சிறந்த மாணவனாக வளர்வது எப்படி ?- 9

சிறந்த மாணவனாக வளர்வது எப்படி ?
 எதைச் செய்தாலும் அதை அதற்காக மட்டுமே செய்ய வேண்டும்.எதையும்   அதனால் கிடைக்கும் பலன்களுக்காகச் செய்யக் கூடாது  என்பது இயற்கையின் அறிவுரை . இயற்கையைப் புறக்கணிக்கப் புறக்கணிக்க நாம் மிகுந்த இன்னலுக்கு உள்ளாவோம் என்பதை வெகு சிலரே உணர்ந்து  செயல்படுகிறார்கள் .பிற்பலன் கருதிச் செய்யும் போது சுய நலம் மிகுந்து குறுக்கு வழியில்  முந்திச் செல்லும்  கோணப்புத்தியும் , திறமையின்மையும்  தூண்டப்பட்டு இலக்கை நோக்கிச் செல்லும்  திக்கை திசை திருப்பிவிடுகின்றது . கல்வியை கல்விக்காக மட்டுமே கற்க வேண்டுமெனில், மாணவர்கள் மாணவர்களாகவே இருக்கவேண்டும். வகுப்பறையைத் தூய்மையாக  வைத்திருக்க உதவ வேண்டும். வகுப்பறையில் தோன்றாத தூய்மை வாழ்க்கையின் எந்த காலகட்டத்திலும் வருவதில்லை. தூய்மையின்மை பணி செய்வதற்கு ஓர் அகத் தடையாக இருப்பதால் சுய முன்னேற்றம் பின்தங்கி விடுகின்றது .  சுகாதாரமில்லாத  சுற்றுப்புறம் உடல்நலத்திற்கும் ஊறு விளைவிக்கின்றது . உடலையும் உள்ளத்தையும் ஒரு சேரச்  சோர்வடையச் செய்யும்    வலிமை இந்த தூய்மையின்மைக்கு  இருப்பதால் , ஏற்படும் இழப்பு நீண்டகாலப் போக்கில் அதிகரித்து நமக்குத் தெரியாமலேயே  நிரந்தரமான  இழப்புக்களை ஏற்படுத்தி விடுகின்றது .
தூய்மை என்பது புறத் தூய்மை மட்டுமல்ல அகத் தூய்மையும் தான்.அகமும் புறமும் நலமாக இருந்தால் தான் உடலும் உள்ளமும் நலமாக இருந்து ஒத்தியங்கும் வலிமையைப் பெறும்.
சத்தம் போட்டு மற்றவர்களுக்கு இடையூறை ஏற்படுத்தாமல் ஆசிரியர் வரும் வரை  அமைதியாக இருக்க வேண்டும். பொதுவாக இரைச்சல் மனம் ஒருமுகப்படுவதை சீரழித்து விடுகின்றது . இரைச்சலை விட அமைதியாக இருக்கும் போது மனம் உற்ச்சாகமாக இருப்பதால்  சிந்தனை செய்யும் ஆற்றலும் , வேலை செய்யும் ஆற்றலும் பல மடங்கு அதிகமாக இருக்கின்றது. வகுப்பறையில் சத்தம் போடுவது, தேவையில்லாமல் அரட்டை அடிப்பது என்பதெல்லாம் ஆற்றலை வீணாகாச் செலவழிப்பதுதான் . அதனால் பின்னர் முக்கியமான செயலைச் செய்யத் தேவையான ஆற்றல் போதுமான அளவில் கிடைக்காமல் போய் விடுகின்றது. இரைச்சலால் இயல்பாக இருக்கும் பயனுறுதிறனையும் இழந்துவிடக்கூடாது பிற மாணவர்களுடன் பாட சம்பந்தமாக கலந்துரையாடல் செய்யலாம். கலந்துரையாடல் என்பது கூட்டு முயற்சி. ஒவ்வொருவரும்  எல்லாவற்றையும் தெரிந்திருக்க முடியாது. ஆனால் எல்லோரும் எல்லாவற்றையும் செய்யமுடியும்.இதனால் ஆசிரியரின் உதவியில்லாமலேயே பல விஷயங்களைக் கூட்டு முயற்சியால் கற்றுக் கொள்ள முடியும்.  இரவில் தூங்குவதோடு ஓய்வு முடிந்து விட்டது. பகலில் கூடுதல் உழைப்பின்றி கூடுதல் ஓய்வு எடுத்துக் கொள்வது என்பது  பயனுறு திறனை இழப்பதாகும். வகுப்பறையில்  கிடைக்கும் ஓய்வைப் பயனுள்ளவாறு கழிக்கப் பழக வேண்டும்.  சும்மா இருப்பது சோம்பேறித்தனத்தின் செயல் விளக்கம் . 

