cartoon

கார்ட்டூன்

அமைச்சர் : மன்னா,நாட்டில் வீடு புகுந்து கொள்ளை அடிப்பது தொடர்ந்து அதிகரித்து வருகிறது.இன்றிரவு மாறுவேடமிட்டு திருடர்களைப் பிடிக்கப் போகலாமா ? மன்னர்: வேண்டாம் அமைச்சரே,இனி வீட்டில் திருட ஒன்றுமில்லாவிட்டால் திருட்டே இருக்காது.மக்களும் திருட்டு பயமின்றி வாழலாமே.

Vethith thanimangal-Chemistry

வேதித் தனிமங்கள் -ஆர்கான் (Argon )-கண்டுபிடிப்பு வளி மண்டலத்தில் உள்ள காற்று பல வளிமங்களின் கலவையாலானது. பரும அளவில் அதில் நைட்ரஜன் 78.09 % ஆக்சிஜன் 20.95 % உள்ளன. இதையடுத்து மந்த வளிமங்களுள் ஒன்றான ஆர்கான் ௦.93 % உள்ளது. கார்பன் டை ஆக்சைடு வெறும் ௦.03 % தான் உள்ளது இதைத் தொடர்ந்து நியான்,ஹீலியம்,கிரெப்பிடான் போன்ற மந்த வளிமங்கள் உள்ளன. மந்த வளிமங்களின் அணுக்களில் எலெக்ட்ரான் கூடுகள், எலெக்ட்ரான்களால் முழுமை பெற்றிருப்பதால் முழுமை பெறவேண்டி, பிற தனிமங்களை நாடி வேதி வினையாற்றுவதில்லை.அதனால் மந்த வளிமங்களின் அணுச் சேர்க்கையினால் வேதிச் சேர்மங்கள் இயல்பான சூழல்களில் இருப்பதில்லை.மந்த வளிமங்களுக்கு வளிமண்டலக் காற்றே மூலமாக இருப்பதால் அதைப் பண்டுவப்படுத்தியே மந்த வளிமங்களைப் பிரித்தெடுக்க வேண்டியதாக இருக்கிறது. 1766 ல் ஹைட்ரஜன் தனிமத்தைக் கண்டுபிடித்த ஆங்கிலேயரான ஹென்றி காவெண்டிஸ் வளிமங்களின் ஊடே மின்னிறக்கம் செய்து அதில் ஆர்கான் இருப்பதை ஒருவாறு ஊகித்தார். எனினும் அது அறிவியல் பூர்வமாக 1894 ல் இங்கிலாந்து நாட்டு இயற்பியல் வல்லுனரான லார்டு ரலே என்பாரால் கண்டுபிடிக்கப்பட்டது.ஸ்காட்லாந்து நாட்டு வேதியியலாரான வில்லியம் ராம்சே ,ஆர்கானை நிறமாலை மூலம் இனமறிந்து வெளிப்படுத்தினார். ஆர்கான் நிறமாலையில் சிவப்பு முனைப் பகுதியில் சிறப்பு வரிகளைப் பெற்றிருக்கிறது கிரேக்க மொழியில் அர்கோஸ் (அர்கோஸ்) என்றால் சோம்பேறி என்றும் மந்தம் என்றும் பொருள். அப்போது புதிதாக இனமறியப்பட்ட ஆர்கான் ,பிற தனிமங்களைப் போல வேதி வினைகளில் ஈடுபடாமல் தனித்திருந்ததால் அதற்கு அப்பெயரிட்டனர். பண்புகள் ஆர்கானின் அணுவெண் 18 அணு நிறை 39.948.இதன் உறை நிலை - 189.2 டிகிரி C ,கொதி நிலை -185.7 டிகிரி C .ஆற்கானின் கொதி நிலை நைட்ரஜனுக்கும் ஆக்சிஜனுக்கும் இடைப்பட்டதாக இருக்கிறது. வர்த்தக அடிப்படையில் காற்றை நீர்மமாக்கி,காய்ச்சி வடித்தல் மூலம் ஆர்கானைப் பிரித்தெடுக்கின்றார்கள்.இதன் அடர்த்தி ௦.166 கிகி/கமீ.ஆர்கான் நீரில் நைட்ரஜனை விட 2.5 மடங்கு கூடுதலாகக் கரைகின்றது .ஏறக்குறைய ஆக்சிஜனின் கரைதிறனுக்குச் சமமாக இருக்கிறது. ஆர்கான் வளிம, நீர்ம நிலைகளில் நிறமற்றதாகவும்,மணமற்றதாகவும் இருக்கிறது. மந்தத் தன்மை காரணமாக இது வேதிச் சேர்மங்களை ஏற்படுத்துவதில்லை என்று நீண்டகாலமாக நம்பப் பட்டது.