நீ வெற்றிக்காகப் பிறந்தவன்
"காவேரி"
ஓடி விளையாடு பாப்பா !- நீ
ஒலிம்பிக்கில் வெல்லவேண்டும் பாப்பா !
கூடி விளையாடு பாப்பா !- தங்கக்
கோப்பையை வாங்கவேண்டும் பாப்பா !
சின்னஞ் சிறுகுருவி போலே – நீ
சிட்டாய்ப் பறந்துவா பாப்பா !
தினமும் பயிற்சி செய்து - நீ
திறமை வளர்த்துக்கொள்ளு பாப்பா!
கொத்தித் திரியுமந்தக் கோழி- அது
குஞ்சுகளுக்கு நல்லபாடமடி பாப்பா!
கொத்தக் கற்கும் குஞ்சுபோல -நீயும்
மெச்சக் கற்றுக் கொள்ளு பாப்பா!
குஞ்சுகளைத் தாக்க வந்தால் - எதிரி
அஞ்ச விரட்டுமடி அந்தக் கோழி
அந்த வீரம் நெஞ்சிலிருந்தால்- வெற்றி
அண்டி வரும் தானே பாப்பா !
கொத்துவதில் குறியாய் இருந்தால் -குண்டுமணி
கூடத் தவறாது பாப்பா !
உந்தன் கவனம் சிதறாதிருந்தால் -நீயும்
உலகில் தவறாது சாதிக்கலாம் பாப்பா!
சாதனை செய்பவரைக் கண்டால் - அது
சோதனை ஆகாது பாப்பா !
சந்தித்துப் பார்த்தால் அதுவும் - உனக்கு
சாத்தியமாகுமடி பாப்பா!
No comments:
Post a Comment