சிறந்த மாணவனாக வளர்வது எப்படி ? - 8

சிறந்த மாணவனாக வளர்வது எப்படி ?
வாழ்க்கை முழுதும் நிறைவான மகிழ்ச்சியோடு கூடிய மேலான வாழ்க்கையைப் பெற  உடலும் உள்ளமும் நலமாக இருக்க வேண்டும் . இதில் ஒன்றின் நலம் குறைவாக இருந்தாலும்  வாழ்க்கையின் இனிமை  குன்றிவிடும் . மனதை மட்டும் கவனித்தால் போதாது ,மனம் குடியிருக்கும் உடலையும் கவனிக்க வேண்டும் என்பதை  " காலை எழுந்தவுடன் படிப்பு , பின்பு மாலை முழுதும் விளையாட்டு "  என்று  மகாகவி பாரதி சொல்லுவான் .
நல்லொழுக்கத்திற்காகக் கல்வி கற்றுக்கொள்ள மேற்கொண்ட  முயற்சிக்குப் பின்  காலைக் கடன்களைச் செய்து முடிக்க வேண்டும். தன் வேலைகளைத் தானே செய்யும் பழக்கத்தை  விரும்பிச் செய்யவேண்டும் .தன்னால் செய்ய முடியாத  வேலைகளைச் செய்ய மட்டுமே பிறர் உதவியைத் தேடிப் பெறலாம்.
பல் துலக்குவது, குளிப்பது , அலங்காரம் செய்து கொள்வது ,  ஆடை அணிவது , உணவு உட்கொள்வது , பள்ளிக்குப் புறப்படுவது ,  வீடு திரும்புவது , என எல்லா  வேலைகளும் தாமதமின்றி நேரப்படி நடக்க வேண்டும் என்பதில் உறுதியாக இருக்கவேண்டும் . கிடைக்கும் நேரத்தை வீணாக்கிவிடாமல் இருக்க ஒவ்வொரு வேலைக்கும்   இவ்வளவு       நேரம் என்று முன் தீர்மானம் செய்து கொள்வது நல்லது . பல திறமைகள் உள்ளவர்களும் வாழ்க்கையில் தோற்றுப் போகின்றார்கள் என்றால் அதற்கு காரணம் அவர்கள் நேரத்தை சரியாக மேலாண்மை செய்யாததேயாகும்  . 
நேரத்தை எப்படி பயன்படுத்திக் கொள்ளவேண்டும் என்பதை இளம்வயதிலேயே அறிந்து கொண்டால் பிற்காலத்தில் பணி மற்றும் குடும்பச் சுமை காரணமாக கூடுதல் நேரம் தேவைப்படும் போது வெற்றிகரமாகச்  சமாளிக்க முடியும்.இதைக் கற்றுக்கொடுக்க வேண்டிய பொறுப்பு பெற்றோர்களுக்குத்தான் இருக்கின்றது .
நேரத்தைத் தேவையின்றிச்  செலவழிக்காதே , முதலீடு செய்  என்று அறிஞர்கள் சொல்லுவார்கள் . இதன் உட்பொருள் என்னவென்றால் நேரத்தை வீணாக்கச்  செலவு செய்தால் தற்காலிய சுகம் மட்டுமே கிடைக்கும், முதலீடு செய்தால் பிற்காலத்தில் அதை விரும்பியவாறு  வேறு வடிவில் பெற்று மகிழலாம் .   சம்பாதித்த பணத்தை மட்டும் புத்திசாலித்தனமாக முதலீடு செய்தால் மட்டும் போதாது , நேரத்தையும் அதி புத்திசாலித்தனத்தோடு பயன்படுத்தத் தெரிந்திருக்க வேண்டும். பொருள் செலவின்றி நேரம்  தானாகவே கிடைக்கின்றது என்பதாலும் , வீணாக்கி விட்டாலும் தொடர்ந்து கிடைக்கின்றது என்பதாலும் பெரும்பாலான மாணவர்கள் நேரத்தை  முதலில் வீணாக்கிவிட்டு பின்னர் வருத்தப்படுபவர்களாகவே இருக்கின்றார்கள் . குழாயில் வடிந்து  வீணாகும் குடிநீரைப் பற்றி கவலைப்படாவிட்டால்  குடிக்க ஒரு சொட்டு நீர் கிடைக்காத போது அதிகம்  துன்பப்பட நேரிடும்.
