சிறந்த மாணவனாய் வளர்வது எப்படி ? - 2

சிறந்த மாணவனாய் வளர்வது எப்படி ? - 2


எண்ணங்களைத் தேர்வு செய்து ஏற்றுக்கொள்ளும் சுய முயற்சி எல்லோருக்கும் , எப்போதும் நேர்மையாகவும் உறுதியாகவும் இருக்கும் என்று எதிர்பார்க்க முடியாது . அப்போது வளர்ச்சிப் பாதையிலிருந்து சறுக்கி விழுந்து விடும் அல்லது திசை மாறிப் போகும் நிலை ஏற்படலாம் . இதற்குப் பல அக மற்றும் புறக்  காரணங்களைக் குறிப்பிடலாம். அவற்றை ஒருசேரப் புரிந்து கொண்டால்  அதனால் ஏற்படும் பாதிப்புக்களைத் தடுத்துக் கொண்டு சிக்கலிலிருந்து முழுமையாக விடுபடக்கூடிய வாய்ப்புக்களை ஏற்படுத்திக்  கொள்ள முடியும் .
நூல்கள் பலவற்றைக் கற்றாலும் அக் கல்வி ஒருவர்க்கு உரிமையுடைய அறிவாகிவிடாது , கற்றதை உள்வாங்கி கொண்டு வாழ்வதற்குப் பயன்படுத்திக் கொள்ளும் அனுபவத்தைப்  பெறும்போது உடன்வரும் அறிவே ஒருவருடைய உண்மையான அறிவாகின்றது .
" நுண்ணிய நூற்பல கற்பினும் மற்றுந்தன்                                                    உண்மை அறிவே மிகும் "
என்ற குறள் மூலம் வள்ளுவர் இக் கருத்தினை மிக அழகாக எடுத்துச் சொல்லியிருக்கின்றார். கற்றவர்கள் கூட தவறான பாதையில் நடக்கும் நிலைக்கு இதுவே அடைப்படையாகின்றது. "பல கற்றும் கல்லார் அறிவில்லாதார்"   என்று இவர்களை அன்றைக்கே வள்ளுவர் இனங்காட்டியுள்ளார்.    தவறான இலக்குகளை நோக்கிப் பயணிக்கத் தூண்டும் எண்ணங்களின் ஆக்கிரமிப்பை அனுமதிக்கும் மனம் , சரியான இலக்குகளைத் தேர்வு செய்து அதை எட்டுவதற்கான முயற்சிகளைத் தடுத்து விடுகின்றது. சுய நலமிக்க எண்ணங்கள் சமுதாய நலத்தைப் பாதுகாப்பதில்லை .இந்த சுயநலமிக்க எண்ணங்களை பெரும்பாலும் சமுத்தியதிலிருந்தே ஒவ்வொருவரும் கற்றுக்  கொள்கின்றார்கள்.  தனி மனித ஒழுக்கமும், சமுதாயத்தின் ஒழுக்கமும் ஒன்றுக்கொன்று நெருக்கமான தொடர்புடையது . ஒரு சராசரி மனிதனை அடையாளம் காட்டுவது அவன் வாழும் சமுதாயமே . ஒரு நல்ல சமுதாயத்தில் வாழும் மக்கள் என்றைக்கும் நல்லோர்களாகவே இருப்பார்கள் .அது  வளரும் தீய எண்ணங்களை யாரும் அறிவதற்கு முன்பாகவே  களை எடுத்து அழித்து விடுகின்றது.அப்படிப்பட்ட சமுதாயம் தனி மனிதர்களின் வாழ்க்கைக்கு வலிமையான பாதுகாப்பாய் இருக்கும்.  ஒரு தீய சமுதாயத்தில் வாழும் மக்கள் நல்ல புறத்தோற்றத்துடன் தீய அகத்தோற்றம் கொண்டிருப்பார்கள்.அங்கு தீய எண்ணங்கள் கட்டுப்பாடின்றி வளர்ந்து வருவதால் தனிமனிதர்களின் பாதுகாப்பு கேள்விக் குறியாகின்றது. எனவே சாகாத சமுதாயத்தில் நாமும் நமக்குப்  பிறகு நம் சந்ததியினரும் பாதுகாப்பாய் வாழவேண்டுமானால் சமுதாய நலங்காகும் எண்ணங்களை வளப்படுத்திக் கொள்ளவேண்டும்.  இதில் நாம்  செய்யும் பிழைகள் மீட்டுருவாக்கம் செய்ய முடியாத இழப்புக்களை ஏற்படுத்தும்   

