பட்டது.இதன் பிறகு இந்த ஏற்றத் தாழ்வுகளை விரைந்த வேகத்தில் பதிவு செய்யக்கூடிய சாதனத்தைக் கொண்டு மேலும் நுட்பமாக ஆராய்ந்தனர்,அப்போது வரைபடத்தில் காணப்பட்ட முகடு உண்மையில் 1.33 வினாடிகள் என்ற அலைவு நேரத்துடன்
செறிவில் ஏற்ற இறக்கம் காட்டும் ஒரு ரேடியோ மூலத்தால் உண்டானது என்பதைத் தெரிந்து கொண்டனர்.
இதனால் துடிப்பு விண்மீன் அல்லது பல்சார் என்ற ஒரு புதிய விண்மீன்
நிலை அறியப்பட்டது.இதன் பிறகு வானவியலார் விண்வெளியில் பல துடிப்பு விண்மீன்களை இனமறிந்தனர்.அதிலொன்றே நண்டு வடிவ
நெபுலாவிற்கு மத்தியில் அமைந்துள்ள துடிப்பு விண்மீனாகும்.

vinveliyil ulaa

டாரெஸ் விண்மீன் கூட்டம்


1936 இல் ஒரு முறை புறக் கூடு உருவான போது பிளியோனின் பிரகாசம் 1938 -1952 இக்கு இடையில் மங்கியது .1972 மற்றொருமுறை புறக்கூடு உருவான போது 1987 வரை பிரகாசம் மங்கியது .இந்த புறக்கூடின் நிறமாலையில் ஏற்படும் மாற்றங்கள் ஒவ்வொரு 17 அல்லது 34 ஆண்டு களுக்கு ஒருமுறை காணப்படுவதால் பிளியோன் ஒரு துணை விண்மீனைப் பெற்று இரட்டை விண்மீனாக இருக்கலாம் என்றும் இது 34 மணி நேரத்திற்கு ஒருமுறை முதன்மை விண்மீனைச் சுற்றி வருகிறது என்றும் கருதுகிறார்கள் .டாரெஸ் வட்டார விண்மீன் கூட்டத்தில் தீட்டா (Θ) டாரி சிக்மா (σ) டாரி கப்பா (κ) டாரி போன்ற ஒளியியல் இரட்டை விண்மீன்களும் லாம்டா (λ) டாரி போன்ற மறைப்பு இரட்டை விண்மீன்களும் உள்ளன .தீட்டா டாரி ,ஹயாடெஸ் தொகுப்பில் அமைந்துள்ள ஓர் அகன்ற இரட்டை விண்மீன் .கூர்ந்து நோக்கினால் இவற்றின் தோற்ற ஒளிப் பொலிவெண் (apparent magnitude) முறையே 3.8 ஆகவும் 3.4 ஆகவும்,ஒன்று பெரிய மஞ்சள் நிற விண்மீனாகவும் மற்றொன்று பெரிய வெள்ளை விண்மீனாகவும்
காட்சி தருகின்றன 158 ஒளி ஆண்டுகள் தொலைவில் உள்ள இவை ஹையடெஸ் தொகுப்பில் உள்ள விண்மீன்களுள் பிரகாசமிக்கதாகும்

லாம்டா டாரி சற்றேறக் குறைய பெர்சியஸ் வட்டார விண்மீன் கூட்டத்திலுள்ள
அல்கோல் போன்று மறைப்பு வகை இரட்டை விண்மீனாகும் . துணை விண்மீன் ,
முதன்மை விண்மீனைச் சுற்றி வரும்போது இடை மறைப்பதால் ,பிரகாசத்தில்
மாற்றம் ஏற்படுகிறது. இதன் தோற்ற ஒளிப் பொலிவெண் 3.4 முதல் 3.9 வரையிலானநெடுக்கையில் நான்கு நாட்கள் அலைவு காலத்துடன் மாறிமாறித் தோன்றுகிறது. இது சுமார் 370 ஒளி ஆண்டுகள் தொலைவில் உள்ளது.

அல்ஹிகா (Alheka ) எனப்படும் சீட்டா(ζ) டாரி தோற்ற ஒளிப் பொலிவெண் 2 .97 உடன் 417 ஒளி ஆண்டுகள் தொலைவிலும், எய்ன் (Ain ) எனப்படும் எப்சிலான் (ε) டாரி தோற்ற ஒளிப் பொலி வெண் 3.53 உடன் 155 ஒளி ஆண்டுகள் தொலைவிலும் சை (ξ) டாரி 3.73 என்ற தோற்ற ஒளிப் பொலிவெண்ணுடன் 222 ஒளி ஆண்டுகள் தொலைவிலும் உள்ளன .இக் கொத்து விண் மீன் கூட்டத்தில் உள்ள அட்லஸ் என்ற விண்மீன் 381 ஒளி ஆண்டுகள் தொலைவில்.தோற்ற ஒளிப் பொலி வெண்
3.62 உடன் பிளியோனுக்கு அருகில் இருக்கிறது.

vinveliyil ulaa

பிளியாடெஸ்

பிளியாடெசின் முக்கிய விண்மீன்களுக்கு கிரேக்க புராணத்தில்
வரும் கதாபாத்திரங்களின் பெயர் சூட்டப்பட்டுள்ளன .அட்லஸ்
மன்னனுக்கும் பிளியோன் என்ற ராணிக்கும் பிறந்த
7 மகள்கள் இதில் வைரமாலையில் உள்ள வைரங்கள் போல
வரிசையாக உள்ள 7 விண்மீன்களைக் குறிப்பிடுவதாகக் கற்பிக்கப் பட்டுள்ளது .இளவரசிகளின் பெயர்களே

- அல்சியோன் ,டைகெட்டா ,மெரோப்,சிலானோ ,எலெக்ட்ரா ,
அஸ்ட்ரோப்,மற்றும் மாயா -

அந்த விண்மீன்களின் பெயர்களாயின.டாரஸ் வட்டார விண்மீன்
கூட்டத்தில் மங்கலாக ஒளிரும் ஏழு அழகான விண்மீன்களாக இவை அமைந்துள்ளன .இது பற்றி பைபிளில் ஓரிடத்தில் கூறப்பட்டுள்ளது.பிளியாடெஸ் என்றால் கிரேக்க மொழியில் கூட்டு
என்று பொருள் தமிழர்கள் இதை கிருத்திகா என்றும் சப்த கன்னிகள்
என்றும் கூறுவார்கள்.ஒரு காலத்தில் பிளியாடெசில்
உள்ள ஏழு விண்மீன்களும் சமமான பிரகாசத்துடன்
ஒளிர்ந்தன என்றும் ,பின்னர் மெரோப்,நோயாளியாக இறந்து
போகக் கூடிய நிலையில் இருந்த ஒரு மனிதனை மணந்து
கொண்டதால்,இந்த விண்மீன் மட்டும் மங்கியது
என்றும் காரணக் கதை கூறுவார்கள் .
ஒருவரின் கண்பார்வையின் கூர்மையை பரிசோதித்துப் பார்பதற்கு
பிளியாடெஸ் ஓர் இயற்கை சாதனமாக உள்ளது. பார்வைக் கூர்மையை அறிய ,பிளியாடெசில் எவ்வளவு விண்மீன்கள் இருக்கின்றன என்று
கணக்கிடச் சொல்வார்கள் .6 அல்லது 7 என்று எண்ண முடிந்தால்
அவருக்கு இயல்பான கண்பார்வை உள்ளது என்று
கூறலாம். இதை விடக் கூடுதலாக எண்ணிச் சொன்னால் அவருக்கு கூர்மையான பார்வை உள்ளது என்று கூறலாம்.அபரிதமான கண்பார்வை உடைய சிலர் இதில்10 விண்மீன்கள் வரை எண்ண முடியும். கலிலியோ தன்னுடைய கண்டுபிடிப்பான தொலைநோக்கி மூலம் இதில் மொத்தம் 36 விண்மீன்கள் இருப்பதாக மதிப்பிட்டுள்ளார் .

M .45 என்று பதிவு செய்யப்பட்டுள்ள பிளியாடெசில் பிரகாசமான
விண்மீன்கள் மெல்லிய நீல நிறத்துடன் ஈட்டா டாரி எனப்படும்
அல்சியோன் என்ற விண்மீன்தான். இது சற்றேறக் குறைய 368
ஒளி ஆண்டுகள் தொலைவில் தோற்ற ஒளிப்பொலிவெண் 2.85
உடன் காணப்படுகிறது. எலெக்ட்ரா ,371 ஒளி ஆண்டுகள்
தொலைவில் 3 .72 என்ற தோற்ற ஒளிப்பொலிவெண்ணுடனும்,
மாயா 360 ஒளி ஆண்டுகள் தொலைவில் 3 87 என்ற தோற்ற
ஒளிபொலிவெண்ணுடனும் காணப்படுகின்றன.
பிளியாடெஸ் கொத்து விண்மீன் கூட்டத்தில் 7 வது பிரகாசமான
விண்மீன் பிளியோன் ஆகும். இதை 28 டாரி என்று குறிப்பிட்டுள்ளனர்.
387 ஒளி ஆண்டுகள் தொலைவில் உள்ள இதன்தோற்ற
ஒளிப்பொலிவெண் 5.05 ஆகும். இது இன்னும்
முதன்மைத் தொடர் (Main sequence) விண்மீனாக உள்ளது.
காமா கசியோப்பியா போல இதுவும் Be வகை விண்மீனாக உள்ளது
இந்த விண்மீன் விண்ணியார்பியலாரையும்,வானவியலாரையும்
வெகுவாகக் கவர்ந்துள்ளது. இது மிக விரைவாகத் தற்சுழலும் ஒரு
விண்மீனாக விளங்குகிறது .நடுவரைக் கோட்டுப் பகுதியில் இதன் சுழற்சி வேகம் 330 கிமீ/வி என்ற அளவில் உள்ளது.
வெப்ப மிக்க வளிமத்தால் வளையத்தை உருவாக்கி .ஒரு புறக்
கூடுடைய விண்மீனாகத் தோற்றம் தருவதால் ,இது மிக அரியதொரு விண்மீனாகக் கருதப்படுகிறது.1888 முதல் பிளியோன் மூன்று வளிமக் கூடுகளாலான வளையங்களை இது போல உருவாக்கியுள்ளது. வளிமத்தை உமிழ்ந்து புறக் கூட்டை உருவாக்கும் ஒவ்வொரு முறையிலும் முதலில் பிரகாசமாக ஒளிர்ந்து பின்னர் பல மடங்கு பிரகாசம் மங்கிப் போனது .
அப்போது அதன் தோற்ற ஒளிப்பொலிவெண் 5.5 ஆக ,
இயல்புத் தோற்ற ஒளிப்பொலிவெண்ணைவிடத்
தாழ்ந்திருந்தது. இதற்குக் காரணம் விண்மீனால் உமிழப்படும் ஒளி புறக் கூடுகளினால் உட்கவரப்படுவதேயாகும் .பிரகாசத்தில் ஏற்படும் ஏற்றத்
தாழ்வு பிளியோனை ஒரு மாறோளிர் விண்மீனாக்கியுள்ளது