ஆனால் 2000 ஆண்டில் பின்லாந்து நாட்டு ஆராய்ச்சியாளர்கள் வேதிச் சேர்மங்களை உருவாக்கிக் காட்டினார்கள்.புளூரின்,ஹைட்ரஜனுடன் சேர்ந்த ஆர்கான் கூட்டுப் பொருள் ஆர்கான் புளுரோ ஹைட் ரைடு (HArF) ஆகும் . இது தீவிரமாக உடைந்து நொருங்கக் கூடியதாகவும் -265 டிகிரி C தாழ்ந்த வெப்ப நிலையில் மட்டுமே நிலைத்திருக்கக் கூடியதாகவும் இருக்கின்றது.(ArKr)+,(ArXe)+,(NeAr)+ போன்ற அயனிகளை நிறமாலை மூலம் இனமறிந்துள்ளனர். ஆர்கான்,பீட்டா ஹைட்ரோ குயினோன் உடன் இணைந்து கிளாத் ரேட்டுகளை (Clathrate) உண்டாக்குகின்றன.இவை ஓரளவு கூடுதல் நேரம் நிலைத்திருக்கின்றன.எனினும் ஆர்கான் சேர்மங்களில் உண்மையான வேதிப் பிணைப்புகள் இருப்பதில்லை.வான் டெர் வால் விசை மூலம் அவ்வணுக்கள் ஒன்றிணைந்திருப்பதாகக் கண்டறிந்துள்ளனர். பயன்கள் புவி வளிமண்டலத்தில் செழுமை வரிசையில் மூன்றாவதாக அதிக அளவில் கிடைப்பதால்,பிற மந்த வளிமங்களை விட ஆர்கான் உற்பத்தித் துறைகளில் பயன்படுகிறது. இழை விளக்குகளில் பல்புக்குள் உள்ள காற்றை நீக்கா விட்டால்,இழை ஆக்சிஜனுடன் சேர்ந்து எரிந்து விடும் வாய்ப்பைப் பெறும்.இதனால் காற்றை நீக்கி,அதற்குப் பதிலாக ஆர்கானை இட்டு நிரப்புவார்கள்.இதனால் டங்ஸ்டன் இழை அரிமானத்திற்கு உட்படுவது பெரிதும் தவிர்க்கப் படுகிறது.ஆவியாக்கப் படுவதால் பல்பின் உட்சுவர் கருமை பூசப்படுவதும் இதனால் தடுக்கப் படுகிறது.குழல் விளக்குகளிலும் சிறிதளவு ஆர்கானைப் பயன் படுத்துகின்றார்கள் . உலோகங்களைப் பற்ற வைக்கும் வழிமுறையில் மந்த வெளிச் சூழலை ஏற்படுத்திக் கொள்ள ஆர்கான் வளிமம் பயன்படுத்தப் படுகின்றது. டைடானியம் போன்ற வீரிய மிக்க தனிமங்களின் உற்பத்தி முறையில் ஆர்கானைக் காப்புத் திரையாகப் பயன்படுத்தி தூய தனிமத்தைப் பெறுகின்றார்கள். இதே காரணத்தினால் குறைக் கடத்திக்காக உற்பத்தி செய்யப்படும் சிலிகான்,ஜெர்மானியத்தை 100 சதவீதம் தூய நிலையில் பெறமுடிகின்றது. கெய்கர்-முல்லர் எண்ணி (GM Counter) யில் ஆர்கானை இட்டு நிரப்பி ,அதன் வழியாக அயனிக்கும் ஆற்றல் படைத்த கதிர்களைச் செலுத்தும் போது ,சிறிய அளவில் ஏற்படும் மின்னிறக்கத்தை அளவிட்டு கதிர் வீச்சின் வலிமையை அறிகின்றார்கள். பழம் பாறைகளின் வயதை மதிப்பிடும் வழிமுறையில் சிதைவாக்க விளை பொருளாக ஆர்கானின் சம அணு எண்மம் (isotope)உள்ளது .பாறைகளில் 1.25 பில்லியன் ஆண்டுகள் என நீண்ட அரைவாழ்வுக் காலம் கொண்ட பொட்டாசியம்-40 என்ற அணு எண்மம் உள்ளது .இதன் சிதைவினால் ஆர்கான் விளைகிறது பொட்டாசியம் மற்றும் ஆர்கானின் செழுமையை அளவிட்டறிந்து பாறையின் வயதை மதிப்பிட முடியும் .