வாழ்க்கையின் பயனுறுதிறன்

வாழ்க்கையின் பயனுறுதிறன்
உங்கள் வாழ்க்கையின் பயனுறு திறனை என்றைக்காவது கணக்கிட்டுப் பார்த்தீர்களா ? கணக்கிட்டு அறிந்து கொள்ள வேண்டும். அப்பொழுதுதான் நாம் நம்முடைய வாழ்க்கையின் பயனுறு திறனை அதிகரித்துக் கொள்ளும் ஆர்வத்தில் சில முயற்சிகளையாவது மேற்கொள்வோம். ஒருவருடைய  வாழ்க்கையின் பயனுறுதிறன் என்பது அவர் வாழும் சமுதாயத்திற்கும் , உலக நலனுக்கும் பயன்தரும் காலத்திற்கும் ,வாழ் நாளுக்கும் உள்ள தகவாகும்  , புகழ் பெற்ற எல்லோரின் பயனுறுதிறன் சராசரி மதிப்பை விட அதிகமாக இருப்பதைக் காண முடிகின்றது. அதாவது ஒரு  மனிதன் இறந்த பின்பும் அழியாப் புகழுடையவனாக இருக்க விரும்பினால் அவன் தன்னுடைய பயனுறுதிறனை அதிகரித்துக் கொள்ள வேண்டும். அதைத்தவிர மாற்று வழிகள் ஏதுமில்லை .
 80 ஆண்டுகள் வாழும் ஒரு சராசரி மனிதனின் பயனுறுதிறனை கணக்கிடுவோம். '
குழந்தைப் பருவத்தில் 5 ஆண்டுகளும் , முதுமைப் பருவத்தில் 10 ஆண்டுகளும்  அவர்களுக்கு அவர்களே உதவி செய்து கொள்ள முடியாததால் பிறர் தான் உதவ வேண்டும் .கல்வி கற்கும் காலத்தில் குறைந்தது 15 ஆண்டுகள்  சமுதாயத்திற்கு சேவை செய்வதற்காக திறமைகளை வளர்த்துக் கொள்வது கழிந்து விடுகின்றது . திருமணம் , திருவிழாக்கள் , வீட்டு விசேடங்கள்  .உல்லாசப் பயணங்கள், உடல் நல க் குறைவு என 10 ஆண்டுகள் கழிந்து விடுகின்றன .சமுதாயத் சிந்தனையை மேற்கொள்வதற்கு கிடைக்கும் காலம்  40 ஆண்டுகள் மட்டுமே.  அதாவது 40 x 365 x 24  மணிகள் .
இதில் ஒவ்வொருநாளும் தூக்கத்திற்கு 8 மணி நேரமும் , காலைக் கடன் 2 மணி நேரமும். உணவு சாப்பிடுதல் , காபி ,தேநீர் அருந்துதல், 2 மணி நேரமும் ஆடை அலகாரம் 1 மணி நேரமும் , தொலைக்க காட்சி, செல் போன் 3 மணி நேரமும் , பணி நேரத்தில் அரட்டை  2 மணி நேரமும் , கோயில் ,நடைப் பயிற்சி , விளையாட்டு  ,வெட்டிப் பொழுது 2 மணி நேரமும் என மொத்தம் 20 மணி நேரத்தை செலவழிக்கத்  தயக்க காட்டுவதில்லை. சமுதாயத்திற்குப் பயனுள்ளவாறு  செலவழிக்கக் கிடைக்குக் நேரம் 40 x 365 x 4. ஊழல் ,லஞ்சம் ,காலங் கடத்துதல் போன்ற காரணங்களினால் பலர் செய்யும் சமுதாயப் பணிகளைக் கூட மக்களுக்குப் பயனுள்ளவாறு  செய்வதில்லை . இதனால் பயனுறு காலம் இன்னும் குறையவே இருக்கும் எனலாம் .இக்கணக்கீட்டின்படி 80 ஆண்டுகாலம் வாழும் ஒருவரின் பயனுறுதிறன் [ (40 x 365 x 4)/ (80 x 365 x 24)] x 100 = 8.33 % பயனுறுதிறனை அதிகரிக்க கூடுதலாகத் தூங்கும் நேரத்தையும், ஒவ்வொருநாளும் வீணாகக் கழிக்கும் நேரத்தையும் குறைத்துக் கொள்வார்கள் . கிடைக்கும் நேரத்தை எவ்வளவு பயனுள்ளவாறு பயன்படுத்திக் கொள்கின்றோம் என்பதைப் பொறுத்தே  ஒருவருடைய வாழ்க்கையின் பயனுறுதிறன் அமையும். 