உழைப்பின்றி எடுத்துக் கொள்ளும் பொழுதுபோக்கு நேராத்தைச் செலவழி ப்பதாகும் .பொழுதுபோக்கின்றி உழைப்பது என்பது உடல் நலத்தைக் கெடுப்பதாகும் . உழைப்பதற்கான நேரத்தில் உழைப்பது என்பது நேரத்தை முதலீடு செய்வதாகும் .இதை ஒரு சிறு கதை மூலம் புரிந்து கொள்ளலாம் .
ஒரு குடியானவனுக்கு இரண்டு பிள்ளைகள். இறக்கும் தருவாயில் அவர்களின் விருப்பப்படி  தன் சொத்தைப் பிரித்துக் கொடுத்தான். மூத்தவன் தங்கக் கட்டிகளையும் , இளையவன் கரடு முரடான மேட்டு நிலத்தையும் பெற்றுக் கொண்டனர். .மூத்தவன் தங்கத்தை விற்று விற்று உயிர் வாழ , ஒரு கால கட்டத்தில் பொருளின்றித் தவித்தான். இளையவன் கரடு முரடான நிலத்தைப் பக்குவப் படுத்தி , அதை பொன் விளையும் பூமியாக்கி , காலம் முழுதும் நிறைவான வாழ்க்கையை வாழ்ந்தான் .
ஒருவருடைய வாழ்க்கையின் இனிமை  அவரவர் எண்ணத்திலும் ,செயலிலும் தான் இருக்கின்றது. எண்ணத்தை மனதாலும் , செயலை உடலாலும்  செய்ய வேண்டியிருப்பதால் அவற்றின் நலத்தை ஒவ்வொரு நாளும் கவனிக்க வேண்டியது அவசியமாகும் .

சிறந்த மாணவனாக வளர்வது எப்படி ? - 7

சிறந்த மாணவனாக வளர்வது  எப்படி  ?
மாணவர்களின் நல்லொழுக்கத்திற்கு முதல் பாடமாக  இருப்பது அவரவர் பெற்றோர்களே .முற்றும் கோணலுக்கு முதல் கோணல் இல்லாதிருக்குமாறு பார்த்துக் கொள்ளவேண்டிய கட்டாயப் பொறுப்பு  ஒவ்வொரு  பெற்றோருக்கும் இருக்கின்றது . தவறான பழக்க வழக்கங்களைக் கற்றுக் கொள்ளும் போது சும்மா இருந்து விட்டு  , பிற்காலத்தில்  தன் பிள்ளை மிகச் சிறந்த மேதையாக வரவேண்டும் என்று ஒரு பெற்றோர் எதிர்பார்த்தால் அது பெரும்பாலும் ஏமாற்றமாகவே முடியும் . பெற்றோர்களின் பாதுகாப்பில் வளரும் ஒரு குழந்தை  பிற்காலத்தில் ஒரு சிறந்த மாணவனாகத் திகழ்ந்து பின்னர் சமுதாயத்தில் உயர்ந்த மனிதனாக வாழ,அடிப்படை ஆதாரமான பல நல்ல பழக்க வழக்கங்களை பின்பற்றி ஒழுக கற்றுக்  கொடுக்க வேண்டும்.அதைச் செய்யத் தவறி மேற்கொள்ளும் ஈடுபாட்டில் காட்டும்  ஏற்றத் தாழ்வுகளே ஒரே வகுப்பில் படிக்கும் மாணவர்களின் சமச்சீரின்மைக்குக் காரணமாகின்றது . ஒரு பெற்றோரின் கடமை குடும்பத்திற்காகச்  சம்பாதிப்பது மட்டுமில்லை. குழந்தை  வளர்ப்பில் கொள்ளும் ஈடுபாடுமாகும் .அதற்காக ஒவ்வொரு நாளும் கொஞ்சம் நேரம் ஒதுக்கவேண்டும் .
