Kavithai

இயற்கை ஓர் ஆசான் ஒவ்வொருநாளும் இரவும் பகலும் வருவதேன் ? ஓய்வின்றி உலகம் சுழல்வதால்தானே உலகம் உருண்டு கொண்டே இருப்பதேன் ? உறங்காதே தொடர்ந்து என்று பகலும் உழைக்காதே தொடர்ந்து என்று இரவும் எந்நாளும் ஞாயிறையும் திங்களையும் பாரென்று உன் காலம் முடியும் வரை சொல்லத்தானே காலமெல்லாம் கடல் அலை வருவதேன் ? கடல்பரப்பைக் காற்று தீண்டுவதால்தானே கடல்நீர் நிலத்தை முத்தமிட்டுச் செல்வதேன்? இல்லறத்தில் நல்லறம் இந்தக் காதலென்றும் இனத்தின் சாகாமைக்கு இயற்கை வரமென்றும் சாதலில்லா காதல் மங்காமல் தங்கி வர காதலை எல்லோருக்கும் கற்றுக்கொடுக்கத்தானே நிமிர்ந்த மலையும் நிலமடுவும் இருப்பதேன்? நிலமும் நீரும் சேர்ந்திருக்கத்தானே நிலம் மேலே நீர் கீழே இருப்பதேன் ? மடுநீரும் உயர்ந்து மலையைத் தொடலாம் மாநிலமும் கரைந்து மடுவில் சேரலாம் ஏற்றமும் இறக்கமும் வாழ்வில் உண்டென்று எடுத்தியம்ப இயற்கை கண்ட வழிதானே. உயிரினங்கள் பலவாய் இருப்பதேன் ? உயிரியல் சமநிலை தொடரத் தானே பிறப்பிற்குப் பின் இறப்பு வருவதேன் ? ஓருயிரின் அழிவே மற்றோர் உயிரின் ஆக்கம் இடைவெளியில்லா இறப்பு பிறப்பின் நோக்கம் பிறப்பிற்கு இறப்பே மூலமென்று உலகோர்க்கு ஓதாமல் ஓதுவதற்குத்தானே