vinveliyil ulaa

பிளியாடெஸ்

பிளியாடெஸ், ஹயாடெஸ்ஸை விட உருவ அளவில் சற்று பெரியது .
பிளியாடெஸ்ஸில் சிறிதும் பெரிதுமாக 280 விண்மீன்கள் கலந்து
காணப்படுகின்றன .ஹையதேஸ்க்கு அதைச் சுற்றி போர்வை போல
நெபுலா இல்லை. ஆனால் பிளி யாடெஸ்ஸில் இது தெளிவாகத்
தெரிகிறது. பிளியாடெஸ் விண்மீன் கூட்டம் சராசரியாக 125 பார்செக்
(Parsec ) அல்லது 390 ஒளி ஆண்டுகள் தொலைவில் உள்ளது. இவ்வளவு
தொலைவில் இருந்தாலும் வெறும் கண்களால் இதைக் காண முடிகிறது .
விண்வெளியில் இது முழு நிலவின் பரப்பைப் போல நான்கு மடங்கு
பரப்பில் விரிந்திருக்கிறது. மேலும் இதிலுள்ள விண்மீன்கள் விண்வெளியில்
22 ஒளி ஆண்டுகள் தொலைவிலுள்ள எல்லாத் திசைகளிலும் பரவி
இருக்கின்றன .பிற தனிக் கொத்து விண்மீன் கூட்டத்திலுள்ள விண்மீன்கள்
போல , பிளி யாடெஸ்ஸில் உள்ள விண்மீன்கள் யாவும் விரைந்து நகர்ந்து
கொண்டிருக்கின்றன .இவையாவும் ஏறக்குறைய சமமான வேகத்தில்
ஒரு குவியத்தை நோக்கி நகர்வது போலத் தோற்றம் தரும்
ஹயாடெஸ் போல இதில் இயக்கம் தெளிவாக இல்லை.

நிறமாலைப் படி "O " வகையைச் சேர்ந்த விண்மீன் களான கொந்து
விண்மீன்கள் மிக நெருக்கமாக அமைந்திருக்கும். பிளியாடெஸ்ஸில்
உள்ள விண்மீன்கள் இதை விட நெருக்கமாக உள்ளன என்றாலும்
'O " வகை விண்மீன்களைப் போல அவ்வளவு வயதானதாக இல்லை.
பிளியாடெஸ்ஸின் வயது 2 .5 மில்லியன் ஆண்டுகள் என
மதிப்பிட்டுள்ளனர் .இது உண்மையானால் ,அதன் வயதும் ,
பூமியில் மனித இனம் தோன்றிய காலமும் ஒன்று எனக் கூறலாம் .

மெலிதான ,ஒளி உட்புகக் கூடியவாறு, மூடுபனி போன்ற ஒரு படலம்
பிளியாடெஸ்ஸைச் சுற்றி எங்கும் வியாபித்துள்ளது .ஆனால் ஓரியன்
நெபுலா போல இது ஒளியைச் சுயமாக உமிழக் கூடியதாக இல்லை
இது பிளியாடெஸ்ஸில் உள்ள விண்மீன்கள் உமிழ்ந்த ஒளியை
எதிரொளிப்புச் செய்கிறது .இது டாரஸ் வட்டார விண்மீன் கூட்டத்திற்கு
சற்று விலகி மேற்காக ஏரிசுக்கும் டாரசுக்கும் இடையில் உள்ளது.

vinveliyil ulaa

ஹயாடெஸ்

ஹயாடெஸ்,80000 ஆண்டுகளுக்கு முன்னால் நம்முடைய
சூரியனுக்கு இன்னும் அருகாமையில் இருந்தது என்றும்
அப்போது அவை இரண்டிற்கும் இடைப்பட்ட தொலைவு
சுமார் 67 ஒளி ஆண்டுகள் என்றும் 65 மில்லியன் ஆண்டுகளாக
ஹயாடெஸ் நம்மிடமிருந்து விலகிச் சென்றதால்,விண்ணில்
அதன் தோற்றப் பரப்பு முழு நிலவின் தோற்றப் பரப்பைவிடக்
குறைவாக உள்ளது.இதிலுள்ள பிரகாசமான விண்மீன் வெறும்
கண்களுக்குத் தெரியும். அதன் தோற்ற ஒளிப்பொலிவெண்
12 ஐக் கொண்ட மங்கலான வின்மீனாகும்.

ஹயாடெஸ் ஏறக்குறைய ஒரேமாதிரியான விண்மீன்களாலான
ஒரு தொகுப்பு .இதிலுள்ள விண்மீன்கள் யாவும்,குளிர்ச்சியானதாகவும்
சிறிய அளவினதாகவும் ,இளமையானதாகவும் உள்ளன. இதில்
சூரியன் போல பல விண்மீன்களும் ,ஒரு சில பெருஞ் சிவப்பு
விண்மீன்களும் இருக்கின்றன. இதன் வயது ஏறக்குறைய
ஓராயிரம் மில்லியன் ஆண்டுகள் என மதிப்பிட்டுள்ளனர் .
பொதுவாகத் தனிக் கொத்து அல்லது அக அண்டக் கொத்து
விண்மீன் கூட்டம் ஓரண்டத்தின் தட்டுப் பகுதியில் அமைந்திருக்கும்.
இதில் பத்து முதல் சில நூறு விண்மீன்கள் தளர்ச்சியாகக் கட்டுண்டு
பெரும்பாலும் சீர்மையற்ற முறையில்,50 ஒளி ஆண்டுகள்
குறுக்காக உள்ள விண்வெளியில் மேகக் கூட்டம் போல சிதறிக்
கிடக்கும் வளிமங்கள் மற்றும் தூசிகளிலிருந்து இவையாவும் ஏறக்குறைய
ஒரேசமயத்தில் உருவாகின்றன .இப்படி உருவாவதற்கு அவை பல
நூறு மில்லியன் ஆண்டு காலத்தை எடுத்துக் கொண்டுள்ளன.
உண்மையில் பல நெபுலாக்களுக்கு மத்தியில் இது போன்று தனிக்
கொத்து விண்மீன் கூட்டங்கள் உருவாவதை ஆராய்ச்சி யாளர்கள்
கண்டறிந்துள்ளனர். தனிக் கொத்து விண்மீன்கள் கூட்டம் மெதுவான
இடப்பெயர்வுக்கு உள்ளாகின்றன. அருகருகே இருப்பதால் ஏற்படும்
குறுக்கீடுகள் ,நெபுலாவிலுள்ள ஊடகப் பொருளால் ஏற்படும்
இடையீட்டுச் செயல்களால் இக் கூட்டத்திலுள்ள சில உறுப்புகள்
புற வெளிக்குத் தப்பிச் செல்வதுண்டு

இதற்கு மிகச் சரியான எடுத்துக் காட்டாய் விளங்குவது ஹயாடெஸ்
மற்றும் பிளியாடெஸ் கொத்து விண்மீன் கூட்டங்களாகும்.
முட்டையிலிருந்து கோழி வந்ததா அல்லது கோழியிலிருந்து
முட்டை வந்ததா ? முதலில் இருந்தது மரமா அல்லது விதையா? என்று
வேடிக்கையாகச் சிலர் வினவுவார்கள் .இதற்கு ஒப்புக் கொள்ளுமாறு
மிகச் சரியான விடையை எளிதாகக் கூறமுடியாது .அது போல
விண்மீன்கள் அழிந்து நெபுலா வந்ததா அல்லது நெபுலா திரண்டு
விண்மீன்களாக மாறியதா என்று கேட்பதும் இது போன்றதே .விண்மீன்
வெடித்துச் சிதறி நெபுலாவாக மாறுவதும் ,நெபுலா குளிர்ந்து சுருங்கி
விண்மீனாக உருமாறுவதும் இப்பிரபஞ்சத்தில் தொடர்ந்து
நிகழும் ஒரு நடைமுறைதான் .இந்த வகையில் ஹயாடெஸ் ,இப் பேரண்டம்
ஆதி காலத்தில் எப்படித் தோன்றியிருக்கும் என்பதைத் தெரிவிக்கும்
ஒரு காட்சியாக உள்ளது. பேரண்டத்தின் எல்லையை வரையறுப்பதில்
இது முக்கியப் பங்கேற்றுள்ளது

vinveliyil ulaa

ஹையாடெஸ் மற்றும் பிளியாடெஸ்

ஹையாடெஸ்(Hyades) மற்றும் பிளியாடெஸ்(Pleiades) கொத்து
விண்மீன் கூட்டத்தில் பல விண்மீன்கள் இருந்தாலும், வெறும்
கண்களுக்குப் புலப்பட்டுத் தெரிபவை சிலவே.இவற்றைக் கிரேக்க
புராணத்தில் அட்லஸ்(Atlas) என்ற மாமன்னனுக்கும்
ராணிமார்களுக்கும் பிறந்த பெண் குழந்தைகளாகச் சித்தரிந்துள்ளனர்.
ஹையாடெஸில் உள்ள விண்மீன்களெல்லாம் அட்லஸ் மற்றும் எத்ரா
தம்பதியினருக்குப் பிறந்த மகள்களை நினைவூட்டுவதாக உள்ளன.