ஒரு குழந்தை பிற்காலத்தில் சிறந்த மாணவனாக வளர  சில முக்கியமான பழக்க வழக்கங்களை பின்பற்றி ஒழுக வேண்டும். அவை பின்வருமாறு .
1 . அதிகாலையில் எழுந்து அன்றைய தின வேலைகளை முன்திட்டமிட்டு நாளை நாளை என்று தள்ளிப் போடாமல் செய்து முடிக்கும் இயல்பைத் தனதாக்கிக் கொள்ளவேண்டும் .
 ஞானிகள் அதிகாலையில் 3 மணிக்கெல்லாம் எழுந்து பணியாற்றத் தொடங்கிவிடுவார்கள். அதிகாலையில் உடலும் உள்ளமும் இறுக்கமின்றி இருப்பதால் ,செய்யும் வேலைகளில் முழுக் கவனம்  செலுத்தி முழுப் பயனுறு திறத்தோடு செய்து முடிக்க அவர்களால் முடிகின்றது. மனதை ஒருமுகப்படுத்திச் செயல்படுவதற்கு உடலின் ஒத்துழைப்பு இந்த அதிகாலை வேளையில் அதிகம் கிடைக்கின்றது என்பதை இவர்கள் நன்கு அறிந்து வைத்திருக்கின்றார்கள் .
துறவிகள் 4 மணிக்கெல்லாம் எழுந்து ஆன்மிகப் பணிகளை செய்யத் தொடங்குவார்கள் . ஒவ்வொரு  நாளும் பலதரப்பட்ட  பொது மற்றும் சமுதாய ப் பணிகளை மேற்கொள்ள வேண்டிய கட்டாயம் இவர்களுக்கு இருக்கின்றது. எச் செயலையும் சிந்தனைச் சிதறலின்றி ,சரியாக முன்கூட்டியே சுயமாக  முடிவெடுத்துச் செய்து முடிக்க அதிகாலை இவர்களுக்கு அனுகூலமாக இருக்கின்றது .
சான்றோர்களும் , மேதைகளும் 5 மணிக்கெல்லாம் எழுந்து  பணி மேற்கொள்வார்கள் .அக மற்றும் புற இடையூறுகளின்றி   பணிக்குத் தேவையான செய்திகளைத் திரட்டுவதற்கும், முன் திட்டமிடுவதற்கும் , முன் ஏற்பாடு செய்வதற்கும்  இந்த முற்பொழுது முழு இணக்கமாக இருக்கின்றது .
மாணவர்கள் சிறந்த மாணவனாக வளர விரும்பினால்  குறைந்தது 6 மணிக்கெல்லாம் விழித்த தெழுவதை பழக்கமாக க்  கொள்ள வேண்டும் . வீட்டுப் பாடங்களைச் செய்து முடிக்கவும், நேற்று நடத்திய பாடங்களை நினைவுபடுத்திப் புரிந்து கொள்ளவும் ,அன்று கற்க வேண்டிய புதிய பாடங்களை பற்றித் தெரிந்து கொள்ளவும் அமைதியான அந்த அதிகாலைப் பொழுது பயனுள்ளதாக இருக்கின்றது .மனம் அலை பாய்வதில்லை . கற்கும் கல்வியைத் தெரிந்து கொள்வதை விட, அறிந்து கொள்வதை  விட புரிந்து கொள்வதுதான் முக்கியம். புரிந்து கொண்டு தனதுரிமையாக்கிக் கொண்ட கல்வி மட்டுமே ஒருவரின் உள்ளுறை அகவாற்றலாகப்  பயன்தரத்தக்கது. அகவாற்றலின் அளவு அதிகரிக்க ஒரு மாணவன் திறமையானவனாகின்றான். ஒரு மாணவனின் மதிப்பு என்பது இந்த அகவாற்றலின் அளவைப் பொறுத்து அமைகின்றது.
7 மணிக்கு மேல் உறங்கி எழுபவர்கள் சோம்பேறிகள் . இந்த சோம்பேறித்தனம் வாழ்க்கை  முழுதும் பின் தொடர்வதால் வாழ்வின் பயனுறுதிறனை வெகுவாக இழந்து விடுகின்றார்கள் .