kavithai

வளமான இந்தியா வறுமையான மக்கள் இந்தியாவில் அரசியல்வாதிகள் இருக்கின்றார்கள் இருந்தும் நிறைவான அரசியல்தானில்லை பணத்தைக் கொடுத்து பதவியைப் பிடிப்பார்கள் பதவியைக் கொண்டு பணத்தைப் பறிப்பார்கள் பிறரறியச் சொல்வதை தெரியச் செய்யமாட்டார்கள் அறியாமல் செய்வதை வெளியே சொல்லமாட்டார்கள் காப்பவர் கள்வனானார் காண்பவர் கற்றுத்தேர்ந்தார் எல்லோரும் கள்வனாக இவர்களே காரணமானார் கற்றவனுக்கு பெற்ற கல்வியே தகுதி உழைப்பவனுக்கு உற்ற உடலே தகுதி அனைவருக்கும் பதவிக்கு வேண்டும் ஒருதகுதி அரசியல்வாதிக்கு என்றுமில்லை சிறுதகுதி தகுதி இல்லாதோர் மிகுதியாகிப் போனதால் சகதிகளே இங்கே சந்தனம்போல் ஆனது பாராளுமன்றத்தில் படுத்துக் கூட உறங்குவார்கள் பாமரமக்ககளை கனவில் கூட காணமாட்டார்கள் பதவிக்காக ஒருவர்மிதொருவர் குற்றம் கூறுவார்கள் மக்களுக்காக ஒருநாளும் நன்மை செய்யமாட்டார்கள் சேவையின்றி திட்டங்கள் பல தீட்டுவார்கள் தேவையின்றி வரிப் பணத்தை வீணாக்குவார்கள் முழுதும் செலவானாலும் முன்னேற்றம் இருப்பதில்லை வளமான இந்தியா வறுமைமக்கள் மாற்றமில்லை இந்தியாவில் அரசியல்வாதிகள் இருக்கின்றார்கள் இருந்தும் நிறைவான அரசியல்தானில்லை