விண்ணில் ஹையாடெஸ் கொத்து விண்மீன் கூட்டம் காளை மாட்டின்
முகமாகக் கற்பனை செய்யப்பட்டுள்ளது.அல்டிபாரன்(Aldebaran)
என்ற பெருஞ் சிவப்பு விண்மீன்,இரத்தம் பாய்ந்து கோபமாகக் காட்சி
தரும் காளை மாட்டின் கண்ணைக் குறிப்பிடுகின்றது. இதை நம்மவர்கள் ரோகிணி(Rohini) எனக் குறிப்பிடுகின்றார்கள்.மாட்டின் கொம்பை பீட்டா
(Beta) மற்றும் சீட்டா(zeta) டாரி விண்மீன்கள் அலங்கரிக்கின்றன.
விண்ணில் பத்து முழு நிலவுப் பரப்பில் இந்த வட்டார
விண்மீன்கள் விரவி உள்ளன.

ஹையாடெஸ்ஸில் சுமார் 200 விண்மீன்கள் கொத்தாக ,மிகவும்
நெருக்கமாக அமைந்துள்ளன.இது சராசரியாக சுமார் 135 ஒளி ஆண்டுகள்
தொலைவு நம்மிடமிருந்து விலகியுள்ளது. .இது ஏறக்குறைய 'V " என்ற
வடிவத்துடன் 33 ஒளி ஆண்டுகள் நெடுக்கையில் விரவி உள்ளது.
சிதறியவாறு இருக்கும் விண்மீன்கள் விண்வெளியில் ஒரு முழு நிலவின்
பரப்பை அடைத்துள்ளன.

அல்டிபாரனைச் சுற்றி அமைந்துள்ள ஹையாடெஸின் விண்மீன்கள்
தனித்த தன்னியக்கம்(Proper motion) கொண்டு ,விண்வெளியில் ஒரு
புள்ளியை
நோக்கியவாறு இயக்கிச் செல்வது போலத் தோன்றுகின்றன. இப் புள்ளி
ஆல்பா ஓரியானிஸ்(Orionis) வட்டார விண்மீன் கூட்டத்திலுள்ள பெரு விண்மீனான பெடல்சியூஸ்(Betelgeuse) விண்மீனுக்கு மிக அருகில் அமைந்துள்ளது .ஹையாடெஸில் உள்ள விண்மீன்களின் தனித்த
தன்னியக்கம் குறிப்பிடும்படியாக இருப்பதால்,குவியும் முனைப்
புள்ளியை எளிதாகத் தீர்மானிக்க முடிகிறது. உண்மையில்
ஹையடெஸில் உள்ள விண்மீன்கள் யாவும் விண்வெளியில் இணையான
திசையில் இயங்கிச் செல்கின்றன.அவை ஒரு புள்ளியில் குவிவது
போலத் தோன்றுவது தோற்றப் பிழையாகும். இது எப்படிப்பட்ட தோற்றப்
பிழை என்றால், இணையான இரயில் தண்டவாளங்கள் தொலைவில்
குறுகிக் கொண்டே செல்வதைப் போன்றதாகும்.

vinveliyil ulaa

அல்டிபாரனின் அதிசயங்கள்

அல்டிபாரன், ஆர்க்டூரஸ்,போலக்ஸ் போன்ற விண்மீன்களின் சுற்றுப் பாதை வேகத்தின்
அளவீடுகள்,1993 ல் விரிவாக மேற்கொள்ளப்பட்டன.அப்போது அல்டிபாரன் பற்றிய
சில புதிய உண்மைகள் தெரியவந்தன.அல்டிபாரன் சுற்றுப் பாதை வேகத்தில் ஏற்றத்
தாழ்வுகள் மிகவும் அதிகமாக உள்ளன.இது அதற்கு ஒரு துணை விண்மீன் இருக்கலாம்
என்பதற்கு ஒரு வலுவான காரணமாக இருந்தது. கணக்கீடுகளைக் கொண்டு அதன்
துணை விண்மீனின் குறைந்த அளவு நிறை 11.4 மடங்கு,நமது சூரியக் குடும்பத்திலுள்ள
வியாழனின் நிறையைப் போல உள்ளது என்றும், அதன் சுற்றுக் காலம் 643 நாட்கள்
என்றும் அதற்கும் அல்டிபாரனுக்கும் உள்ள இடைவெளி 2 AU(300Gm )என்றும்
தெரிவித்துள்ளன .
அல்டிபாரன் காட்சி தரும் விண் வெளியில் அதற்கு மிக நெருக்கமாக ஐந்து மங்கலான விண்மீன்களை இன்றைக்கு இனமறிந்துள்ளனர்.இது அல்டிபாரன்
ஒரு இரட்டை விண்மீனாக இருக்கலாம் என்பதற்கு ஒரு வலிமையான
காரணமாக விளங்குகிறது .அல்டிபாரனோடு காட்சி தரும் விண்மீன்களை ஆல்பாடாரி A ,B ,C ,D மற்றும் E எனக் குறிப்பிட்டுள்ளனர் .இதில் ஆல்பாடாரி A மட்டும் பிரகாசமானதாக உள்ளது. இதன் சார்பிலா
ஒளிப்பொலிவெண் - ௦௦௦0 .63 ஆகும் .
விண் இயற்பியலாரின் சில கணிப்புகள் ,ஆல்பாடாரி B யின் தன்னியக்கப் பெயர்ச்சி இயக்கமும்(Proper motion )
தோற்ற இடப் பெயர்ச்சியும் (parallax ) அல்டிபாரனை மிகவும் ஒத்திருக்கிறது எனத்
தெரிவித்துள்ளன .இது அல்டிபாரன் உண்மையில் ஒரு இணை இரட்டையாக
இருக்கலாம் என்று சுட்டிக் காட்டியுள்ளது. .எனினும் ஆல்பா டாரி B மிகவும் மங்கலாக இருப்பதாலும், அல்டிபாரன் மிகவும் பிரகாசமாக இருப்பதாலும்
இதை உறுதி செய்வது மிகவும் கடினமாக உள்ளது.
ஆல்பா டாரி C யும் D யும் ஒரு இரட்டை அமைப்பாக உள்ளது. இவை இரண்டும் ஈர்ப்பால் ஒன்றிணைந்து
ஒன்றை ஒன்று சுற்றி வருவதால் அப்படி முடிவு செய்யப்பட்டது .
இவை காட்சி வெளியில் அல்டிபாரனுக்கு அருகில் தெரிந்தாலும் உண்மையில் வெகு தொலைவில் உள்ளன .இவை இரண்டும் ஹையாடெஸ்
கூட்டத்தின் உறுப்புகளாக இருக்கலாம் என்று நம்பப் படுகிறது.

vinveliyil ulaa

அல்டிபாரன் (Aldebaran )

இக் கூட்டத்தில் மிகவும் பிரகாசமான விண்மீன் அல்டிபாரன் என்றழைக்கப்படும்
ஆல்பா டாரி என்ற விண்மீன்.இதைத் தமிழர்கள் ரோகினி எனக் குறிப்பிடுகின்றனர்
இது ஹையாடெஸ் (Hyades )எனப்படும் தனிக் கொத்து விண்மீன் கூட்டத்திற்கு
அருகாமையில் உள்ளது .எனினும் அல்டிபாரனும் ஹையாடெஸ்ஸும் வெவ்வேறு தொலைவுகளில் உள்ளன .
அல்டிபாரன் மஞ்சளும் .சிவப்பும் கலந்த ஒரு விண்மீன் .இதன் தோற்ற ஒளிப்
பொலிவெண் ௦0௦.75 முதல் ௦0.95 வரையுள்ள நெடுக்கையில் தொடர்ந்து சீரற்ற
முறையில்
மாறிக்கொண்டே இருப்பதால் இது மாறொளிர் வகை விண்மீனாகும்.இதன் தொலைவு சுமார் 65 -70 ஒளி ஆண்டுகள் என மதிப்பிட்டுள்ளனர் ..
இது நமக்கு அருகாமையில் இருக்கும் பெரு விண்மீன்களுள் ஒன்றாகும் .
இதன் விட்டம் சூரியனின் விட்டத்தைப் போல 30 மடங்கு என
அறிந்துள்ளனர் .பிரகாசமிக்க 20 விண்மீன்களின் பட்டியலில் இது 14 வது
இடத்தில் உள்ளது.