சிறந்த மாணவனாக வளர்வது எப்படி ? - 1

கல்வி என்பது ஒவ்வொருவரும் அவரவர் வாழ்க்கைக்கு அவர்களே எழுதிக் கொள்ளும் முன்னுரை, வாழ்க்கைக்காகச் சேமிக்கும் மூலதனம் . கல்வி பள்ளிக்கூடத்தில் பெறுவது மட்டுமில்லை , அதை நூல்களைப் படித்தும், அனுபவத்தில் வழியாகவும், சான்றோர்கள் சொல் கேட்டும்  பெறமுடியும்.வாழ்க்கையில் எல்லோரும் சமமான திறமைசாலிகளாக இல்லாதிருப்பதற்கு  படிக்கும் போது கற்றலில் ஏற்படும் குறைபாடுகளே காரணமாக இருக்கின்றது.
ஒரு வகுப்பில் படிக்கும் மாணவர்கள் எல்லோரும் ஒரே மாதிரியாக இருப்பதில்லை, சிலர் நன்றாகப் படிப்பார்கள், சிலர் அப்படி இல்லை. சிலர்  தேர்வுகளில் 100 க்கு 100  வாங்குவார்கள்  சிலர் குறைவான மதிப்பெண் வாங்குவார்கள், அதில் ஜீரோ வாங்குபவர்கள் கூட இருப்பார்கள்.    இதற்கான காரணத்தை  நாம் சுயமாகச் சிந்தித்து அறிய வேண்டும்.. இல்லாவிட்டால் மாணவர்கள் தங்கள்  வாழ்க்கையைத்  தாங்களே பாழாக்கிவிடக் காரணமாகி விடுவார்கள் .
பிறக்கும் போது எல்லோரும் சமம் . யாரும் பட்டாடையோடும் , பருத்தி ஆடையோடும் விதவிதமான  ஆபரணங்களோடும்  பிறப்பதில்லை .எல்லோருக்கும் அதே இரண்டு கைகள், இரண்டு கால்கள் ,இரண்டு கண்கள் ,காதுகள் , ஒரு மூளை  ஒரு இதயம்  தான் . இவை அறிவை வளர்த்துக் கொள்ளத் தேவையான உணர் கருவிகள் மட்டுமல்ல , வளர்ந்த பின்  வாழ்க்கையை நெறிப்படுத்திக்  கொள்ள பயன்தரும் உபகரணங்களுமாகும், அப்படியென்றால் மனிதர்களுக்குள் வேறுபாடு எப்படி  ,எங்கிருந்து வந்தது ?
வளரும் போது நாம் தத்தெடுத்துக் கொள்ளும் எண்ணங்களே  நம் எதிர்கால வாழ்க்கையைத் தீர்மானிக்கின்றன .ஆம், நம் எண்ணங்களே நம் வாழ்க்கையாகிவிடுகின்றது.  நம் எண்ணங்களே உறவுகளைத் தருகின்றன , நண்பர்களைத் தருகின்றன ,முன்னேற்றத்திற்கான வாய்ப்புக்களை ஏற்படுத்திக் கொடுக்கின்றன , மகிழ்ச்சியையும், வெற்றியையும் தருகின்றன. நல்லெண்ணங்கள் நல்ல வாழ்க்கைக்கும் , தீய எண்ணங்கள் தீய வாழ்க்கைக்கும்  அடிப்படையாகின்றன. 
ஒருவருடைய வாழ்க்கை முழுவதையும் தீர்மானிக்கின்ற அவருடைய எண்ணங்களின் பதிவுகள் எங்கிருந்து ஆரம்பிக்கின்றன.பெற்றோர்களால் உருவாகும் குழந்தைகளுக்கு பெற்றோர்களே முதல் நிலை வழிகாட்டிகளாக இருக்கின்றார்கள் .எண்ணப் பதிவேட்டில் முதலில் எழுதுவது பெற்றோர்களே.சுதந்திரம்,கண்டிப்பு,ஆளுமை,சுறுசுறுப்பு, சோம்பல் .புத்தகம் வாசித்தல், படிப்பில் ஆர்வம்,படைப்பாற்றல்  இப்படி எல்லாவற்றிற்கும் மூளையில் எண்ணங்களின் பதிவுகளுக்கு  பிள்ளையார் சுழி   போடுவது பெற்றோர்களே. உணர்கருவிகளைப் பயன்படுத்தி எண்ணங்களை வரவு  செய்ய  முடியும் என்பதைக் கற்றுக்கொண்ட பின் ஒவொருவரும் பிறர் உதவியின்றி சுயமாகவே எண்ணங்களை புதுப்பித்துக் கொள்கின்றார்கள். பெற்றோர்களால் எழுதப்பட்ட எண்ணங்கள் திருத்தப்படுவது இந்த கால கட்டத்தில் தான்.  குழந்தைகள்  தானாக எந்த வழிகாட்டலும் இன்றி எண்ணங்களை வளர்த்துக் கொள்ளவதற்கு முன்னரே பெற்றோர்கள்  நல்ல எண்ணங்களை அவர்கள் எண்ணத்தில்  விதைத்து விடவேண்டும் .இதில் ஏற்படும் கால தாமதத்தால்  பாதிப்புக்கள்  ஏற்படும்  வாய்ப்புக்கள் அதிகம்.  எண்ணங்கள் திருத்தப்படும் போது மனம் எதைத் தேர்வு செய்கின்றது என்பதை பொறுத்து   திசை  மாறிப் போகும் சூழ்நிலை ஏற்படுகின்றன  கணப்பொழுது இன்பங்களினால் கிடைக்கும் மயக்கத்திற்கு அடிமையாகி விடும் போது எண்ணங்கள் எல்லாம் தீயனவாகி விடுகின்றன.  இந்த நிலைக்கு பெரிதும் காரணமாக இருப்பது தீய நண்பர்களின் சகவாசமே . என்றாலும் அவரவர் மனமே இதற்கு அடைப்படைக் காரணமாகின்றது .ஏனெனில் ஒன்றை ஏற்றுக்கொள்வதும்  ஏற்றுக்கொள்ளாதிருப்பதும் அவரவர்  மனமே. இதில் ஏற்படும் வேறுபாடுகள் காரணமாக மனம் ஒருவருக்கு நல்ல நண்பனாகவும் வேறு சிலருக்கும் உள் எதிரியாகவும் அமைந்து விடுகின்றது , ஒரு மாணவன் சிறந்த  மாணவனாக இருக்க வேண்டுமானால் அவன் மனதால் ஆளப்படுபவனாக  இருப்பதை விட மனதை ஆள்பவனாக இருக்க வேண்டியது  அவசியம். மனதை ஆள்பவன் மட்டுமே வாழ்க்கையில்  அடைய நினைத்த உச்சத்தை எட்டுகின்றான். உலகை ஆளும் தகுதியைப் பெறுகின்றான்.