Vethith Thanimangal-Chemistry

வேதித் தனிமங்கள்- குளோரின் -பயன்கள்

நீரில் குளோரின் கரைகிறது.அதைக் குளோரின் நீர் என்பர்.நீரைக் கொதிக்க வைத்தால் குளோரின் வெளியேறிவிடுகிறது.சூரிய ஒளியில் குளோரின் நீர் ஹைட்ரோ குளோரைடாக மாறுகிறது.அப்போது ஆக்சிஜன் வெளியேறுகின்றது . நீரில் உள்ள நோய்க் கிருமிகள்,தீமை பயக்கும் நுண்ணுயிரிகள் இவற்றைப் பேரளவில் அளிக்க குளோரின் வளிமம் பயன்படுகின்றது.இதனால் குடி நீர் விநியோக முறையிலும் ,நீச்சல் குளத்திலுள்ள நீரைத் தூய்மையூட்டுவதிலும் குளோரினைப் பயன்படுத்துகின்றார்கள் .குளோரின் நுண்ணுயிரிகளை ஓரளவு விரைவாக அழிக்கும் மலிவான பொருளாகும்.எனினும் வைரஸ் எனப்படும் சில நச்சுயிரிகளை குளோரினால் அழிக்க முடிவதில்லை.மேலும் நீரிலுள்ள சில கரிமப் பொருட்களுடன் வினை புரிந்து,புற்று நோய்க் காரணிகளுள் ஒன்றாகக் கருதப் படுகின்ற டிரைகுளோரோ மீத்தேனை உற்பத்தி செய்து விடுகிறது .இதனால் குளோரின் பண்டுவம் குடி நீருக்கு முழுமையான வழி முறை எனக் கூற முடியாது.மேலும் குளோரினால் நீரின் இயல்பான சுவை குன்றிப் போகிறது.இதனால் இன்றைக்கு குளோரினுக்குப் பதிலாக ஓசோனைப் பயன்படுத்துகின்றார்கள் குளோரின் வெளுப்பூட்டியாகச் செயல்படுகின்றது பயனுறுதிறன் மிக்க வெளுபூட்டியின் வளர்ச்சி நீண்ட காலமாக இருந்து வருகிறது. தொடக்கத்தில் குளோரின் நீரே இதற்குப் பயன்படுத்தப் பட்டது.ஆனால் உற்பத்தி செய்யப்படும் ஹைட்ரோ குளோரிக் அமிலம் பருத்தி,லினன் ஆடைகளைப் பாதிக்கின்றது .இன்றைக்கு வீடுகளில் பயன்படுத்தப் படும் நீர்ம வெளுபூட்டி சோடியம் ஹைபோ குளோரைட்டின் மென் கரைசலாகும் .குளோரின் வளிமம் காகிதம்,அட்டை போன்ற பொருட்களை உற்பத்தி செய்யும் ஆலைகளில் வெளுபூட்டியாகப் பயன் படுகிறது.பாலி வினைல் குளோரைடு(PVC)போன்ற நெகிழ்மங்களை(Plastic) உற்பத்தி செய்யும் முறையில் குளோரின் ஒரு மூலப் பொருளாகும் .அரிமானத்திற்கு உட்படாததாலும்,எடை குறைந்ததாக இருப்பதால் கையாளுவதற்கு எளிதாக இருப்பதாலும் ,நீர் மற்றும் நீர்மங்களை எடுத்துச் செல்லும் குழாயாக இரும்பிற்குப் பதிலாக இன்றைக்கு நெகிழ்மக் குழாய்கள் பயனில் உள்ளன.கண்ணாடி போன்று நிறமற்ற நெகிழ்மங்கள் நீர்மங்களை வைத்திருக்கும் கொள்கலனாகப் பயன்படுகின்றன பல்வேறு பொருட்களின் உற்பத்தி முறையில் குளோரின் பயன்படுத்தப் படுகின்றது.சாயங்கள்,துணிகள்,பெட்ரோலியப் பொருட்கள்,மருந்துப் பொருட்கள்,நஞ்சுத் தடை மருந்துகள்,பூச்சி கொல்லி மருந்துகள்,உணவுப் பண்டங்கள்,கரைப்பான்கள்,வண்ணப் பூச்சுகள் எனப் பலதரப்பட்ட மக்கள் பயன்பாட்டுப் பொருட்களின் உற்பத்தி முறையில் குளோரினின் முக்கியம் உணரப்பட்டுள்ளது.பயன்களைத் தரும் வேறு பல வேதிப் பொருட்களை உற்பத்தி செய்வதற்கு குளோரின் ஒரு மூலப் பொருளாகவும் உள்ளது.இவற்றுள் கார்பன் டெட்ரா குளோரைடு,குளோரோபாம் போன்றவற்றைக் குறிப்பிட்டுச் சொல்லலாம்.எண்ணெய் மற்றும் மசகுப் பொருட்களுக்கு கார்பன் டெட்ரா குளோரைடு ஒரு கரைப்பானாக உள்ளது.துணிகளை நீரில் நனைக்காமலேயே சலவை செய்ய இந்தக் கரைப்பான் பயன்படுகிறது.எனினும் ஈரலுக்கு மிகவும் நஞ்சானது என்பதால் இப் பயன்பாடு மட்டுப் படுத்தப் பட்டுள்ளது.குளோரோபாம் எளிதில் ஆவியாகக் கூடிய நீர்மம்.இது அறுவைச் சிகிச்சையின் போது மயக்கமூட்டும் மருந்தாகப் பயன்படுத்தப் படுகின்றது.இது ஈரல் மற்றும் சிறுநீரகங்களைத் தீவிரமாகப் பாதிக்கின்றது என்பதால் இதைக் கவனமாகக் கையாள வேண்டியது அவசியமாகும். குளிர் சாதனங்களில் உறைபதனப் பொருளாக (refrigerant) குளோரோ புளுரோ கார்பன் நெடுங்காலமாகப் பயன் படுத்தப்பட்டது.ஆனால் இது குளோரினின் தனிக் கூறுகளை (free radical) வெளியிட்டு வளி மண்டலத்தின் மேல் அடுக்குகளில் தங்கி பாதுகாப்புக் கவசமாக விளங்கும் ஓசோன் படலத்தைச் சிதைத்து அழிக்கின்றது என்பதால் இப் பயன்பாடு இன்றைக்குப் புறக்கணிக்கப் பட்டுள்ளது .