எல்நாத் (Elnath ) எனப்படும் பீட்டா டாரியின்தோற்ற ஒளிப்பொலிவெண்
1 .65 ,சார்பிலா ஒளிப்பொலிவெண் - 1 .37 .இது டாரஸ் வட்டார விண்மீன்
கூட்டத்திற்கு அருகாமையில் உள்ள ஔரிகா (Auriga ) எனும் விட்டாரா விண்மீன்
கூட்டத்திலுள்ள பிரகாசமிக்க விண்மீன்களின் கட்டமைப்பாலான ஐங்கோண
கட்டத்தின் அடியில் அமைந்துள்ளது. இது சுமார் 131 ஒளி ஆண்டுகள்
தொலைவில் இருப்பதாக அறிந்துள்ளனர்.
இக் கூட்டத்திலுள்ள விண்மீன்கள் தோராயமாக ஆங்கில எழுத்து 'V ' வடிவில்
அமைந்துள்ளன. இதில் ஆல்பா,பீட்டா டாரிகள் வெவ்வேறு புயங்களில்
இருக்குமாறும் ,அவற்றின் சந்திப்பில் ஹையாடெசும் அதன் அருகாமையில்
ஆல்பா டாரி இருக்குமாறும் உள்ளன .அருகாமையில் இருப்பதால்
அல்டிபாரன் என்ற ஆல்பா டாரி ,ஹையாடெஸ் கொத்து விண்மீன்
கூட்டத்தில் உள்ளது போலத் தோன்றினாலும் உண்மையில்
அவையிரெண்டும் சுமார் 70 ஒளியாண்டுகள் தொலைவு தள்ளி உள்ளன.

vinveliyil ulaa

ஹோரோலோஜியம்( horologium )

தென் பகுதியில் காணப்படும் இது ஒரு சிறிய ,மங்கலான விண்மீன் கூட்டமாகும் .லத்தீன் மொழியில்
கடிகார ஊசல் என்று இதற்குப் பொருள் .18 ம் நூற்றாண்டில் பிரான்சு நாட்டின் வானவியலாரான அபே நிக்கோலஸ் லூயிஸ் டி பொகாலே என்பார் ,ஊசல் கடிகாரத்தைக் கண்டுபிடித்த
கிறிஸ்டியன் ஹைஜென்ஸ் என்பாரைக் கௌரவிக்கும் விதமாக இதற்கு ஹோரோலோஜியம்
ஆசிலிடோரியம் என்று பெயரிட்டார் .இது காலப் போக்கில் சுருக்கி ஹோரோலோஜியம் ஆனது.

இது எரிடானஸ் வட்டாரத்திலுள்ள பிரகாசமான் ஆர்செர்னர் விண்மீனுக்கும் ,கரினா வட்டாரத்திலுள்ள பிரகாசமான கனோபஸ் விண்மீனுக்கும் இடையில் அமைந்துள்ளது.
இது ஒரு ஊசலாடும் குண்டுபோலக் கற்பனை செய்யப்பட்டுள்ளது .இதில் பிரகாசமிக்க
ஆல்பா கோரோலோஜி ஊசலின் அலைவு தானத்தில் உள்ள நிறைமிக்க குண்டு போல
அமைந்துள்ளது. மொத்தம் 20 விண்மீன்கள் இவ்வட்டாரத்தில் அமைந்திருக்கலாம் என
அறிந்துள்ளனர் .இதிலுள்ள R ஹோரோலோஜி சீடெஸ் வட்டாரத்திலுள்ள செம்பூதபோன்ற
மீரா விண்மீன் போல ஒரு பெருஞ் சிவப்பு மாறொளிர் விண்மீனாக உள்ளது .இதன் ஒளி பொலி வெண் பெரும நிலையில் 5
லிருந்து, சிறும நிலையில் 14 வரை ,சுமார் 13 மாத கால நெடுக்கையில் மாற்றத்திற்கு
உள்ளாகிறது .
ஒளிப்பொலிவெண்ணில் மிக அதிக வேறுபாட்டுடன் கூடிய மாறொளிர் விண்மீன் இதுவே ஆகும் .
AM 1 என்று குறிப்பிடப்படும் கோளகக் கொத்து விண்மீன் கூட்டம் இப்பகுதியில் உள்ளது. .இக் கூட்டமே ,பால் வெளி அண்டத்திலிருந்து வெகு தொலைவு தள்ளி இருக்கும் கூட்டமாகும்.இது
398000 ஒளி ஆண்டுகள் தொலைவில் உள்ளதாக அறிந்துள்ளனர்.

vinveliyil ulaa

உமிகிரான் எரிடானி / 40 எரிடானி

16 .5 ஒளி ஆண்டுகள் தொலைவில் உமிகிரான் எரிடானி என்றும் 40 எரிடானி என்றும் அழைக்கப்படுகின்ற ஒரு விண்மீன் உள்ளது .இது ஒரு மும் மீன்களின் தொகுப்பாகும் .
இதில் உள்ள முதன்மை விண்மீன் 4 .6 தோற்ற ஒளிப்பொலி வெண்ணுடன் நமது
சூரியனைப் போல உள்ளது. 1 வினாடி கோண விளக்கத்துடன் காணப்படும் இதன்துனை விண்மீன் ஓர் இரட்டை விண்மீனாக உள்ளது .9 .7 மற்றும் 11 .2 தோற்ற ஒளிப் பொலி வெண் கொண்ட
அவை குறுஞ் சிவப்பு, குறு வெள்ளை விண்மீன்களாக உள்ளன. ,குறுஞ் சிவப்பு விண்மீன்
மிகவும் குளிர்ச்சியாகவும் ,சூரியனின் பருமனில் 5 ல் 1 பங்கு உள்ளதாகவும் இருக்கிறது.
குறு வெள்ளை விண்மீன் சூரியனி விட 50 மடங்கு சிறியது. ஆனால் அடர்த்தி 64000
மடங்கு சூரியனின் அடர்த்தியை விடக் கூடுதலானது .இவை இரண்டும் தற் சுழற்சியுடன்
ஒன்றையொன்று 250 ஆண்டுகளுக்கு ஒரு முறை சுற்றி வருகின்றன .இந்த இரட்டை
விண்மீன் ,முதன்மை விண்மீனை மிக நீண்ட கால சுற்றுக் காலத்துடன் சுற்றி வருகிறது.

பொதுவாக குறு வெள்ளை விண்மீன்கள் சிறிய அளவினதாகவும் ,ஓரளவு குளிர்ச்சியாகவும் ,
குறைந்த ஒளிர்திறனுடனும் காணப்படும். நிறைமிக்கதாக இருப்பதால் இதன் அடர்த்தி
அதிகமாக இருக்கும்.அணுக் கருவிற்கும் அதைச் சுற்றி வரும் எலெக்ட்ரான்களுக்கும்
இடையே ஓரளவு இடைவெளி இருக்கிறது. ஈர்ப்பால் இறுக்கப்படும் போது இந்த
எலெக்ட்ரான் களின் எதிர்ப்பு வலுவாக இல்லாத போது முறிந்து தூசித் துகள் போல
நெருக்கப் படுகின்றன .அப்போது அணுக் கருவிற்கும் எலெக்ட்ரான்களுக்கும் இடையே
சிறிதும் இடைவெளி இருப்பதில்லை .அப்போது அதன் அடர்த்தி மிகவும் அதிகரித்துவிடுகிறது .
இதுவே குறு வெள்ளை விண்மீனின் நிலை என ஆராய்ந்து கூறியுள்ளனர்.

vinveliyil ulaa

ஆசெர்னர் (Achernar ) (இது ஆல்பா எரி அல்லது ஆல்பா எரிடானி என்றழைக்கப்படும் )


ஆசெர்னர் மிக விரைவாகத் தற்சுழலும் ஒரு விண்மீன். இதன் தற்சுழற்சி வேகம் குறைந்தது
225 கி.மீ/வி என மதிப்பிட்டுள்ளனர். 2003 ல் இந்த விண்மீனை ,கட்டமைக்கப் பட்ட மிகப் பெரிய
வானத் தொலை நோக்கியால் பார்த்த போது இந்த விண்மீன் அளவுக்கு அதிகமாகத் தட்டையாக இருப்பது அறியப்பட்டது. நடுவரைக் கோட்டில் ஆரம், துருவ ஆரத்தை விட 50 சதவீதம்
அதிகமாக இருந்தது கண்டறியப்பட்டது .
ஆல்பா எரிடானி இரவில் வானத்தில் காணப்படும் விண்மீன்களுள் 9 வது பிரகாசமான
வின்மீனாகும்

இந்த வட்டார விண்மீன் கூட்டத்தில் எப்சிலான் எரிடானி என்றொரு விண்மீன் உள்ளது .
வெறும் கண்களுக்குப் புலப்படக் கூடிய இந்த விண்மீன் ,மிக அருகாமையில் இருப்பவற்றுள்
மூன்றாவதாக உள்ளது. இது சூரியனை விடச் சிறிய அளவினதாகவும் ,குளிர்ச்சியானதாகவும்
குறைந்த பிரகாசமுள்ளதாகவும் இருந்தாலும் சற்றேறக் குறைய சூரியனைப் போன்றது எனலாம் .
10 .5 ஒளி ஆண்டுகள் தொலைவில் உள்ள இதன் ஆரம் சூரியனின் ஆரத்தைப் போல 0 .88 மடங்கும்
நிறை 0 .85 மடங்கும் ஒளிர் திறன் 0 .34 மடங்கும் உள்ளது. தோற்ற ஒளிப்பொலிவெண்
3 .72 ஆக உள்ளது .சூரியனைப் போல மெதுவாகச் தற்சுழல்கிறது.
1998 ல் குளிர்ந்த வெப்பநிலையில் ஒரு தூசிப் படலம் தட்டு வடிவில் எப்சிலான் எரிடானியைச்
சுற்றி இருப்பதைக் கண்டறிந்தார்கள். சூரியக் குடும்பத்தில் காணப்படும் கெய்பர் பெல்ட் (Kuiper belt போல, ஏறக்குறைய சூரியனிலிருந்து புளூட்டோவின் சராசரித் தொலைவைப் போல இருமடங்கு
தொலைவு வரை விரவியுள்ளது .தூசியின் செறிவு 35 முதல் 75 வானியல் அலகுத் தொலைவு வரை
உள்ள வளையத்தில் காணப்படுகின்றது . 60 வானியல் அலகுத் தொலைவில் செறிவின் பெருமம்
அமைந்துள்ளது .இத் தூசிப் படலத்தின் பெரும நிறையை ௦.4 சூரிய நிறையாக மதிப்பிட்டுள்ளனர் .


2000 ல் வானவியலார் இந்த விண்மீனுக்கு நமது வியாழன் கோள் போன்று ஒரு கோள் ,
1 .2 மடங்கு வியாழனின் நிறையுடன் ,மிகவும் நீட்சியுற்ற ஒரு நீள் வட்டப் பாதையில்
3 .3 வானியல் அலகுத் தொலைவு சராசரி ஆரத்துடன் 6 .8 ஆண்டுகள் சுற்றுக் காலத்துடன்
இருப்பதைக் கண்டுபிடித்துள்ளனர் .

