நினைவுகளின் நிகழ்திறம்
நினைத்ததெல்லாம் நினைத்தபடி நடந்ததில்லை
நடந்ததெல்லாம் நடந்தபடி நினைத்ததில்லை
நினைவுக்கும் நிகழ்வுக்கும் ஏனிந்தப் பகை
நினைப்பதெல்லாம் நடக்க என்னதான் வழி
கனவுகள் நினைவானால் நிகழ்வுகள் நிஜம்
நினைவுகள் கனவானால் நிஜங்களும் நிழல்
நினைவே நிகழ்வாக நிகழ்வே நினைவாக
நிச்சய வழியிருக்க நம்பிக்கை கொள்க
நினைவுகளை விதைப்பது விண்வெளியில்
நிகழ்வுகள் விளைவது மண்வெளியில்
நினைவுகள் மலர்வது உள்ளுக்குள்ளே
நிகழ்வுகள் கனிவது உடலுக்குவெளியே
உறுதியான நினைவுகள் ஒன்றானால்
உருவமாகும் நிகழ்வுகளும் நன்றாகும்
உருவமில்லா நினைவுகள் பலவானால்
உண்மையான நிகழ்வுகளும் நிலைமாறும்
படிகள் ஏறஏற எட்டுமுயரம் ஏறும்
உயரம் கூடக்கூட அகவாற்றல் கூடும்
ஆற்றல் வரவர தன்திறம் வளரும்
தந்திரமில்லாத் தன்திறமே உன்தகுதி
நினைப்பதெல்லாம் நடக்குமென்பார்
நிலையான தகுதிப்பாடு கொண்டார்
தகுதிகள் எவ்வளவோ அவ்வளவே
நினைவுகளின் நிகழ்திறம் என்றே சொன்னார்
No comments:
Post a Comment