உடன்கட்டை
என்னோடு நீ உன்னோடு நான்
என்றைக்கும் இணைபிரியாத் தோழர்கள்
நம் நட்புக்கு இல்லை
இன்னொரு எடுத்துக்காட்டு
நான் பிறந்தபோது நீயும் புகுந்தாய்
நீ வளரும் போது நானும் வாழ்ந்தேன்
பிறந்தநாள் மட்டுமின்றி
பிறந்த இடமும் நேரமும்
இருவருக்கும் ஒன்றாய் இருந்ததே
நான் உண்டபோது நீயும் சுவைத்தாய்
நீ தாகமென்றபோது நானும் குடித்தேன்
நான் நீயாக நீ நானாக
பசிப்பதும் புசிப்பதும்
இருவருக்கும் ஒன்றாய் இருந்ததே
நான் விளையாண்டபோது நீயும் ரசித்தாய்
நீ வென்றபோது நானும் மகிழ்தேன்
எனக்குள் நீவர உனக்குள் நான்வர
உருவமும் உணர்ச்சியும்
இருவருக்கும் ஒன்றாய் இருந்ததே
நான் பாடியபோது நீயும் பரவசப்பட்டாய்
நீ ஆடியபோது நானும் பாராட்டினேன்
சிந்தையும் செயலும்
இருவருக்கும் ஒன்றாய் இருந்ததே
நான் விழுந்தபோது நீயும் வீரிட்டாய்
நீ வாடியபோது நானும் வருந்தினேன்
என்கண்ணில் நீரவர உன்கண்ணில் இரத்தம்வர
இன்பமும் துன்பமும்
இருவருக்கும் ஒன்றாய் இருந்ததே
நான் உறங்கியபோது நீயும் கனவுகண்டாய்
நீ விழித்தபோது நானும் எழுந்தேன்
நீ நானாக நான் நீயாக
எல்லா நிகழ்வுகளும்
இருவருக்கும் ஒன்றாய் இருந்ததே
நீயே காரணமென்று
எல்லோரும் சொல்கிறார்கள்
இருந்தும் உன்னை
இன்னும் அறிந்துகொள்ளவே இல்லை
அன்பிற்கு களங்கமென்று
நான் இறக்கும்போதே நீயும்
உடன்கட்டை ஏறுவேனென்று
உறுதியாய் இருகிறாய்
நானே நீ நீயே நான்
என்பதைப் புரிந்து கொளவே
என்வாழ்க்கை முடிந்துவிட்டதே
நான் மீண்டும் வருவேன்
உன்னைப் புரிந்து கொளவதற்காக
No comments:
Post a Comment