பூமிக்கு வெளியே உயர் உயிரினம் இருக்கக் கூடிய வாய்ப்பு பற்றி இன்றைக்கு பன்னாட்டு
வானவியலார் மேற்கொண்டு வரும் ஆராய்ச்சியில் இது முக்கியமாகக் கருதப்படுகிறது .
எப்சிலான் எரிடானசின் இளநிலை ,உயிரினம் இன்னும் தோன்றி இருக்க வாய்ப்பில்லை
என்று கூறினாலும் எதிர்காலத்தில் உயிரினம் தோன்றுவதற்கான வாய்ப்பில்லை என்று
மறுக்க முடியாது. இந்த ஆய்வில் டௌ சீடிக்கு அடுத்ததாக இந்த விண்மீன் அனைவரின்
கவனத்தில் இருந்து வருகிறது. இது டௌ சீடியை விடவும் சற்று குறுகிய தொலைவில்
உள்ளது என்பதும் அதற்கு ஒரு காரணம்

vinveliyil ulaa

அல்கோல் விண்மீனின் பிரகாச மாற்றம்

பிரகாசம் அதிகரிப்பை எதிரொளிப்பு மூலம் விளக்க முடியும் .வெப்ப மிக்க அல்கோல் ,குளிர்ச்சியான துணை விண்மீனின்
நேர் முகப் பரப்பில் கதிர்வீச்சைப் பொழிய ,அது அதைச் சற்று பிரகாச மிக்கதாகக் காட்டுகிறது.
கலைக்கட்டம் சுழி என்ற நிலையில் குளிர்ச்சியான துணை விண்மீன் வெப்ப மிக்க அளகோலை முழுமையாக மறைக்கின்றது.
அப்போது நாம் துணை விண்மீனின் குளிர்ச்சியான இருண்ட முகப்பரப்பையே காண்கிறோம் .அது சுற்றியங்கும் போது
கலைக்கட்டம் அதிகரிக்கின்றது. அப்போது துணை விண்மீனின் பிரகாசமான எதிரொளிப்புப் பகுதியின் அளவு தொடர்ந்து
அதிகரிக்கின்றது .கண்ணோட்டத் திசைக்கு சுற்றுப் பாதையின் ஆரம் செங்குத்தாக இருக்கும் போது இது பெருமமாக
இருக்கிறது. அதன் பின் துணை விண்மீனின் பிரகாசமான எதிரொளிப்புப் பகுதியின் அளவு தொடர்ந்து குறைய அமைப்பின்
மொத்தப் பிரகாசமும் சிறிதளவு குறைகிறது. பின்னர் துணை விண்மீன் அல்கோலால் மறைக்கப்படுகிறது. அல்கோல் துணை
விண்மீனால் மறைக்கப்படுவதற்கும் அல்கோலால் துணை விண்மீன்மறைக்கப்படுவதற்கும் வேறுபாடு உள்ளது.
அல்கோலைத் துணை விண்மீன் மறைக்கும் போது பிரகாசம் பெருமளவு தடைப்படுகின்றது .அதனால் முதன்மைச் சிறுமம்
விளைகிறது. ஆனால் துணை விண்மீனை அல்கோல் மறைக்கும் போது பிரகாசம் பெருமளவு தடைப் படுவதில்லை .துணை
விண்மீனின் எதிரொளிப்பு ஒளி அல்கோலால் தடுக்கப்படுவதால் பிரகாசத்தில் சிறிதளவு மாற்றமே ஏற்படுகிறது.
அதனால் துணைச் சிறுமம் உண்டாகிறது. அல்கோலால் படிப்படியாக மறையும் அல்லது வெளிப்படும் துணை விண்மீன் மீது
அல்கோல் ஒளியை வீசி அதன் கலைத் தோற்றத்தை ஏற்படுத்துவதால் ,சுற்றுக் கால முறைப்படி பிரகாச மாற்றத்திற்கு
உள்ளாகிறது.
இந்த வரை படத்தின் துணை கொண்டு மறைப்பு மாறொளிர் விண்மீனின் சுற்றுக் காலம் ,பரிமாண அளவு ,நிறை ,அடர்த்தி,
போன்ற பல இயற்பியல் பண்புகளை ஒருவாறு கணிக்க முடியும். இதன் படி அல்கோல் மெல்லிய நீலங் கலந்த வெண்ணிறமுடைய
ஓரளவு மிதமான பரிமாண முடைய ஒரு விண்மீனாகும். இத விட்டம் 4 ,183 ,400 கிமீ ( நமது சூரியனின் விட்டம் 1 ,391 ,000 கி மீ ) .
அல்கோல் ,சூரியனை விட உருவ அளவில் 9 மடங்கு பெரியது. .இத புறப் பரப்பு வெப்ப நிலை 15000 டிகிரி கெல்வின் நெடுக்கையில் உள்ளது .
சூரியனை விட 100 மடங்கு பிரகாசமானது .நிறையோ சூரிய நிறையைப் போல 3 .5 - 4 மடங்காக உள்ளது .அடர்த்தியோ சூரியனை விடக் குறைவு.
அல்கோலின் அடர்த்தி சூரிய அடர்த்தியில் 0 .07 மடங்கு தான்.
இதன் துணை விண்மீன் அளகோலை ஒப்பிட சற்று பெரிய அளவினதாகும். அதன் விட்டம் 4 ,827 ,000 கிமீ ஆக மதிப் பிட்டுள்ளனர் .
இது அல்கோலை விடக் குளிர்ச்சியானது என்பதால் இதன் புறப் பரப்பு வெப்ப நிலை 7000 டிகிரி கெல்வின் நெடுக்கையில் உள்ளது .
அதாவது நமது சூரியனை விட 1000 டிகிரி கெல்வின் புறப்பரப்பு வெப்ப நிலையைக் கூடுதலாகப் பெற்றுள்ளது . எனினும் சூரியனை விட மங்கலாக,
ஆரஞ்சு நிறத்தில் காட்சி தருகிறது.. இதற்குக் காரணம் அதன் நிறை சூரிய நிறைக்குச் சமமாகவும், உருவம் பல மடங்கு பெரியதாகவும் இருப்பதால்
அடர்த்தி குறைவாக இருப்பதாகும் .இதன் அடர்த்தி சூரிய அடர்த்தியில் 0 .04 மடங்கு மட்டுமே .
இரட்டை விண்மீன்களில் புறப்பரப்பு வெப்பநிலையில் ஒரு சில ஆயிரம் டிகிரி கெல்வின் வெப்ப நிலை வேறுபாடே ,மறைப்பு விளைவை வெறும்
கண்களுக்குப் புலப்படுத்திக் காட்டப் போதுமானதாக இருக்கிறது என்பதை இதை ஆராய்ந்த பின்னரே தெரிந்து கொண்டனர்.

அல்கோலுக்கும் அதன் துணை விண்மீனுக்கும் உள்ள இடைப்பட்ட தொலைவு 10 ,458 ,500 கிமீ .சூரியக் குடும்பத்தில் புதனின்
சுற்றுப் பாதையின் ஆறாம் 58 ,000 ,000 கிமீ .அதாவது அல்கோல்- துணை விண்மீன் அமைப்பு சூரியன்-புதன் அமைப்பை விட
நெருக்கமாக உள்ளது எனலாம் .அதாவது அல்கோல்-துணை விண்மீன் புரப்பரப்பிடைத் தொலைவு சுமார் ஒரு மில்லியன்
கிமீ மட்டுமே .
கெப்ளரின் விதியைக் கொண்டு இரட்டை விண்மீன்களில் உள்ள விண்மீன்களின் நிறையைக் கணக்கிட முடியும். இதன் படி ஓர்
அமைப்பில் சுற்றுக் காலத்தின் இருமடி அதன் ஆரத்தின் மும்மடிக்கு நேர் விகிதத்தில் இருக்கிறது எனலாம் .
அல்கோலின் பிரகாசம் மாறாது நிலையாக இல்லை என்பது நெடு நாட்களுக்கு முன்பே அறியப்பட்ட உண்மை என்றாலும்
பிரகாசத்தின் அழிவுக் காலத்தில் ஏற்படும் மாற்றங்களும் மாறாது நிலையாக இல்லை என்பதற்கான காரணம் அண்மைக்
காலத்திலேயே கண்டறியப்பட்டது .அல்கோல் விண்மீன் உண்மையில் ஓர் இரட்டை விண்மீன் இல்லை ,அது மூன்று
விண்மீன்களின் கூட்டமைப்பு என்பது உணர்வுநுட்பம் மிக்க தொலை நோக்கி உணர்த்திக் காட்டியது .அல்கோலின் மூன்றாவது
துணை விண்மீன் ,முதன்மை விண்மீனான அளகோலை விட 1 .87 ஆண்டுகளுக்கு ஒருமுறை சுற்றி வருகிறது. இதன் சுற்றுத்
தளம் பார்க்கப் படும் திசைக்கு ஓரளவு சாய்ந்து செங்குத்தாக இருப்பதால் மறைப்பு நிகழ்வை ஏற்படுத்துவதில்லை .
எனினும் இதன் இயக்கத்தினால் அல்கோல் மற்றும் அதன் முதல் துணை விண்மீன்களின் சுற்றுக் காலத்தில் குறிப்படும்
படியான மாற்றம் தூண்டப் படுகிறது. அதாவது அலைவு காலம் அலைவுற்று கால முறைப்படியான மாற்றத்திற்கு
உள்ளாகிறது

vinveliyil ulaa

அல்கோல் -ஒரு விந்தையான விண்மீன்

93 ஒளி ஆண்டுகள் தொலைவிலுள்ள பீட்ட பெர்சியில் பிரகாசமான விண்மீன் ஒன்றும் ,மங்கலான விண்மீன் ஒன்றும் ஒன்றையொன்று சுற்றி
வரும்போது ,அவை 2 நாள் 21 மணி நேரத்திற்கு ஒருமுறையென இடைவந்து ஒன்றையொன்று மறைக்கின்றன .இதனால் இதன் தோற்றப்
பிரகாசம் 2 .1 லிருந்து 3 .4 ஆகக் குறைகிறது .இச் சரிவு 10 மணிநேரம் நீடிக்கிறது .வானத் தாரகைகளை ஆர்வமாய்ப் பார்த்துக் கொண்டிருந்த
அரேபிய வானவியலார் ,மதுசாவின் கண்களாக வர்ணிக்கப்பட்ட இரு விண்மீன்களில் ஒன்று நிலையாக , பிரகாசத்தில் மாற்றம் ஏதுமின்றி
இருந்தது. ஆனால் மற்றொரு விண்மீனான அல்கோல் நேரத்திற்கு ஏற்ப அதன் பிரகாசம் மாறி மாறி ஒளிர்ந்தது .இதைக் கண்டு பேய் கண்
சிமிட்டிக் கொண்டிருக்கிறது என்று புனைந்து சொன்னார்கள் .