Kavithai

நியூட்டனின் இயக்க விதிகள் புறவிசை ஒன்று புரிதலின்றி எப்பொருளும் நிலமிசை நிலை மாற்றமின்றி நீடித்திருக்கும் இயங்கும் நிலையோ இயங்கா நிலையோ ஓய்வு நிலையோ ஓடும் நிலையோ நிலைமாற பொருளின் நிறையே தடையாகும் நியூட்டனின் முதல் இயக்கவிதி இதுவாகும். புறவிசை இன்றி அசைவிலா எப்பொருளும் அறவே இயக்கமின்றி ஓய்ந்து கிடக்கும் புறவிசை இன்றி இயங்கும் அப்பொருளும் சிறிதே மாற்றமின்றி தொடர்ந்து இயங்கும் இயக்கமாற்றம் புறவிசை இருக்குமட்டும் இதுவே இவ்விதிகூறும் பொருளாகும் வேகம் என்பது இடபெயர்ச்சி வீதமாகும் முடுக்கம் என்பது வேகமாற்ற வீதமாகும் செல்லும் திசை மாற்றமும் முடுக்கமே புறவிசைகூட அத்திசை முடுக்கம் கூடுமே புறவிசை குறைய முடுக்கமும் குறையுமே இரண்டாம் இயக்க விதி இதுவாகும் ஒரு நிறைப் பொருட்களில் புறவிசையும் ஒன்றிய முடுக்கமும் நேர்விகிதத் தொடர்பில் வேறு நிறைப் பொருட்களில் தீண்டும் ஒரே புறவிசையால் விளையும் முடுக்கம் நிறைக்கு எதிர் விகிதத்தில் இருக்கும் இதுவே இவ்விதிகூறும் பொருளாகும் விதையொன்று போட்டால் சுரையொன்று முளைப்பதில்லை வினையொன்று புரிந்தால் விளைவின்றி இருப்பதில்லை எறிந்த பந்து எம்பியே தீரும் மூன்றாம் இயக்க விதி இதுவாகும் விழுந்த பந்து வினையென்றால் எழுந்த பந்து எதிர்வினையாகும் வினையிருந்தால் விளைவிருக்கும் விளைவிருந்தால் வினையிருக்கும் வினையும் எதிர் வினையும் சமமே இதுவே இவ்விதிகூறும் பொருளாகும்