creative thoughts

பூட்டும் சாவியும்

 கடல் இருந்தால் அலையிருக்கும்
கற்பனை இருந்தால் கலை பிறக்கும்
மலர் இருந்தால் மணமிருக்கும்
மனமிருந்தால் வழி கிடைக்கும்
கனி இருந்தால் சுவையிருக்கும்
கேள்வி  என்றால் பதிலிருக்கும்
இருள் இருந்தால் ஒளி இருக்கும் 
இசைக் கருவி இருந்தால் நாதம் பிறக்கும்
குழந்தையாயிருந்தால்  மழலை இருக்கும்
இளைஞனாயிருந்தால் ஆக்கம்  இருக்கும்
பெண்ணாயிருந்தால் சமுதாயம் பிழைக்கும்
முதியவராய் இருந்தால் அனுபவம்  இருக்கும்
நாம் காணும் உலகில் எதுவுமே தனிமையில் இல்லை 
தனிமை என்று நினைத்தால் அது ஒரு தோற்றப் பிழையே
பூட்டு இருந்தால் சாவி இருக்கும்
ஒவ்வொரு பூட்டும் அதற்குரிய சாவியோடுதான் உருவாகின்றன. அந்தச் சாவியைக் கொண்டு பூட்டை ஒவ்வொருமுறையும் எளிதாகத் திறந்து விடுகின்றோம் . பூட்டு இல்லாமல் சாவி மட்டும்  உருவாக்கப் படுவது இன்றைக்கு ஏற்பட்டாலும் சாவியில்லாமல் பூட்டு ஒருநாளும் உற்பத்தி செய்யப்படுவதில்லை . இறைவன் ஓவ்வொருவருக்கும் பல  பிரச்சனைகளை  தந்துள்ளான்  என்றாலும் அதைத் தீர்வு செய்வதற்குரிய சாவிகளைத் தராமல் இல்லை.     நம் பிரச்சனைகளைத் தீர்வு செய்யக்கூடிய திறமை  நம் உடல் உறுப்புக்களுக்கு உண்டு . எந்தப் பிரச்சனையையும் சரியான சிந்தனையாலும் செயலாலும் தீர்வு செய்ய ஒவ்வொருவருக்கும் எல்லையற்றுச் சிந்திக்க மனமும் , அதைச் செயல் படுத்த உடல் உறுப்புக்களையும் பிறக்கும் போதே தந்துள்ளான். அவற்றைப் பயன்படுத்திக் கொள்ளத் தெரியாதவர்களே பிரச்சனைகளில் சிக்கித் தவிக்கிறாரார்கள்.
 பல சாவிகள் திறக்கும் ஒரு பூட்டை  விட பல பூட்டுக்களைத் திறக்கும் ஒரு சாவி மேலானது. அது போல ஒரு பிரச்சனைக்குப் பல  தீர்வுகள் என்பதை விட பல  பிரச்சனைகளுக்கு ஒரே தீர்வு என்பது பயனுள்ளது . பல தீர்வுகள் இருப்பதாகச் சொன்னால் அது ஒரு சிலருக்கு அனுகூலமாகவும் வேறு சிலருக்கு பயனற்றதாகவும் இருப்பதால் ஏற்றுக்கொள்ளுவதில் சிக்கல் ஏற்படுவது தவிர்க்க இயலாததாகின்றது,
பூட்டு எங்கிருந்தாலும் சாவி எப்போதும் பையில் அல்லது கையில்  இருக்க வேண்டும் என்பதற்காக பூட்டு சிறியதாக, பெரியதாக  எப்படி இருந்தாலும் சாவி எப்போதும் பூட்டை விட சிறியதாகவே இருக்கும், ஒருவருடைய வீட்டிலுள்ள பூட்டுக்கள் அனைத்திற்குமுரிய சாவிகள் அவருடைய கையில் இருப்பதைப் போல அவருடைய பிரச்சனைகள் அனைத்திற்கும் உரிய தீர்வுகள் அவருடைய சிந்தனையில் இருக்கின்றன. சாவியைத்  தொலைத்தவர்கள் மாற்றுச் சாவி தேடுவதைப் போல  சுய சிந்தனையற்றவர்களே தீர்வை வெளியில் தேடுவார்கள்.
சாவி தங்கமாக இருந்தாலும், இரும்பாக இருந்தாலும் பூட்டை திறக்கக் கூடியதாக இருக்க வேண்டும்  .

sonnathum Sollaathathum- Tagore

ரபீந்திர நாத் தாகூர்




ரபீந்திர நாத் தாகூர்  ( Rabindranath Tagore )  ( 7  மே 1861- 7  ஆகஸ்ட் 1941) இந்தியாவில் மேற்கு வங்க மாநிலத்தில் கல்கத்தாவில்  தேவேந்திர நாத் தாகூர் - சாரதா தேவி தம்பதியினருக்குப் பிறந்த 13 குழந்தைகளில் இளையவராவார் . புனைப் பெயர் பானு சின் ஹா தாக்குர் (Bhanu Singha Thakur ) இவர் சிறந்த படைப்பாளர் . எழுத்தாளர் , கவிஞர், இசை அமைப்பாளர் , நாடக ஆசிரியர் , ஓவியர் என்று பன்முகத் தன்மை கொண்டவர். கீதாஞ்சலி என்ற கவிதை நூலைப் படைத்து 1913  ல் இலக்கியத்திற்காக  ஆசியாவின் முதல் நோபல் பரிசைப் பெற்றார் .நம் நாட்டின் தேசிய கீதத்தை இயற்றியவரும் இவரே ஆவார்.  தாகூர் தனது 8 வது வயதிலிருந்தே  கவிதை எழுதத் தொடங்கினார். தனது 15 வது வயதில் பானு  சிம்ஹா (சூரிய சிங்கம் ) என்ற தலைப்பில் முதல் கவிதை நூலை வெளியிட்டார்   சாந்தி நிகேதன் மற்றும் விஸ்வ பாரதி பல்கலைக் கழகம் .போன்றவற்றை நிறுவினார் .விஸ்வபாரதி பல்கலைக்கழகத்தை நிறுவிய ரவீந்திரநாத் தாகூர்  பிரபலமாக ‘குருதேவ்’ என்றும் அழைக்கப்பட்டார். அவரது பிரபலமான இசைதட்டுகள் அனைத்தும் ‘ரவீந்திரசங்கீத்’ என்ற பேரில் அழைக்கப்பட்டன. இவர் இயற்றிய ரவீந்திரசங்கீத் நியதியிலுள்ள இரண்டு பாடல்களான “ஜன கண மன” மற்றும் “அமர் சோனார்”,இந்தியா மற்றும் வங்காளத்தின் தேசிய கீதங்களாக உள்ளது. 19-ஆம் நூற்றாண்டின் இறுதியிலும் 20 ஆம் நூற்றாண்டின் துவக்கத்திலும் இவர் வங்காள இலக்கியம் மற்றும் இசை வடிவத்தில் பெரும் மாற்றங்களைக் கொண்டு வந்தார். மேலும் இந்தியக் கலைகளிலும் மாற்றங்களைக் கொண்டு வந்தார்.