சிறந்த மாணவனாக வளர்வது எப்படி? - 6

சிறந்த மாணவனாக வளர்வது எப்படி ?
ஒரு மாணவன் கல்வியை இழந்தான் என்றால் அது அவனுக்கு மட்டும் இழப்பு , ஆனால் நல்லொழுக்கத்தை இழந்தான் என்றால் அது அவன் இருக்கும் சமுதாயத்திற்கே இழப்பு. ஒழுக்கமின்மையால் ஏற்படும் இழப்பு கல்லாமையால் ஏற்படும் இழப்பை விடப் பல மடங்கு அதிகம்.ஒழுக்கமில்லாத ஒருவருடைய முன்னேற்றம் அவருக்கு வேண்டுமானால் முன்னேற்றமாகத் தோன்றலாம். ஆனால் உண்மையில் அது உறுதிச் சமநிலையில் இல்லாத (unstable equilibrium) ஒரு முன்னேற்றமாகவே இருக்கும். அது நுண் கிருமிகளை போல விரைந்து பரவி  தீவிரமாகி சமுதாயத்தையே ஒட்டு மொத்தமாக சீரழித்து விடும் அபாயத்தைக் கொண்டுள்ளது.நல்லொழுக்கத்தைப் போற்றுவதால் ஒருவர் தன்னோடு தன் இனத்தரையும்,  சமுதாயத்தையும் வளப்படுத்த முடியும்.  ஒருவர் முன்னேறுவது மற்றவர்களை முன்னேற்றுவதற்குத்தான்  என்பது இயற்கை . இயயற்கையின் விசாலமான நடைமுறைகளிலிருந்தே இதை நாம் கற்றுத் தெளிய முடியும் . பெரும்பாலான மாணவர் தோல்வியடைவது , திறமையின்மையாலோ , அறிவின்மையாலோ இல்லை. மாறாக சுய விருப்பமின்மையாலும், முறையான வழிகாட்டுதல் இல்லாமையாலும் . அர்ப்பணிப்பு இன்மையாலும் , ஒழுக்கமின்மையாலும்  தான். இவை சமுதாயத்தில் மிகுந்து வருவதால் மாணவர்கள் ற்றிக்கொள்ள வாய்ப்பாக அமைகின்றது. நல்லொழுக்கம் உறுதியாக இருந்தால் சமுதாயத்தில் மிகுந்து வரும் எதிர்மறைக் காரணிகளை எளிதாக, வெகு இயல்பாக கட்டுப்படுத்தி விட முடியும்.
ஒழுக்கத்தைக் கடைப்பிடிக்க எல்லோருக்கும்  எளிமையாக இருக்க வேண்டும் என்பதற்காக ஒழுக்கம்  பொதுவாக எளிமையானதாகவே (S for Simple)  இருக்கும். ஏனெனில் ஒழுக்கம் காரணமாக ஒருவர் தனக்குத் தானே ஏற்படுத்திக் கொள்ளும் கட்டுப்பாடுகளை அவரே ஏற்றுக்கொள்வது என்பது எப்போதும் எளிமையானதே. கட்டுப்பாடுகள் போலியாக இருக்கும் போது ஒழுக்கம் கடினமாகி விடுகின்றது  அலைபாயும் மனதின் சுய விருப்பத்தைப் பொறுத்து அது எளிமையானதாகவோ அல்லது கடுமையானதாகவோ தோற்றம் தரலாம் .தீய ஒழுக்கங்களை மறைமுகமாகப் பின்பற்றி ஒழுகுவதற்கு ஒரு வலிமையான காரணம் எப்படி உள்ளுக்குள் இருக்கின்றதோ அதைப்போல நல்லொழுக்கங்களையும் வெளிப்படையாகப் பின்பற்றி ஒழுக மனதால் ஒப்புக்கொள்ளப்பட்ட ஒரு காரணம் உறுதியாக இருக்கவேண்டும் .அப்போது தான் மன மாற்றமின்றி  வாழ்க்கை  முழுதும் நல்லொழுக்கங்களை மட்டும் பின்பற்றி ஒழுக முடியும் .நல்லொழுக்கம் சமுதாயத்தில் வாழும் மற்றவர்களுக்கு ஒரு நல்வழிகாட்டியாகவும் புதியவர்களுக்கு முன் மாதிரியாகவும் இருந்தால்  சாகாத சமுதாயத்தில்  வாழும் மக்களுக்கு ஒரு நிரந்தரமான பாதுகாப்பாக இருக்கும் . அந்த வாக்குறுதியே நலமான சமுதாயத்தின் உண்மையான அறிகுறி.     