Micro aspects of developing inherent skill-4

மாற்றம் வேண்டும்,மாற வேண்டும் மாற்றம் வேண்டும் என்பதில் உறுதியாகவும்,உண்மையாகவும் இருக்க வேண்டும். பலர் அப்படி இருப்பதில்லை.சிகை அலங்காரத்தை மாற்றுவதாலோ,கைக் கடிகாரத்தை மாற்றுவதாலோ,பிரஞ்சு பியர்டு வைத்துக் கொள்வதாலோ,வேட்டிக் கரையை மாற்றுவதாலோ ,கும்பிடும் சாமியை மாற்றுவதாலோ ஒருவர் நினைக்கும் மாற்றங்கள் நிஜமாவதில்லை.மாற்றம் வேண்டும் என்பது ஒரு தொடக்கம்.அது தீர்மானமாய் இருக்கும் போது அடுத்த கட்டத்தை நோக்கிச் செல்வது எளிதாகிறது.அதனால் திறந்த மனதுடன் மாற வேண்டும் என்ற ஒருவருடைய முதல் தீர்மானம் முக்கியமானதாகிறது.அதாவது இப்படி ஒரு தீர்மானம் எடுக்காமல் யாரும் மாற்றத்தின் பாதையில் அடி எடுத்து வைக்க முடியாது.வேறு எந்த மாற்றங்கள் குறிந்து எடுக்கப்படும் முடிவுகளும் செயல் நிலைக்கு வராமல் மனதிற்குள்ளேயே புதைந்து போகும். பெரும்பாலான மக்கள் தீர்மானம் மேற்கொள்ளும் நிலையைத் தாண்டி ஒருபோதும் செல்வதில்லை. மாற்றம் வேண்டும் என்று நினைத்த பலர் மாறிய நிலையை அடையாமல் போவது இதனால் தான். மாற்றங்களை எப்படிச் செய்ய வேண்டும் என்பதற்கான விளக்கங்கள் முதலில் அம்மாற்றத்தை மேற்கொள்ள வேண்டும் என்ற தீர்மானத்திற்குப் பிறகே வருகிறது. இத் தீர்மானம் மாற்றத்தை அடைவதற்கான வழிமுறைகளைத் தீர்மானிக்கத் தேவையான நுண்ணறிவையும் ,செயல் திறனையும் தருகின்றது இலக்கைச் சரியாகத் தீர்மானித்தவன் அதை எட்டும் வழியை எளிதாகத் கண்டுபிடித்து நடைமுறைப்படுத்தி விடுகிறான் மாற்றம் தொடர்பாக எடுக்கும் ஒரு தீர்மானம் தவறாகக் கூட இருக்கலாம் தவறான தீர்மானத்தை எடுப்பது தவறில்லை ஆனால் தீர்மானமே எடுக்காமல் இருப்பதுதான் தவறாகும் ஏனெனில் தவறான ஒரு தீர்மானத்தை பிற்பாடு திருத்திக் கொள்ள முடியும் ,இல்லாத தீர்மானத் தில் அப்படியொரு அனுகூலமில்லை. தவறுகள் அனுபவங்களினால் கற்றுக்கொள்ளும் பாடங்கள்.இந்தப் பாடத்தைப் படித்தவன் வாழ்கையில் அதுபோன்ற தவறு மீண்டும் வருவதேயில்லை.ஆனால் தவறுகளின்றி வெற்றி பெற்றவன் வாழ்கையில் தவறுகள் நிகழ்வதற்கு வாய்ப்பிருக்கிறது.ஏனெனில் செய்யாத தவறுகளினால் எதையுமே முழுமையாகக் கற்றுக் கொள்ள முடியாது பலர் விரிவான திட்டங்களைத் தீட்டுவார்கள் ஆனால் அதற்காகத் தங்களை அர்ப்பணித்துக் கொண்டிருக்க மாட்டார்கள்.அதனால் அவர்களுடைய முயற்சியில் எந்தவிதமான முன்னேற்றத்தையும் காண மாட்டார்கள்.நீண்ட காலமாகத் தொடரும் தீர்மானமின்மை அவநம்பிக்கை,சந்தேகம்,பயம் போன்ற அகத்தடைகளை ஊக்குவித்து ஒவ்வொருவரும் அவர்களாலேயே தோற்றுப் போகச் செய்யும். ஓடாத காருக்கு திசை தெரியவேண்டியதில்லை.ஆனால் அந்தக் கார் ஓடத் தொடங்கினால் அதற்கு செல்லும் திக்குத் தெரிய வழிகாட்டல்கள் கிடைக்கின்றன. அதுபோல ஓய்வாக உட்கார்ந்திருப்பவனுக்கு வழிகாட்டிகள் தேவையில்லை,அவன் எண்ணத்தில் அவைகள் தோன்றுவதுமில்லை.ஆனால் வண்டியில் பயணம் செய்து இயக்கத்திலிருப்பவனுக்கு செல்லும் திசை தெரியவேண்டும்.இலக்கை நோக்கி இயங்கத் தொடங்கியதுமே வழிநெடுக வழிகாட்டல்கள் கிடைக்கிறன.ஓய்வு நிலையிலிருந்து இயக்க நிலைக்கு மாறிக்கொள்ளும் போது இந்த வழிகாட்டுதல்கள் நமக்குள்ளே இயல்பாகத் தோன்றுகின்றன. அது மாற வேண்டும் என்ற உறுதியான தீர்மானம் தந்த ஆற்றல்.மாற வேண்டும் என்று எப்பொழுது உறுதியான,உண்மையான தீர்மானம் எடுத்துவிட்டோமோ அப்பொழுதே வெற்றி நிச்சியமாகி விடுகிறது என்று இதனால்தான் கூறுகின்றார்கள்.