தாகூர் இளம் வயதிலேயே தாயாரை இழந்து விட்டார் . தந்தையர் பயணத்திலேயே அதிக நேரம் செலவிட்டதால் .வேலையாட்களின் கவனிப்பிலேயே  அதிகம் வளர்ந்தார்.பாரம்பரிய கல்விமுறைப் பிடிக்காததால், பல ஆசிரியர்களின் கீழ் வீட்டிலேயே படிக்கத் துவங்கினார். சிறுவயது முதற்கொண்டே இவருக்கு கவிதை எழுதுவதில் ஆர்வர் இருந்தது. ஒரு முறை ஓரு கவிதையை எழுதி தன தந்தையாரிடம் காண்பிக்க, அது நன்றாக இல்லாவிட்டாலும் மகன் உற்சாகத்தை இறந்துவிடுவான் என்று அந்தக் கவிதைக்காகப் பாராட்டி ஒரு கைக்கடிகாரத்தையும் பரிசாக அளித்தார். .இதனால் தாகூர் மேலும் மேலும் கவிதை எழுதுவதில் ஆர்வம் கொண்டு தன திறமையை வளர்த்துக் கொண்டார்.ஒவ்வொருவருவரும் தங்கள் தனி திறமைகளை வளர்த்துக்கொள்ள ஏதாவதொரு  தூண்டற் காரணி யை இனமறித்து ஏற்படுக்கொள்ள வேண்டும் .இது அகத்  தூண்டுதலாகவோ அல்லது புறத் தூண்டுதலாகவோ இருக்கலாம் .



"ஆபத்துக்களிலிருந்து பாதுகாப்பு க் கவசம் வேண்டும் என்பதை விட ப் பயமின்றி அவற்றை எதிர்கொள்ளும் தைரியம் வேண்டும் என்று வேண்டிக் கொள்ளும் மனம் தான் வேண்டும்"

பாதுகாப்பு என்பது புறச் சூழல்களை ஏற்படுத்திக் கொண்டு எதிர்ப்புக்களைத் தவிர்ப்பது. ஆனால் தற்காப்பு என்பது நமக்கு நாமே பாதுகாப்பாய் இருப்பது . பாதுகாப்பு வழி
 முறைகள் ஒருநாள் இல்லாவிட்டாலும் ஒருநாள் பொய்த்துப் போகலாம் . ஆனால் தற்காப்பு தரும்  தைரியம் ஒருநாளும்  ஏமாற்றிவிடுவதில்லை. உடல் வலிமையையும் மன உறுதியும் இருந்தால் எதிர்ப்புக்களை எளிதாகச் சமாளிக்கலாம். மதி நுடபமும் சேர்ந்து கொண்டால் நம்மை விடாய் பலமானவர்களைக் கூட எதிர்த்துப் போராடலாம். தற்காப்பு என்பது இன்றைக்கு ஒரு வாழும் கலையாகவே மாறி வருகின்றது. கராத்தே, சிலம்பு , களரி  போன்றவற்றை  குறிப்பிட்டுச் சொல்லலாம் .
ஒரு செயலைத் தொடங்கு முன் மனதில் இனம்புரியாத ஒருவிதமான பயம் தோன்றுவதற்கு அடிப்படையான காரணம் அச் செயலைச் செய்யத் தொடங்கி வெற்றிகரமாக முடிக்கும் வரை நமக்கு நாமே முழு நம்பிக்கை உடையவர்களாக இருப்பதில்லை .குறைந்தபட்ச தகுதிகளையும் திறமைகளையும் கொண்டு அதிகபட்ச அனுகூலங்களை அடைய ஆசைப்படும் போது உள்ளுக்குள்ளே  ஊறும் இந்த அவநம்பிக்கை பயத்தின் அளவை அதிகரிக்கின்றது. சிறு குழந்தையாக இருந்த போது செயல் மற்றும் திறமை பற்றிய எந்த எண்ணமும் தோன்றி இல்லாததாலும், தனக்கு வேண்டியதையெல்லாம் தருவதற்குத் தன் பெற்றோர்கள் இருக்கின்றார்கள் என்ற நம்பிக்கை இருந்ததாலும் பயம் இல்லாதிருந்தது .கொஞ்சம் வளர்ந்த போது பெற்றோர்களின் தனிக் கவனிப்புக் குறைந்து தனக்கு வேண்டியதைப் பெறத் தானே வேலை செய்யவேண்டிய கட்டாயம் ஏற்பட்டது ,திறமை போதிய அளவு இல்லாத நிலையில் பயம் மனதைச் சூழ்ந்துகொள்கின்றது.