அல்கொலியன் பிரகாச மாற்றத்திக்குக் காரணமான மூலத்தையோ அல்லது இயற்பியல் விதியையோ முதலில் கற்ப்பிக்க முடியவில்லை..
1782 முதல் 1783 வரையில் ,ஒவ்வொரு இரவும் இந்த விண்மீனை ஆராய்ந்து ,அதன் பிரகாச மாற்றத்திற்கான இயற்பியலை இங்கிலாந்து
நாட்டைச் சேர்ந்த ஜான் குட்ரிக் என்ற வானவியலார் கண்டறிந்தார். ஏறக்குறைய இரண்டரை நாட்கள் அல்கோலின்
பிரகாசம் மாறாமல் நிலையாக 2 .2 என்ற தோற்ற ஒளிபொலிவெண்ணுடன் காணப்படுகிறது.பின்னர் சுமார் 10 மணி நேரம் அதன் பிரகாசம்
மங்கிப் போய் 3 .5 என்ற தோற்ற ஒளிபொலிவெண்ணுடன் தோன்றுகிறது. அப்போது அதன் பிரகாசம் 44 சதவீதம் குறைகிறது .அதன் பிறகு
மீண்டும் பழைய நிலையை அடைகிறது. அடுத்தடுத்த இரு சிறுமப் பிரகாச நிலைக்கிடைப் பட்ட நேரம் 2 நாள் 20 மணி 46 நிமிடம் என்று
ஒளிபொலிவெண்- கால வரைபடம் மூலம் ஜான் குட்ரிக் கண்டறிந்தார். மேலும் இதற்கான காரணத்தையும் கண்டறிந்து விளக்கியவர்
இவரே ஆவார் .அல்கோல் விண்மீனைச் சுற்றி ஒரு பெரிய விண்ணுறுப்பு சுற்றி வருவதால் இப்படி நிகழ வாய்ப்பிருப்பதை அப்போது
இவர் சுட்டிக்காட்டினார் .எனினும் இது ஏறக்குறைய 200 ஆண்டுகள் அனுமானக் கொள்கையாக இருந்து வந்தது. 1889 ல் மேற்கொள்ளப்பட்ட
நிறமாலை சார்ந்த ஆய்வுகள் இதற்கு முழுமையான விளக்க அளித்தன.
அல்கோல் விண்மீனின் நிறமாலை நேரத்திற்கு ஏற்ப மாற்றம் பெறுகிறது. இந்த மாற்றமும் ஒரு வட்டச் சுற்று முறையில் உள்ளது.
அதாவது அல்கோல் விண்மீன் ஒளியின் நிறமாலை வரிகள் ஓர் அலைவு கால முறைப்படி இடம் பெயர்ந்து காணப்படுகிறது..
இதன் அலைவு காலமும் ,பிரகாசத்தின் அலைவு காலமும் மிகச் சரியாக ஒன்றாக இருப்பது பின்னர் தெரிய வந்தது. இது அல்கோல் நிறமாலை சார்ந்த ஓர் இரட்டை விண்மீன் என்பதைத் தெரியப் படுத்தியது. முதன்மை விண்மீனை ஒரு துணை விண்மீன் அலைவு கால முறைப்படி
மறைக்கும் போது அதன் பிரகாசமும் ,நிறமாலை வரிகளின் இடப்பெயர்வும் அலைவு கால முறைப்படி மாற்றம் பெறுகின்றன.
முதன்மை விண்மீனின் சுற்றியக்கத்தை டாப்ளர் பெயர்ச்சி (Doppler Shift ) காரணமாக அதன் நிறமாலையில்; ஏற்படும் மாற்றங்களைக் கொண்டு
அறியலாம் .விலகிச் சென்றால் செம்பெயர்ச்சி (Red Shift ) நெருங்கி வந்தால் நீலப் பெயர்ச்சி (Blue Shift ) ஏற்படும் என்று ஏற்கனவே உறுதியாக நிறுவப்பட்ட உண்மையால் இதை அறியமுடிகிறது .துணை விண்மீன் பொலிவின்றி மங்கலாக இருந்தால் .பிரகாசமான முதன்மை
விண்மீனின் ஒளிப் பொலிவில் மறைக்கப்படுவதால் ,அது வெறும் கண்களுக்குப் புலப்படுவதில்லை.




அல்கோல் விண்மீனின் பிரகாச- கால வரைபடத்தில் இரு முதன்மைச் சிறுமப் பிரகாசங்களுக்கு நடுவில் ஒரு சிறிய துணைச் சிறுமப் பிரக்காசம் காணப்
படுகின்றது .இது அல்கோலைச் சுற்றி வரும் துணை விண்மீன் முழுமையான கருமையான விண்ணுறுப் பில்லை என்பதைச் சுட்டிக் காட்டுகின்றது .
துணை விண்மீன் சூரியனைப் போல நிறையுடையதாக இருப்பினும் ,சூரியனை விட அளவில் பெரியது. இது இப்போது பெருஞ் சிவப்பு விண்மீனாக
பரிணாம வளர்ச்சி பெற்று வருகிறது. நமது சூரியன் இது போன்ற தோற்றத்தைப் பெற அதன் வயது இரு மடங்காக வேண்டும். அதாவது இன்னும்
10 ஆயிரம் மில்லியன் ஆண்டுகள் கடக்க வேண்டும்.
இரட்டை விண்மீன்களில் அல்கோல் பிரகாசமானதாகவும் ,சிறியதாகவும் ,துணை விண்மீன் பிரகாசம் குறைந்ததாகவும் ஆனால் பெரியதாகவும் இருக்கும் போது ,அவை சுற்றி வரும் போது ஒன்றையொன்று மறைக்கும் நிலைகளில் இது
போன்று சிறுமப் பிரகாசம் ஏற்படுகின்றது. பிரகாசமான் அல்கோல் மங்கலான துணை விண்மீனால் மறைக்கப்படும்போது அதாவது
துணை விண்மீனுக்குப் பின்னால் இருக்கும் போது ,முதன்மைச் சிறுமப் பிரகாசம் காணப்படுகின்றது . மங்கலான துணை விண்மீனை
அல்கோல் மறைக்கும் போது அதாவது அல்கோலுக்குப் பின்னால் துணை விண்மீன் இருக்கும் போது, துணைச் சிறுமப் பிரகாசம்
ஏற்படுகின்றது. இவ்விரு வேறுபட்ட மறைப்பு நிலைகளிலும் ,இரட்டை விண்மீனின் சராசரிப் பிரகாசத்தில் குறைவு ஏற்படுகின்றது.
அல்கோலின் பிரகாச- கால வரைபடம் நமக்கு மற்றோர் உண்மையையும் தெரிவிக்கின்றது. அல்கோலின் பிரகாசம் முதன்மைச்
சிறுமத்திலிருந்து துணைச் சிறுமத்தை அடைந்து பின்னர் மீண்டும் முதன்மைச் சிறுமத்தைப் பெருகிண்ட்ரகுடு. அதாவது இரு அடுத்தடுத்த
முதன்மைச் சிறுமத்திற்கு மிகச் சரியாக இடையில் துணைச் சிறுமம் அமைந்துள்ளது. அப்போது முதன்மைச் சிறுமத்திலிருந்து
பிரகாசம் அதிகரித்து துணைச் சிறுமத்தை எட்டி பின் பிரகாசம் குறைகிறது. இது நிலவின் கலைகள் போன்று நிலைக்கட்ட (Phase ) விளைவாகும்.

