ஒற்றுமையில் வேற்றுமை வேண்டாமே
நிலம் பல துண்டுகளாகி நாடாயிருக்கலாம்
ஆனால் உலகம் என்றைக்கும் ஒன்றுதான்
நிறம் வெவ்வேறாய் மனிதர்கள் பிரிந்திருக்கலாம்
ஆனால் இரத்தம் எல்லோருக்கும் சிவப்புத்தான்
இசைக்கும் சுரங்கள் எவ்வளவோயிருக்கலாம்
ஆனால்இசைக்கும் இசைக்கருவி ஒன்றுதான்
எழுதும் எழுத்துக்கள் பலவாக இருக்கலாம்
ஆனால் எழுதும் எழுதுகோல் ஒன்றுதான்
எஃகால் ஆன பொருட்கள் விதவிதமாய் இருக்கலாம்
ஆனால் அவற்றின் மூலப்பொருள் ஒன்றுதான்
மூச்சுவிடும் மனிதர்கள் வேவேறாய் இருக்கலாம்
ஆனால் சுவாசிக்கும் காற்று ஒன்றுதான்
தாய்க்குப் பிள்ளைகள் பலர் இருக்கலாம்
ஆனால் பிள்ளைக்குத் தாய் ஒன்றுதான்
பூக்கும் பூக்கள் பலவிதமாய் இருக்கலாம்
ஆனால் அவை சுரக்கும் தேன் ஒன்றுதான்
உடலில் உறுப்புகள் பல இருக்கலாம்
ஆனால் அனைத்தையும் இயக்கும் மூளை ஒன்றுதான்
மதம் வெவ்வேறாய் இருந்தாலென்ன
வாழும் நெறி வாழ்வோருக்கு ஒன்றுதானே
மொழி வெவ்வேறாய் இருந்தாலென்ன
புரிதலும் புரிந்துகொள்ளுதலும் ஒன்றுதானே
இனம் வெவ்வேறாய் இருந்தாலென்ன
பிறத்தலும் இறத்தலும் ஒன்றுதானே
கோயில்கள் வெவ்வேறாய் இருந்தாலென்ன
வேண்டும் அமைதி அனைவருக்கும் ஒன்றுதானே
செயற்கையால் வேறுபாடுகளை விரித்துக் கொண்டே
செல்லும் மனிதனே
இயற்கையைப் பார்த்து
இன்னுமா நீ திருந்த நினைக்கவில்லை
No comments:
Post a Comment