ஒரு செயலைச் செய்யப் புகுமுன் தெரிந்து கொள்ள வேண்டிய சில விஷயங்கள் இருக்கின்றன முதலாவது செயலைச் செய்யவேண்டியதன் அவசியம் ,விளை பயன் ,பயனுறு திறன் போன்றவற்றைப் பற்றித் தெரிந்து கொள்ளவேண்டும் தேவையின்றி ஒரு வேலையில் ஈடுபடுவது கால விரயமாகும்.பயனுறு திறனை வெகுவாகத் தாழ்த்திவிடும். இரண்டாவது அதைச் செய்து முடிப்பதற்கு வேண்டிய தகுதிகளைப் பெற முயலவேண்டும்.வழிமுறைகள் மற்றும் கால வரம்பு முக்கியமானது .காலங் கடந்து ஒரு செயலை முடிப்பது நற்பயன் அளிப்பதில்லை .செயல்களைச் செய்வதற்கு நம்மிடம் இருக்கும் பலம் மற்றும் பலவீனங்களை அவ்வப்போது மதிப்பீடு செய்து தகுதிகளை வளர்த்துக் கொள்ள வேண்டும். செயலைச் செய்து முடிப்பதற்கு முழுத் தகுதி யுடையவர்களாய் இருக்கும்போது அவநம்பிக்கையும் இருப்பதில்லை மனதில் பயமும் இருப்பதில்லை




"எவர் தேவைக்கு அதிகமாகச் சம்பாதித்து வைத்திருக்கிறார்களோ அவர்கள் வாழ்க்கையை அச்சப்பட்டுக் கொண்டே வாழ வேண்டியிருக்கும்" .

ஒரு குறிக்கோளை நிறைவேற்ற அளவற்ற செலவம் ஒருவருக்குத் தேவைப்படாது .செல்வம் சேரச் சேர அதை ஆடம்பரமாகச் செலவு செய்ய ஆரம்பித்து தவறான முறையில் செலவு செய்வதில் முடியும்.சமுதாயத்தின் ஒழுக்கம் சீர்கெட்டுப்  போவதற்கு குறிக்கோள் இல்லாமல் பொருள் சேர்த்து அதை தவறான  வழிகளில் செலவிடுவோர்களே காரணம் .சமுதாய எதிரிகளாகிவிடுவதால் அவர்கள் எப்போது அச்சப்பட்டுக் கொண்டே வாழ வேண்டிய சூழ்நிலையே  இருக்கும் .அளவுக்கு மீறி சேர்த்த பொருளை களவு போய்விடாமல் ஒளிக்கவும் அச்சப்பட வேண்டியிருக்கும் 

"சிறந்த கல்வி என்பது தேவையான விவரங்களை நமக்கு நாமே பெறுவது இல்லை. அது நம் வாழ்க்கையைச் சுற்றுச் சூழலுடன் இணைந்து கடப்பதில் அடங்கியிருக்கின்றது "
"பெறுவதற்குத் தேவையான திறமைகளை வளர்த்துக் கொண்டால்  நம்மைச் சுற்றியுள்ள எல்லாம் நம்மைத் தேடி வரும்"

தற்போது இருக்கின்ற அறிவையும் திறமையையும் சரியாகப் பயன்படுத்திக் கொள்ளாவிட்டால் பயன்படுத்திக் கொள்ளப் படாத அந்த அறிவையும் திற மையையும்  வளர்த்துக் கொள்ள வேண்டும் என்ற எண்ணம் எப்போதும் வருவதில்லை  .கல்விக்காக வாழ்க்கையில்லை . வாழ்க்கைக்காகத்தான் கல்வி . திட்டமிட்ட வாழ்க்கைக்கு ஏற்ப செய்துகொள்ளும் மூலதனமாக  கல்வி இருந்துவிட்டால் வாழ்க்கையை இனிமையாகக் கழிக்க முடியும் . எது உனக்கு மட்டுமின்றி சமுதாயம் முழுமைக்கும் பயனும் மகிழ்ச்சியும் தரக்கூடியதாக இருக்கின்றதோ அதுவே மிகச்  சிறந்த கல்வி 

"அன்பை எப்பொழுது  வேண்டுமானாலும்  வெளிப்படுத்திக் காட்ட புறத் தடைகள்  ஏதுமில்லை என்பதால்உங்கள் அன்பை ரகசியமாக வைத்திருக்காதீர்கள்"
"உலகை நேசிக்கத் தொடங்கும் போதுதான் உண்மையாக வாழத் தொடங்குகின்றோம்"

உடல் உழைப்பை விட அறிவுக்கு ஆற்றல் அதிகம்  அறிவை விட அன்பிற்கு ஆற்றல் அதிகம். அன்பை விட ஆற்றலுள்ள ஒன்றை இன்னும் யாரும் கண்டுபிடிக்கவில்லை அறிவால் சாதிக்க முடியாததை அன்பு மிக எளிதாகச் சாதித்து விடுகின்றது .ஒருவர் தனித்தே இந்த உலகில் வாழமுடியாது . இதற்கு காரணம் நமக்குத் தேவையான எல்லாவற்றையும் பிறர் உதவியின்றி நாமே செய்து கொள்ள முடியாது . நம்மை மற்றவர்களோடு இணைந்து வாழத் தூண்டுவது இந்த அன்பு மட்டுமே, மனதில் வளரும் அன்பினால் இந்த உலகிலுள்ள அனைவரும் ஒருவருக்குச் சொந்தக் காரர்களாகி விடுவார்கள்.  தனி மனிதனின் இனிய வாழ்க்கைக்கும் வெற்றிக்கும் சமுதாயத்தின் ஒத்துழைப்பு தேவை . சமுதாயத்தைப்  புறக்கணித்த எவரும் வாழ்க்கையில் வெற்றி        காண்பதில்லை. ஒவொரு மனிதனும் அவனுக்குள் இருக்கின்ற அன்பெனும் அளவற்ற செல்வத்தால் மிகவும் மதிப்புள்ளவனாக  இருக்கின்றான் . ஆனால் பெரும்பாலான மனிதர்கள் தங்கள் மதிப்பை உணர்வதே இல்லை.