vinveliyil ulaa

பெர்சியஸ்

இந்த வட்டார விண்மீன் கூட்டத்தில் சுமார் 90 விண்மீன்கள்
காட்சி தருகின்றன. இதன் தோற்ற உருவத்தை கிரேக்க
புராணத்தில் வரும் பெர்சியஸ் என்ற வீரனைப் போல் உருவகப்படுத்தியுள்ளனர் . இவனுடைய வலக் கரத்தில்
ஒரு நீண்ட வாள் இருப்பது போலவும் இடக் கரத்தில்
அருவருப்பாகத் தோற்றம் தருகின்ற மதுசாவின் வெட்டப்பட்ட
தலையை ஏந்தி உள்ளது போலவும் சித்தரிக்கப்
பட்டுள்ளது. பெர்சியசின் தாய் டானே கருவுற்று
பெர்சியஸ்ஸைப் பிள்ளையாகப் பெற்றெடுத்தபோது ,
சீயஸ் பர்ர்க்க வருவது போல வந்து
தாயையும் ,பிள்ளையையும் சிறைப்பிடித்து ,
ஒரு மரத்தாலான பெட்டிக்குள் வைத்து கடலில்
வீசி எறிந்து விடுகின்றான் .பெர்சியஸ்
வளர்ந்து பெரியவனான பின், அவனுடைய தாத்தாவாகவும் ,
அர்கோஸ் நாட்டின் அரசனாகவும் இருக்கும் அக்ரீசியசைக்
கொன்று விடுவான் என்று அசரீறு வாக்குச் சொன்னதால் ,
இது அரசனுடைய உத்தரவால் நடந்தது. ஆனால் மரப்பெட்டி
கடலில் மிதந்து சென்று செரிபஸ் எனும் தீவை அடைய ,
அங்கு மீன் பிடித்துக் கொண்டிருந்த டிக்டைஸ் என்ற
மீனவன் இவர்களைக் காப்பற்றுகின்றான் .
இந்த டிக்டைஸ் அத் தீவிற்கு அரசனாக இருந்த
பாளிடெக்டெஸின் சகோதரனாவான் .இவனுடைய வளர்ப்பில்
பெர்சியஸ் பெரிய வீரனாக் வளர்கின்றான் .
சூன்யக்காரி மதுசா யாரையெல்லாம் பார்கின்றாளோ
அவர்களெல்லாம் வெறும் கல்லாகச் சமைந்து விடுகின்றார்கள் .
அதனால் அவளை வெட்டிக் கொன்று விட்டுத் திரும்பும்
வழியில் ஆண்ட்ரோமெடா என்ற இளவரசியை , சீட்ஸ்
என்ற திமிங்கிலத்தை கல்லாகச் சமைத்து விட்டு ,
அதன் பிடியிலிருந்து காப்பாற்றுகின்றான்.ஆண்ட்ரோமெடா
வட்டார விண்மீன் கூட்டத்திற்கு வடகிழக்கில் அமைந்துள்ள
இக்கூட்டத்தில் சில சிறப்பம்சம் கொண்ட விண்மீன்கள்
உள்ளன .பால்வெளி மண்டலத்தின் செறிவான பகுதி
பெர்சியஸ் வட்டார விண்மீன் கூட்டம் வழியாக ஊடுறுவிச்
செல்கிறது. அதனால் வானவியலாருக்கு இப்பகுதி கவர்ச்சி
மிகுந்ததாக இருக்கிறது. மேலும் பெர்சியசின்
கதையில் வரும் பல கதாபாத்திரங்கள் - பெரிச்யஸ்,
பிகாசஸ் ,இளவரசி ஆண்ட்ரோமெடா, சீட்ஸ் என்ற
திமிங்கிலம் , ஆண்ட்ரோமெடாவின் தாய் கசியோப்பியா ,
அவளுடைய கணவன் அரசன் சீபுஸ் எல்லாம் விண்வெளியில்
காணப்படும் வெவ்வேறு வட்டார விண்மீன் கூட்டங்களை
நினைவூட்டிக் கொண்டிருக்கின்றன.

மிர்பாக் என அழைக்கப்படும் ஆல்பா பெர்சி வெண்மையும்
மஞ்சளும் கலந்த மாபெரும் விண்மீனாகும். இதன் தோற்ற
மற்றும் சார்பிலா ஒளிபொலிவெண் முறையே 1 .79 , 4 .51
ஆகும். இது 592 ஒளி ஆண்டுகள் தொலைவில்
தளர்ச்சியாகவும் ,பெரிய அளவினதாகவும் உள்ள
மெலோட்(Melotte ) என்ற ஒரு விண்மீன் கூட்டத்தில்
காணப்படும் முதன்மை உறுப்பாகும் .

அல்கோல் எனப் பெயரிடப்பட்டுள்ள பீட்டா பெர்சி
இவ்வட்டார விண்மீன் கூட்டத்தில் காணப்படும் சிறப்புத்
தன்மை மிக்கதொரு விண்மீனாகும்.
அல்கோல் என்றால் அரேபிய மொழியில் பேயின் தலை
என்று பொருள். இது மதுசா என்ற தீய ஆவியின் தலையாகச்
சித்தரிக்கப்பட்டு அவளுடைய கொடூரமான கண்ணாக அல்கோல்
விளங்குகிறது. அல்கோலில் இன்னும் ஹைட்ரஜனே
முக்கிய எரிபொருளாக உள்ளது. இது ஒரு நூறு
மில்லியன் ஆண்டுகள் வயதானதாக இருக்கலாம் என
மதிப்பிட்டுள்ளனர்.

பீட்டா பெர்சி ஒரு மாறொளிர் விண்மீன் என்பதை 1667 ல்
இத்தாலி நாட்டு வானவியலார் கியோ வன்னி மோண்டனாரி
(Giovanni Montanari ) என்பார் கண்டுபிடித்தார் . இது
ஒன்றையொன்று மாறிமாறி மறைக்கின்ற நெருக்கமாக
அமைந்திருக்கும் இரட்டை விண்மீன் என்றும், சுற்றி வரும்
போது ஒன்றையொன்று இடைமறைபபதால் அது மாறொளிர்வது
போலத் தோன்றுகிறது என்றும் பின்னர் தெரிந்து கொண்டனர்.
முதன் முதலாக இனமறியப்பட்ட மறைவு மாறொளிர்
விண்மீன் இதுவாகும். பல நூற்றாண்டு காலம் பீட்டா
பெர்சி இடைமறைப்பு வகை மாறொளிர் விண்மீனுக்கு
எடுத்துக்காட்டாக விளங்கியது. அதற்குப் பிறகு பீட்டா பெர்சி
போல பல விண்மீன்களை விண்வெளியில் வானவியலார்
இனமறிந்தனர் என்றாலும் அவையாவும் அல்கோல் வகை என்றே அழைக்கப்பட்டன.

vinveliyil ulaa

மீராவும் அண்மைக் கால ஆய்வுகளும்

மீராவின் நிறமாலையை நுட்பமாக ஆராய்ந்த போது அது பற்றி
வேறு சில உண்மைகளும் தெரியவந்தன.1919 ல் மீராவின்
நிறமாலையில் வெப்ப மிக்க வெண்ணிற விண்மீன் ஒன்றின்
நிறமாலையும் மேற்பொருந்தி இருப்பதை அறிந்தனர் .
இது ஒரு B 8 வகை விண்மீன் போலத் தோன்றியது .
இவ்வகை விண்மீன்களின் புறப்பரப்பு வெப்பநிலை 18000
டிகிரி கெல்வின் ஆகவும், சாதாரண ஹீலிய அணுவின்
நிறமாலை வரிகளையும் கொண்டதாக இருக்கும். ஏறக்குறைய
நான்கு ஆண்டுகளுக்குப் பிறகு ,மீரா சிறுமப் பிரகாசத்தில்
இருக்கும் போது அதற்கு மிக அருகாமையில் தோற்ற
ஒளிப்பொலிவெண் 10 - 12 உடைய ஒரு சிறிய விண்மீன்
இருப்பதை அட்கின் என்ற வானவியலார் சுட்டிக்காட்டினார் .
இது 9 செகண்டு அளவே மீராவிடமிருந்து அப்போது விலகி
இருந்தது.இவ்விண்மீன் மீராவை சில 100 ஆண்டுகளுக்கு
ஒரு முறை சுற்றி வருகிறது என்று கண்டறிந்துள்ளனர். இவ்
விண்மீனும் ஒரு வகையான மாறொளிர் விண்மீன் என்றும்
இதுவும் உருமாற்றத்தால் பிரகாச மாற்றம் பெறுகிறது என்றும்
ஆராய்ந்து தெரிந்து கொண்டனர் .

மீராவின் துணை விண்மீன் மீராவின் நிறையைக் கணக்கிட
உதவியாய் இருக்கிறது .துணை விண்மீனின் நிறை 2.5
சூரிய நிறை என்றும் ,மீராவின் நிறை 1.5 -2 சூரிய நிறை
என்றும் மதிப்பிட்டுள்ளனர் .இது மீராவின் சராசரி
அடர்த்தி சூரிய அடர்த்தியில் 2 x 10^-7 மடங்கு எனத்
தெரிவித்துள்ளது. இது சற்றேறக் குறைய வெற்றிடத்தின்
அடர்த்திக்கு ஒப்பானது.

நீல நிறங் கொண்ட துணை விண்மீன் வெப்ப மிக்க ஓர்
இடைநிலைக் குள்ள விண்மீனாகும்.இது சாதாரண விண்மீனுக்கும்
சிறு வெள்ளை விண்மீனுக்கும் இடையில் அமைந்திருக்கிறது .
இதன் விட்டம் சூரிய விட்டத்தில் 10 ல் ஒரு பங்கே .
அடர்த்தியோ 3300 மடங்கு .இதன் சுற்றுக் காலம் 260
ஆண்டுகள் .இது மீராவிலிருந்து 8 பில்லியன் கிலோமீட்டர்
தொலைவில் இருப்பதாக மதிப்பிடப்பட்டுள்ளது .துணை
விண்மீன் தொடர்ந்து குளுர்ச்சியடையும் போது மீரா நீண்ட
காலத்திற்குப் பிரகாசமாக உள்ளது. மீரா விண்மீன் வீசும்
அடர்த்தியான காற்று ,துணை விண்மீனின் பரப்பில் மோதி
பேரளவு ஆற்றலை உமிழ்கிறது. இந்த ஆற்றல் துணை
விண்மீனால் கதிர் வீச்சாக வெளியே வீசப்படுகிறது என்று
இப்போது கண்டுபிடித்துள்ளனர்.

டௌ சீடி என்ற விண்மீனின் தோற்ற மற்றும் சார்பிலா
ஒளி பொலி வெண் முறையே 3.49,5.68 ஆகும். இது
சூரியனைப் போல 0.62 மடங்கு பிரகாசிக்கின்றது .இதன்
நிறை 0.85 சூரிய நிறையாகும். இது மிகவும் உயரளவு
தனித்த இயக்கமுடையதாகக் காணப்படுகின்றது .
விண்வெளியில் ஓராண்டுக்கு இது 2 செகண்டு தொலைவு
கடக்கிறது. இந்த இயக்கத்தை நாம் தெளிவாக உணரக்கூடியதாக
இருப்பதால் இது பூமிக்கு அருகாமையில் உள்ளது எனலாம் .
இது 12 ஒளி ஆண்டுகள் தொலைவில் இருப்பதாக
மதிப்பிட்டுள்ளனர். மிக அருகாமையில் இருக்கும் 20
விண்மீன்களுள் இதுவும் ஒன்று.