சிறந்த மாணவனாக வளர்வது எப்படி ? - 5

சிறந்த மாணவனாக வளர்வது எப்படி ?
குழந்தையாய் வளரும் போது கற்றுக் கொள்ளும் ஒழுக்கமே பிற்காலத்தில் மனிதனாய் சமுதாயத்தில் வாழும் போது தொடர்கின்றது . இவை ஒரு மரத்தின் ஆணி வேர் போன்றது. மாணவனாய் கல்வி கற்றுக் கொள்ளும் போதும் , பெற்றோர்களின் அறிவுரைகளாலும் , பட்டறிவினாலும், சுய சிந்தனைகளின் எழுச்சியால் நல்லொழுக்கமும் , தீய ஒழுக்கமும்  பற்றிக் கொள்கின்றன . இவை ஒரு மரத்தின் சல்லி வேர் போன்றது .காரணத்தோடு தீய ஒழுக்கங்கள் திருத்தப்படாவிட்டால் , அவை சுயமாக ஏற்றுக் கொள்ளப்பட்டு . வாழ்க்கை  முழுதும் தொடரும்  நிலையே ஏற்படும் . திருத்துதல் என்பது  தேவையற்ற களைகளை வேரோடு பிடுங்கி எறிதல் போன்றது. செடியாக இருக்கும் போது அப்படிச் செய்வது எளிது. அதுவே மரமாக வளர்ந்து விட்டால் வேரோடு பிடுங்கி எறிவது எளிதல்ல. 
ஒழுக்கம் என்பது வளரும் ஒரு மரத்தின் வேர் போன்றது. மரம் வளர்வதற்கும் பூத்துக் காய்ப்பதற்கும்   மட்டுமல்ல சாய்ந்து விடாமல் காப்பதும் இந்த வேரே. இந்த வேர் மண்ணுக்கு அடியில் இருப்பதால் நம் கண்களுக்குத் தெரிவதில்லை . அது போல ஒருவரின் உண்மையான ஒழுக்கமும் அவர் எண்ணத்திற்குள் இருப்பதால் பிறரால்  முழுமையாக அறிந்து கொள்ள முடிவதில்லை.இன்றைக்கு ஒருவருடைய ஒழுக்கம் அக மற்றும் புற ஒழுக்கம் என  இரண்டு வகைகளின் கலப்பாக இருக்கின்றது -   சமுதாயத்திற்காக வெளிப்படைத் தன்மை மிகுந்த போலியான  புற ஒழுக்கம் தனக்காக  வெளிப்படைத் தன்மையற்ற மறைவான ,நிரந்தரமான அக ஒழுக்கம்.வளரும் போது நமக்கு நாமே ஏற்றுக்கொண்ட ஒழுக்கங்களே சமுதாயத்தில் வாழும் போது வெளிப்படுத்த தோன்றுகின்றன .
குழந்தைகள் கல்வி கற்று அதிகமாய்ச்  சம்பாதிக்க வேண்டும் ,உயர் பதவி வகிக்க வேண்டும் என்று பெற்றோர்கள் எடுத்துக் கொள்ளும் அளவில்லாத முயற்சியில் ஒரு சிறிதளவு கூட நல்லொழுக்கங்களை பிறழாது ஒட்டி ஒழுக வேண்டும்    என்று அக்கறை எடுத்துக் கொள்வதில்லை. ஏனெனில் தன் பிள்ளைகள்  சீரழிந்து வரும் சமுதாயத்தில் பிழைத்து வாழ நல்லொழுக்கங்களை விட கொஞ்சம் தீய ஒழுக்கங்களும் தேவை என்ற தன்னம்பிக்கையை வளர்ந்துக் கொண்டுள்ளார்கள்.அதனால் தீய ஒழுக்கங்களை கற்றுக் கொள்ளும் பிள்ளைகளுக்கு  திருத்தப்படுவதற்கான வாய்ப்புக்கள் இல்லாது போகின்றது. தீய ஒழுக்கம் மிகுந்த சமுதாயம் ஒரு சில தீயவர்களுக்கு வேண்டுமானால் தாற்காலியமான நலம் பயக்கலாம் ஆனால் வளரும்  சமுதாயத்திற்குப் பாதுகாப்பற்றது , சாகாத சமுதாயத்திற்கு நிரந்தரமான நலமே பாதுகாப்பானது என்பதை இவர்களாக உணர கல்வியில் ஒரு மாற்றத்தை ஆசிரியர்களால் மட்டுமே ஏற்படுத்த முடியும்.   