"முயற்சி என்பது இதயத்திற்குள் மூளும் உள்ளுணர்வு அல்ல அது உன் ஆற்றலை வெளிக்கொணரக்கூடிய ஒரு   நெம்புகோல் "

ஒரு சிறிய நெம்புகோல்  ஒரு பெரிய பாறாங்கல்லை நகற்றி விடும் அது போல ஒரு சின்ன முயற்சி  ஒரு பெரிய தடையையும் அகற்றிவிடும் . இடப்பெயர்வுக்கு ஒரு குறிப்பிட்ட ஆற்றல் தேவைப்படுவதைப்   போலச் செயல்களின் முடிவுகளை மாற்றக்கூடிய சக்தி செய்யும் முற்சிகளுக்கு மட்டுமே இருக்கின்றது. முயற்சியுடையார் இகழ்ச்சியடையார் என்பர் தமிழ்ச் சான்றோர்கள்  முயற்சி என்பது அடைய வேண்டிய இலக்கை நோக்கிச் செல்லும் பாதையில்  மேற்கொள்ளும்  நடை பயணம் . இருந்த இடத்திலிருந்து கொண்டே செல்ல வேண்டிய இலக்கை யாரும்  அடைந்து விட முடியாது.


"சூரியன் காணாமற் போய்விட்டது என்று கதறி அழுதால் சிந்தும் கண்ணீர் மறைப்பதால் அந்த விண்மீன்களைக் கூட க் காண முடியாது போய்விடும் "

மகிழ்ச்சியான வாழ்க்கை என்பது தடைகளற்ற வாழ்க்கை இல்லை ,தடைகளை எதிர்கொண்டு வெற்றிகண்டு வாழும்  வாழ்க்கையே அது சிரிப்பவர்கள் எல்லோரும் கவலையின்றி வாழ்பவர்கள் அல்ல. கவலையை மறந்து வாழக் கற்றுக் கொண்டவர்கள்.செய்யும் செயல்கள் எல்லாம் நினைத்தபடி வெற்றியில் முடிவதில்லை. ஒரு பெரிய பலனுக்கானகச் செய்யும் முயற்சி யில்  தோல்வியும் வரலாம் . தோல்வியால் ஏற்பட்ட இழப்பைக்  கண்டு மனம் கலங்கினால்  சிறிய பலனைக்கூட ப் பெறமுடியாது  .

SONNATHUM SOLLAATHATHUM -SACHCHIN

"வெற்றி ,தோல்வி இரண்டிலிருந்தும் கற்றுக் கொள்ள வேண்டிய பாடங்களின் முக்கியத்துவம் சமமானவை.  வெற்றி , மகிழ்ச்சியைக் காட்டிலும், தோல்வியும் துன்பமும் கற்றுக்கொடுப்பதில் சிறந்த பேராசிரியர்களாக விளங்குகின்றன." 

  

 மிகப் பெரிய சாதனை புரிய முயற்சிக்கும் போது தோல்வியைச் சந்தித்தாலும்  அது தோல்வியல்ல.உண்மையில் அது வெற்றியின் முதல் படி .வெற்றியின் ரகசியங்கள் தோல்விகளுக்குள்  தான் புதைந்து இருக்கின்றன .தோல்வியால் துவண்டு முயற்சியை விட்டுவிடுவது தான் மெய்யான தோல்வி . வெற்றிக்கு இரண்டு காரணங்கள் இருக்கின்றன ஒன்று செய்ய வேண்டியத்தைச் சரியாகச் செய்வது , மற்றொன்று  செய்யக்கூடாததைச் செய்யாமல் தவிர்ப்பது. .சரியாகச் செய்து வெற்றி பெற்றவனைக் காட்டிலும் சரியாகச் செய்யாமல் தோல்வி கண்டவன் கூடுதலான அனுபவத்தைப் பெறுகின்றான். அந்த அடிப்படையில் தோல்வி கூட ஒருவருடைய முயற்சிக்கு இயற்கை கொடுக்கும்  பரிசு என்ற நினைக்க வேண்டும் .
"குறை கூறுபவர்கள் நான் எப்படி விளையாட வேண்டும் என்று கற்றுக் கொடுத்தவர்கள் இல்லை. என்னுடைய உடல் வலிமையையும் மனத் திடமும் எத்தகையது  என்பதை அவர்கள் அறிவார்களா ? குறையும் நிறையும் ஒருவரை மற்றவருடன் ஒப்பிடும் போதுதான் தோன்றுகின்றது. .அதனால்  ஒப்பிட்டுப்பார்ப்பதை விட்டுவிட வேண்டும்"
"பந்து என்னை நோக்கி வரும்போது அதை மிகக் குறுகிய நேரத்தில் மதிப்பிட்டு விளையாட வேண்டும். மற்றவர்கள் என்னைப் பற்றி என்ன சொல்கின்றார்கள் என்பதைப் பற்றிப் நான் நினைத்துக் கொண்டிருக்க முடியாது .என்னுடைய செயலை என் உள்ளுணர்வுகளுக்கு அர்ப்பணித்து விடுவேன். என் அக மனத்திற்குத் தெரியும் நான் இனி என்ன செய்யவேண்டும் என்பது . நான் என்னை  அப்படிப் பழக்கப்படுத்திக் கொண்டிருக்கின்றேன் ."
திறமை உண்மையானதாக இருந்தால்  மனதில் நம்பிக்கை இயல்பாக  இருக்கும். ஒவ்வொருவரும் சுயசார்புடன் செயல்படுவதற்கு இந்தத் தன்னம்பிக்கை தேவை. நம்பிக்கை இருக்கும் போதுதான் வழிமுறைகள்  எளிதாகக் கிடைக்கின்றன  வழிகாட்டல்களும்  தாமாகத் தோன்றுகின்றன. முயற்சி செய்வதற்கு வேண்டிய ஆற்றலையும் , வெற்றி பெறுவதற்கு வேண்டிய திறமையையும் தருகின்றது 

sonnathum sollaathathum

சச்சின் டெண்டுல்கர் எழுதிய  "  Playing it my way " என்ற நூலில்  முன்னேறத்  துடிக்கும் இளைஞர்களுக்கு  பல நல்ல கருத்துக்களைக் கூறியுள்ளார் .