டௌ சீடி ஒரு மஞ்சள் நிற குறு விண்மீனாகும் .
சற்றேறக் குறைய நமது சூரியனை ஒத்திருக்கிறது .
என்றாலும் சூரியனை விட சற்று சிறியது ,குளிர்ச்சியானது .
இது இப்போது ஒரு A வகை விண்மீனாக உள்ளது. சூரியன்
ஓர் அச்சைப் பற்றி ஒரு மாத காலத்திற்கு ஒரு முறை
தனைத்தானே சுற்றி வருவதைப் போல ,இந்த விண்மீனும்
தற்சுழலுகிறது என்றாலும் சூரியனை விட விரைவாக
இயங்குகிறது .தூசி போன்று ஒரு படலம் இந்த விண்மீனைச்
சுற்றி காணப்படுகிறது. சூரியனுக்கு ஒரு குடும்பம்
இருப்பதைப்போல இதற்கு ஒரு குடும்பம் என்று அனுமானிக்க
இது இடம் தருகிறது. எனினும் என்று வரை எந்தக் கோளும்
இனமறியப்படவில்லை.

டௌ சீடி யின் நிறமாலை அதில் சிறிய அளவில்
உலோகங்கள் இருக்கலாம் என்பதை உணர்த்தியிருக்கிறது.
டௌ சீடி யின் உலோகத் தன்மையே ,அதற்கு கோள்
இருக்கலாம் என்ற ஐயத்தை ஏற்படுத்தியது. இந்த உலோகத்
தனிமங்கள் டௌ சீடி யால்உமிழப்பட்டு வெளியேறும் போது
கோளாக உறைந்து போக வாய்ப்பிருப்பதால்
வானாவியலார் அவ்வாறு உருவாகியிருக்கலாம் என நம்பினார் .
டௌ சீடி F வகை விண்மீனாகத் தொடங்கி அதன் தற்சுழற்சி
வீதம் திடீரென்று தாழ்ந்திருக்க வேண்டும் என்று
கொள்கையாளர்கள்கருத்துத் தெரிவித்துள்ளனர் .இதற்கு
அந்த குளிர்ந்த விண்மீனைச் சுற்றி வரும் கோள்களே காரணமாக
இருக்கலாம் .இக் கோள்கள் விண்மீனின் கோண உந்தத்தை
உள்வாங்கிக் கொள்வதால் விண்மீனின் சுழற்சி வேகம்
மட்டுப்படுத்தப்படுகிறது. நமது சூரியனைப் போல உயிரினம்
உள்ள கோள்களைப் பெற்றிருக்கலாம் என்று பொதுவாக
நம்பப்படுகிறது . அமெரிக்க விண்வெளி
ஆய்வாளர்கள் இந்த விண்மீனை நோக்கி சமிக்கை
அலைகளை அனுப்பி வைத்தார்கள்.ஆனால் அதற்கு பதில்
மொழியாக எந்த சமிக்கை அலைகளும் எதிரொளிக்கப்
படவில்லை. இது அங்கு உயிரினம் இல்லாததையோ
அல்லது உயிரினம் இருந்து செய்திப் பரிமாற்றம் பற்றிய நுட்பம் அறியாதவர்களாகவோ இருக்கலாம் என்பதைத் தெரிவிக்கிறது .

இவ் வட்டார விண்மீன் கூட்டத்தில் M 77 என்று பதிவு
செய்யப்பட்டுள்ள ஒரு சுருள் புய அண்டம் உள்ளது. இதன் பரந்த
முகப் பரப்பு தெரியுமாறு இது விண்ணில் விரவியுள்ளது .இது
மிகவும் பிரகாசமான மையத்தைப் பெற்றுள்ளது. இதை சைபெர்ட் அண்டம் (Seyfert galaxy ) என அழைக்கின்றார்கள் .

vinveliyil ulaa

மீரா விண்மீனின் நிலை

விண்மீனின் வெப்பநிலை அதிகரிக்கும் போது, அதிலுள்ள கனிம
வேதிப் பொருட்கள் சிதைவுறுகின்றன. அதனால் வளிமண்டலம்
ஒளி உட்புகு தன்மையைப் பெறுகிறது. குளிர்ச்சியுறும் போது இந்த
வழிமுறை பிற்போக்காக நடைபெறுகிறது. விண்மீன் பெருமப்
பிரகாசத்தில் இருக்கும் போது வெப்ப மிக்க ஹைட்ரஜன்
அதன் புற மண்டலத்தில் விண்மீனால் உமிழப்பட்டு, விண்மீனின்
பிரகாசத்தை அதிகரிக்கச் செய்கிறது.இவை நிறமாலையில்
பிரகாசமான உமிழ் வரிகளை ஏற்படுத்தக் காரணமா யிருகின்றன.
மீராவின் புறப் பரப்பின் துடிப்பு, அதன் புறப் பரப்பிலிருந்து
எல்லாத் திசைகளிலும் 20 கிமீ/வி என்ற வேகத்தில்
வீறிட்டெழும் புழுதிக் காற்றினால் விண்மீனின் மூலப்பொருள்
தடையின்றி வெளியே விரவிச் செல்ல துணை செய்கிறது.
இது விண்மீனை விட்டு நெடுந் தொலைவு கடந்து சென்ற பின்,
குளிர்ந்து திண்மமாக உறைகிறது. .விண்மீனின்
சேர்மானப் பொருளைப் பொறுத்து இது மக்னீசியம் அல்லது
இரும்பு சிலிகேட்டாக இருக்கலாம். புகையில் உள்ளது
போலத் தூள் வடிவக் கார்பனாகவும் இருக்கலாம். இவை
அங்கு ஒரு மறைப்பூடகமாக நிலைபடுவதால்
சில காலத்திற்குப் பிறகு ஒளிரும் எஞ்சிய விண்மீனின்
உள்ளகத்தை மறைத்து விடுகிறது. மீராவின் இந்நிலையை
பரிணாம வளர்ச்சிப் படிகளின் மூலம் விளக்கியுள்ளனர்.விண்மீனின்
ஹைட்ரஜன் எரிபொருள் தீர்ந்த பின் அதன் கட்டமைப்பில்
குறிப்பிடும்படியான மாற்றங்கள் அடுத்தடுத்து ஏற்படுகின்றன.
ஈர்ப்பால் சுருங்கி மையம் சூடாகின்றது . போதிய
சூடடைந்தவுடன் ஹீலியம் அணு எரிபொருளாகப் பயன்படத்
தொடங்குகிறது .
ஆனால் உள்ளகத்தைச் சுற்றியுள்ள புற அடுக்குகளில்
ஹைட்ரஜன் தொடர்ந்து ஹீலியமாக மாறுகிறது.
அப்போது புற அடுக்கு தீவிரமாக விரிவடைந்து குளிர்ச்சியடைகிறது . இந்நிலையில் இருக்கும் மீரா
பெருஞ்சிவப்பு விண்மீனாகக் காட்சிதருகிறது. இது நமது
சூரியனின் எதிர்காலம் எப்படி இருக்கும் என்பதை எடுத்துக்
காட்டுவதாக இருக்கிறது .

மீராவின் உள்ளகத்தில் ஹீலியம் பிணைவுற்று கார்பனாக மாறிக் கொண்டிருக்கிறது .ஒரு சில காலத்திற்குப் பின்
இது மஞ்சள் நிறப் பெரு விண்மீனாக உருமாறும். புறவோட்டுப்
பகுதியில் ஹைட்ரஜனே இன்னும்
எரிபொருளாகக் கொள்ளப் படுவதால் விண்மீனின் விரிவாக்கம்
அதனால் ஓரளவு கட்டுப்படுத்தப் படுகிறது.
அங்கு ஹைட்ரஜன் தீர்ந்தவுடன் விண்மீன் மேலும் விரிவுற்று
பெருஞ்சிவப்பு விண்மீனாகும். அப்போது
அதன் ஒளிர் திறன் இன்னும் அதிகமாக இருக்கும் .ஹீலியம்
மையத்தில் தீர்ந்த பின் ,ஹீலியம்
புறவோட்டுப் பகுதியில் தொடர்ந்து எரிந்து கார்பனாகும் .இந்த
நிலையில் மீரா இப்பொழுது உள்ளது என ஆராய்ச்சி
யாளர்கள் கூறுகின்றார்கள்.
இந்நிலைக்குத் தள்ளப்பட்ட மீரா இன்னும் நீண்ட காலம் வாழ வாய்ப்பில்லை .அழிவை எதிர் நோக்கிக் காத்துக் கொண்டிருக்கும்
ஒரு விண்மீன் மீராவாகும். துடிப்பின் மூலம் பெருமளவு
மூலப்[பொருளை இவ் விண்மீன் வெளியில்
உமிழ்ந்து கொண்டிருக்கிறது. இன்னும் 10000 ஆண்டுகள் இதன்
புற வோட்டுப்பகுதி முழுவதும் வெளியேறி
பரந்த புகைப்படலமாக அதைச் சுற்றி நெடுந் தொலைவு வரை
விரவி இருக்கும். அப்போது இது கோளவடிவ
நெபுலாவாகக் காட்சி தரும் . நம்முடைய சூரியன் இன்னும் 5000
மில்லியன் ஆண்டுகளில் ஏறக்குறைய
இதே வழிமுறையைப் பின்பற்றி கோளவடிவ நெபுலாவாக
உருமாறலாம் என்று கூறுகிறார்கள் .