சிறந்த மாணவனாக வளர்வது எப்படி ? -4

சிறந்த மாணவனாக வளர்வது எப்படி ?
சமுதாய மக்களுக்கு ஒழுக்கம் மிக மிக முக்கியம்.. ஒழுக்கமற்ற சமுதாயம் பாதுகாப்பற்றது என்பதால் விரைவில்  சீரழிந்து  போகும் .தனிமனித ஒழுக்கமே காலப்போக்கில் சமுதாய ஒழுக்கமாக நிலைப்படுகின்றது. அப்படி நிலைப்படும் ஒழுக்கங்களே தனி மனிதர்களுக்கு வழிகாட்டியாக அமைகின்றது.  மக்கள் வருவார்கள் போவார்கள். வரும் போது ஒன்றையும் கொண்டு வருவதில்லை போகும் போது எதையும் கொண்டு போவதில்லை . ஆனால் மக்களுடைய  சுய எண்ணங்களினால் விளைந்த செயல்கள் மட்டும்  சமுதாயத்தில் முன்மாதிரியாகத்  தங்கிவிடுகின்றன.  இது சமுதாயத்தில் புரையோடி  தொடர்ந்து அதிகரித்து வரும் ஒரு தாக்கத்தை  ஏற்படுத்திவிடுகிறது   மக்களால் ஆன சமுதாயம் உலகம் உள்ளளவும் இருக்கும் என்பதால் அதைச் சாகாத சமுதாயம் என்பர். இந்தச் சாகாத சமுதாயத்தில் முன்னோர்களின் நல்லெண்ணங்கள் நேர்மறையான வளர்ச்சிக்கும் , தீய எண்ணங்கள் எதிர்மறையான வளர்ச்சிக்கும் அடிப்படையாக இருக்கின்றன. அதனால் சாகாத சமுதாயத்தின் கண்ணோட்டத்தில் வருங்கால சந்ததியினருக்காக நம் முன்னோர்கள் இப்படித்தான் வாழ வேண்டும்  என்று வாழ்வியல் ஒழுங்கங்களுக்கு ஒரு வரையறையை  ஏற்படுத்தியிருக்கிறார்கள் .இந்த நெறிமுறைகள் சமுதாய நன்மக்களுக்கு பாதுகாப்பானது காலத்திற்கு   ஏற்ப  இதில்  சிறிய  அளவிலான  மாற்றங்களை வரம்புகளுக்கு உட்பட்டு அனுமதித்தாலும் சமுதாயத்திற்குப் பாதிப்பை ஏற்படுத்துகின்ற மாற்றங்களை அனுமதிப்பதில்லை .சுய நலத்தின் காரணமாக  எல்லை மீறி எப்படியும் வாழலாம் என்று வாழ நினைப்பவர்கள் தவறான முன் உதாரணங்கள் மூலம் சமுதாயத்தைப் பாழ்படுத்தி  விடுகின்றார்கள்.
ஒழுக்கமில்லாத கல்வி, செயல் யாவும்  பயனற்றவை. ஒழுக்கமற்ற எண்ணங்களினால் செய்யப்படும் சேவைகள் கூட  சாகாத சமுதாயத்திற்கு நலம் பயப்பதில்லை . ஒழுக்கம் இருந்தால் கல்வி என்பது தானாக க் கைகூடும் .உண்மையில் கல்வி கற்பது என்பது ஒழுக்கத்தின் ஒரு பகுதிதான்,சொல்லப்போனால் ஒழுக்கமே ஒரு கல்விதான். ஒழுக்கம் மீறுபவர்களே கல்லாதவர்கள்  ஆவர்.