"உன் மீது பிறர் தூக்கி எறியும் கற்களை படிக்கல்லாக மாற்றிக் கொள்ள உன்னால் முடியும். "

பொதுவாக ஒருவரது வளர்ச்சியை விரும்பாதவர்கள் தடைப்படுத்துவதற்காக எதிர்ச் செயல்களை செய்வார்கள் . உற்சாகத்தை மட்டுப்படுத்துவதற்காக குறை கூறுவார்கள்.  போற்றுவார் போற்றட்டும் தூற்றுவார் தூற்றட்டும் துணிந்து செல் என்று சான்றோர்கள் கூறுவார்கள் . குறை சொல்லுவோர் கருத்துக்களையெல்லாம்  செவிடராய் இருந்துகேட்டால் ,ஊமையாய் இருந்து தொடர்ந்து செயலைச் செய்தால்  எந்தப் பாதிப்பும் ஏற்படுவதில்லை. கடிய சொற்களால் மனம் துவண்டு போனால்  செய்யப்படும் செயல்கள் செயல்களாய் இருப்பதில்லை .குறை என்று நினைப்பது மனம்தான் நிறை என்று நினைப்பதும் அதே மனம் தான் . குறைகளையெல்லாம் நிறைகளாகத் திருத்தி நினைக்கத் தெரிந்தால் வாழ்க்கையின் வளர்ச்சிப் பாதையில்  வீழ்ச்சியேயில்லை. மனமிருந்தும் மனப்பக்குவம் இல்லாவிட்டால்  சொல் கூட கல்லைவிட பலமாகத் தாக்கும்

"கனவுகள் ஒரு நாள் நிச்சியமாக நனவாகும் . கொஞ்சம் கால தாமதமாகிறது  என்பதற்காக  கனவு காண்பதை விட்டு விடாதீர்கள் . "

கனவுகள் முன்னேறத் துடிக்கும் மனிதர்களின் சுயவழிகாட்டி . உள்ளுணர்வைத் தூண்டிக்கொண்டே இருக்கும் -விழித்திருக்கும் போது செயல்களாய் ,தூங்கிக் கொண்டிருக்கும் போது கனவுகளாய்.முன்னேற்றம் என்பது ஒரு திட்டம். அதற்கு ஒரு செயல் வடிவம் கொடுப்பது சுய விருப்பம். முயற்சிகள் என்பது மனதின் ஒத்துழைப்பு . இந்த கூட்டணி சந்திக்கும் போது கனவுகள் மலரும்.  கனவுகள் உறங்கும் போது இரவில் பூக்கும் வண்ணப் பூக்கள் .   செய்யவேண்டிய செயல்கள் நிறைய இருக்கு எழுந்திரு என்று அதன் நறுமணம் உன்னை எழுப்பிவிடுவதற்காக பூக்கின்ற  பூக்கள் .

" உலகக் கோப்பைப் போட்டியில் இடம்பெற்று விளையாடுவவதற்குப் பின்னால்   ஒரு நெடிய வழிமுறை உள்ளது.  50 வது மாடிக்கு நேரிடையாகத் தாவிக்குதிக்கும் முயற்சியை  விட்டுவிட்டு அடித்தளத்திலிருந்து தொடங்கி முன்னேறிச் செல்ல வேண்டும் ."       

எதையும் நினைத்த மாத்திரத்தில்  அடைய முடியாது. எதை அடைய விரும்புகின்றோமோ அதை அடைய முதலில் நம்மைத் தகுதியுடையவர்களாக்கிக் கொள்ள வேண்டும் ,தகுதியின்மையால் மேற்கொள்ளும் முயற்சிகள் பெரும்பாலும் தோல்வியில்தான் முடிகின்றன .  எந்தத் துறையில் முன்னேற விரும்பினாலும் முதலில் தகுதியுடையவனாக இருக்க வேண்டும். அந்தத் தகுதியை வளர்த்துக் கொள்ள வேண்டும். முழு அர்ப்பணிப்புடன் ஈடுபட வேண்டும். அப்படி ஈடுபட்டால் வளர்ச்சி யில் தடை ஏற்படுவதற்கு வழியில்லை .
 கணப்பொழுதில் ஒரு பெரிய மாட மாளிகையைக் கட்டுவதும். கையை அசைத்து தங்கக் காசுகளைக் கொட்டுவதும், ,அறுசுவை உணவைப் பரிமாறுவதும்,  இயற்கைக்கு  அப்பாற்பட்ட  மந்திர தந்திரங்களுக்கு  வேண்டுமானால் இயலுவதாக இருக்கலாம்.  ஆற்றலின்றி ஒருநாளும் பொருட்கள் விளைவதில்லை என்பது இயற்கையின் மாறாத விதிகளில் ஒன்று என்பதை மறந்தவர்கள் மட்டுமே குறுக்கு வழியில் முன்னேற வழி தேடிக்கொண்டிருப்பார்கள்  .