வாசமில்லாப் பூக்கள்
அணுவுக்குள் அளவில்லா ஆற்றலென்பார் அறிவியலார்
ஆற்றல் உறைந்தே அணுவானதென அவரறிவார்
அணுவின்றி அகிலமில்லை அங்கே பருப்பொருளுமில்லை
ஆற்றலின்றி படைப்பில்லை அதில் பரிணாமமுமில்லை
அண்டத்திலும் அணுக்கள் பிண்டத்திலும் அணுக்கள்
எங்கும் அணுக்கள் எல்லாவற்றிலும் அணுக்கள்
இயற்கையாய் வாழத் தெரியாத மக்களுக்கு
வாழ்கையை உணர்த்த ஆண்டவன் தூவிவிட்ட
வாசமில்லாப் பூக்கள் இந்த அணுக்கள்
அணுவில் இருக்குதொரு நேர்மின் மையக்கரு
அதைச்சுற்றி வலம்வருது எதிர்மின் எலெக்ட்ரான்கூறு
பேரண்டத்தில் நீ வாழுமிடம் சூரியக்குடும்பம்
தன் சிற்றுருவே அணுவின் வடிவம் எனக்கூறுதோ
அணுக்கள் ஒன்றையொன்று வெறுப்பதில்லை
அப்பாலிருந்தாலும் அன்புகாட்டி கவர்ந்திழுக்கின்றன
மாறாத அணுநேயமே பிரபஞ்சத்தை ஆளுது
மனிதநேயத்தை மறந்துவிட்டால் வாழ்வேது எனக்கூறுதோ
வாசமில்லாப் பூவாய்வந்த இந்த அணுக்கள்
உயிரிலா அணுக்களின் இணைந்த இயக்கம்
உலகில் மனிதவாழ்கையும் அது போன்றதே
சமமாய் ஈந்து சமமாய் பகிர்ந்து வாழ்தல்
சமுதாய வாழ்க்கையில் சகப்பிணைப்பு போன்றதே
சுகங்களை பரிமாறிக் கொண்டு வாழ்தல்
இல்லற வாழ்க்கையில் அயனிபிணைப்பு போன்றதே
நிலையிலா வாழ்கையில் நிலைப்புக்கு வழியறியா
மாந்தருக்கு வாழ்க்கை நெறி இதுவெனக்கூறுதோ
வாசமில்லாப் பூவாய்வந்த இந்த அணுக்கள்
No comments:
Post a Comment