சிறந்த மாணவனாக வளர்வது எப்படி ? -3

சிறந்த மாணவனாக வளர்வது எப்படி ?


ஒரு குழந்தை பெற்றோர்களின் அரவணைப்பில் வளரும் போது  அது தனக்கென ஒரு இலக்கை திட்டமிடும் திறமையைப்  பெற்றிருப்பதில்லை. தன் பிள்ளை எதிர்காலத்தில் என்னவாக வரவேண்டும் என்று திட்டமிட்டு   பெற்றோர்கள்  அதற்க்கேற்ப கட்டாயப்படுத்தாமல் வெகு இயல்பாக பிள்ளையே மனமுவந்து ஏற்றுக்கொள்ளுமாறு   ஊக்கப்படுத்தினால் அதுவே குழந்தைக்கு ஒரு ஊக்கக் காரணியாக அமைந்து இலக்கையை நோக்கிய பயணமாக அமையும். கட்டாயப்படுத்தினால் எதிர்மறையான விளைவுகளே ஏற்படும் . காரணத்தை புரியும்படி தக்க எடுத்துக்காட்டுகளுடன்  விளக்கிக் கூறும்போது குழந்தைகள் அதை ஏற்றுக் கொள்ளும் மனப்பக்குவத்தைப்  பெறுகின்றன.  பொதுவாக குழந்தைகள் பெற்றோர்கள் செய்யும் வேலைகளை அப்படியே செய்ய முயற்சிக்கும். பெற்றோர்கள் முன்மாதிரியாக இல்லாமல் குழந்தைகள் மீது திணிக்கப்படும் எந்த வேலையையும் விருப்பத்துடன் பின்பற்றப்படுவதில்லை. பெற்றோர்கள் படித்தால் பிள்ளைகளும் படிக்கும், செல் போனில் பேசினால் குழந்தைகளும் அப்படியே , டிவி பார்த்தல் குழந்தைகளும் டிவி பார்ப்பதைப் பழக்கமாக்கிக் கொள்ளும் . பொதுவாகப்    பெற்றோர்கள் செய்யும் தவறுகளே குழந்தைகளுக்கு முதல் பாடமாக அமைந்துவிடுகின்றன. செய்முறையுடன் கற்றுக் கொள்ளும் இந்தப் பாடங்களை குழந்தைகள் மறப்பதேயில்லை,   குழந்தைகளின் வாழ்க்கையில் பெரும் தாக்கத்தை ஏற்படுத்துவதற்கு இது ஒரு முக்கியக் காரணமாக இருக்கின்றது என்பதைப் பெற்றோர்கள் மறந்துவிடக் கூடாது . குழந்தைகள் முதலில் தவறான பழக்கங்களை காரணமின்றிப்  பழகிக் கொள்ளும் பழக்கத்தால்  பிற்பாடு நல்ல பழக்கங்களை காரணத்தோடு கூட பழகிக் கொள்ள முன் வருவதில்லை .நல்ல பழக்கங்களைக் குழந்தைகள் அறிந்து கொள்வதும் அறிந்து கொண்டதைப் புரிந்து கொள்வதற்கான வாய்ப்புக்களை ஏற்படுத்திக் கொடுப்பதும்  தவறான பழக்கங்களைப் பின்பற்றுவதற்கு வெகு முன்பாகவே இருக்குமாறு கவனமாக பார்த்துக் கொள்வது இந்தப் பிரச்சனைக்கு ஒரு இயற்கையான தீர்வாகும் . தான் அடையவேண்டிய இலக்கு எது என்பதை ஒருவன் எந்த வயதிலும் ஏற்படுத்திக் கொள்ளலாம். அது இளம் வயதில் ஏற்படும் போது இலக்கை அடைவதற்கான வாய்ப்புக்கள் மிகவும் பிரகாசமாகவும் நிச்சியமாகவும்  இருக்கின்றன.   இலக்கை அறியாதவனும் , ஏற்படுத்திக்கொள்ளாதவனும் செய்யும் செயல்கள் எல்லாம்  சென்றடைய வேண்டிய இடத்தை அறியாதவன் செய்யும் நடைபயணம் போன்றவை. அவனால் தன்  விருப்பத்  துறையில் ஒரு காலகட்டத்திலும் முன்னேற்றம் காண முடிவதில்லை