Mind without fear

மரம் -சமுதாய வாழ்க்கைக்கு வழிகாட்டும் ஒரு பாடம் எப்பொருளும் அப்படியே தனித்திருந்தால் அப்பொருளால் யாருக்கும் பயனில்லை. யாருக்காவது பயன் தருமாறு தன்னை மாற்றிக் கொள்ளாதவரை அதற்கும் பெருமையில்லை. விதை விதையாகவே விழுந்து கிடந்தால் அதற்கும் வாழ்க்கை இல்லை அதனால் பிறருக்கும் பயன் இல்லை. அதனால் விதை வேர் விட்டு ,துளிர் விட்டு முழித்துப் பார்க்கிறது.இது யாருக்காக ? நிலத்திலிருந்து நீரையும் காற்றிலிருந்து கார்பன்டை ஆக்சைடையும் உறிஞ்சி எடுத்துக் கொண்டு வளர்கிறது.இது யாருக்காக ? பருவத்தில் பூப் பூத்து,காய் காய்த்து விளைச்சலைத் தருகிறது. இது யாருக்காக ? எல்லாம் சாகாத சமுதாயத்திற்காக,உலகில் உயிர் வாழும் எல்லா உயிரினங்களுக்கும் பயன் தருவதற்காக. மரத்தின் நோக்கமே மற்றவர்களுக்கு பயன் தருவதுதான் .அது வேர் விட்டு துளிர் விட்டுச் சின்னச் செடியாக இருக்கும் போதே மக்களுக்கு ப் பயன்பட வேண்டும் என்று விரைந்து செயல் பட்டிருந்தால் விளைச்சலைத் தாங்க முடியாது முறிந்து மடிந்து போயிருக்கும். தான் வழங்கும் பயன் உறுதியானதாக இருக்கவேண்டும் என்பதற்காக அது பயன் தரும் காலம் வரை தன்னை வளர்த்துக் கொள்ள பொருளை உறிஞ்சி எடுத்துக் கொண்டு தன்னைத் தகுதிப் படுத்திக் கொள்கிறது .பயனீட்டும் காலம் வந்தவுடன் பிறருக்குப் பயன் தருவதற்காக மட்டுமே பொருளை உறுஞ்சிக் கொள்கின்றது . ஆனால் மனிதர்கள் மாறுபட்டிருக்கின்றார்கள். சாகாத சமுதாயத்தை நிரந்தர நோயாளியாக்கிக் கொண்டிருக்கின்றார்கள் .வளரும் போது வளர்வதற்காகவும் வாழும் போது வசதிக்காகவும் பொருளை உறிஞ்சிக் கொள்கிறார்கள் .சிலர் வளரும் போதே வசதியைத் தேடுகிறார்கள் . யாரும் பிறரின் பயன்பாட்டிற்காக வளர்வதில்லை. எங்கு நோக்கினும் மரங்கள் இருந்தும் அவை மனிதர்களின் சிந்தனைத் தீண்டவில்லை என்றால் மனிதன் வழித் தடம் மாறி விட்டான் என்றுதான் சொல்ல வேண்டும்